1 SAMUEL 26
26
Daud tetap la nggit munuh Saul
1Piga-piga kalak dilaki i Sip nari reh ndahi Saul i Gibea jenari iturikenna man bana maka Daud sangana cebuni i Deleng Hakila i tepi taneh mesawang Juda. #Msm 54:2 2Minter berkat Saul ras 3.000 tentera pilihen si mbisana i Israel ku taneh si mesawang Sip ndarami Daud. 3Jenari erkemah ia i tepi dalan i Deleng Hakila. Daud sangana i bas taneh mesawang e, janah kenca enggo tereteh man bana maka Saul reh ndarami ia, 4isuruhna piga-piga kalak mata-mata janah payo me maka Saul tuhu-tuhu i je. 5Minter ia berkat jenari idaramina i ja kin si payona kal ingan medem Saul ras Abner anak Ner, puanglima tentera Saul. Saul medem i bas kemah janah tenterana erkemah i sekelewetna.
6Jenari nungkun Daud man Ahimelek, kalak Heti, ras man Abisai senina Joap (nande Abisai ras Joap e me Seruya) nina, “Ise i bas kam nari duana lawes ras aku ku kemah Saul?”
“Aku,” nina Abisai ngaloi.
7E maka i bas berngi e Daud ras Abisai bengket ku bas perkemahen Saul janah idapetina Saul sangana medem i tengah-tengah perkemahen e; lembingna pajek i bas taneh deherken takalna. Abner ras tentera e sangana medem i sekelewet Saul. 8Nina Abisai man Daud, “I bas berngi enda enggo itamaken Dibata musuhndu i bas kuasandu. Genduari berelah maka kupantem ia seh telpus ku taneh alu lembingna e jine; sekali pantem saja, la perlu dua kali!”
9Tapi nina Daud, “La banci isakitindu ia! Ugapa pe iukum TUHAN ise gia si nakiti raja pilihenNa. 10Erkite-kiteken TUHAN si nggeluh,” nina Daud tole, “kueteh nge maka TUHAN jine pagi si munuh Saul, ntah pe mate perban enggo seh paksana, ntah ia mate i bas perang. 11TUHANlah si ngambati aku ncubaken erbahan si jahat man kalak si enggo itangkuhken TUHAN jadi raja! Marilah sibuat lembingna ras tambe ingan launa, jenari lawes kita.” 12E maka ibuat Daud lembing ras tambe ingan lau ndai si rembak kal ras takal Saul, jenari lawes ia ras Abisai. La lit ise pe si ngidah ntah pe si metehsa kai si enggo jadi, si keke pe la lit – kerina ia entabeh pertunduhna, erkite-kiteken entabeh iakapna kerina medem ibahan TUHAN.
13Jenari ikepari Daud baluren ndai ku das sada uruk si enggo cukup ndauh. 14E maka erlebuh ia man tentera Saul ras man Abner nina, “Abner! Begindu kang aku?”
“Ise kin si erlebuh e, si ngingeti raja?” nina Abner nungkun.
15Ngaloi Daud, “Abner, la kin kam dilaki si meganjangna pangkatna i bas Israel? Jadi ngkai maka la ikawalindu tuanndu raja? Ndai lit mengketi perkemahen, atena munuh tuanndu. 16Kam enggo gagal i bas tugasndu Abner! Ersumpah aku i bas gelar TUHAN si nggeluh maka kerina kam enggo patut mate, sabap la ikawalindu tuanndu, si enggo iangkat TUHAN jadi raja. Nehenlah! I ja lembing raja? I ja tambe ingan lau si ndai arah takalna?”
17Itandai Saul sora Daud jenari nungkun ia, “Daud, kam kin e anakku?”
“Aku,” nina Daud ngaloi. 18Jenari nina tole, “O Bapangku ngkai maka aku suruh-suruhenndu, iayak-ayakndu denga? Kai kin si enggo kuban? Kai kin kejahaten si enggo kulakoken? 19O Raja begikenlah kai si ateku kukataken man bandu. Adi TUHAN kin si enggo ngajuk-ngajuk kam ngelawan aku, arah sada persembahen man baNa enggo banci erkusur ukurNa; tapi adi manusia kin si erbahanca idabuhken TUHANlah cilaka man bana. Sabap enggo ipaksana aku lawes i bas taneh pusaka TUHAN nari ku sada negeri i ja dibata-dibata si deban ngenca banci kusembah. 20Ola min ipelepasndu aku mate i bas taneh kalak, ndauh i bas TUHAN nari. Engkai maka raja Israel reh munuh sada kutu biang bagi aku enda? Engkai maka ipeburuina aku desken sada manuk rimba?”
21Ngaloi Saul nina, “Aku enggo ersalah. Mulihlah Daud, anakku! Ndigan pe lanai aku nggit erbahan si jahat man bandu, sabap la kam nggit munuh aku i bas berngi enda. Motu kal aku gelgel nari! Enggo papak kal perbahanenku!”
22Erjabap Daud, “Enda lembingndu ndai, Raja. Suruh sekalak tenterandu e ngelegisa. 23TUHAN mereken balasenNa man kalak si setia dingen benar. Sendah itamakenNa kam i bas kuasangku, tapi la kusakiti kam, si enggo iangkat TUHAN jadi raja. 24Bagi sendah enggo kukelengi kesahndu, bage ka lah perbahanen TUHAN man bangku janah ipulahiNa aku i bas kerina kesusahen nari!”
25Nina Saul man Daud, “Dibata si masu-masu kam, anakku! La banci la seh bagi sura-surandu i bas kerina si ilakokenndu!”
E maka iterusken Daud perdalanenna, janah Saul mulih ku rumahna.
Currently Selected:
1 SAMUEL 26: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
