1 SAMUEL 25
25
Kematen Samuel
1Mate Samuel, jenari pulung kerina bangsa Israel nangisisa. Kenca bage ikuburken kalak enda ia i rumahna i Rama.
Daud ras Abigail
Kenca si enda, lawes Daud ku taneh mesawang Paran. 2-3I jah lit sekalak dilaki i bas terpuk Kalep nari, Nabal gelarna. Kutana i Maon, janah lit tanehna deherken kuta Karmel. Ia kalak bayak tuhu-tuhu, biri-birina lit 3.000, kambingna lit 1.000. Ndeharana si Abigail mejile janah cerdik, tapi Nabal kalak mediker, macik lagu langkahna.
Paksa e sangana igunting Nabal mbulu biri-birina i Karmel, 4janah Daud, sangana i bas taneh si mesawang megi kerna si e. 5E maka isuruhna sepuluh kalak anak perana maba tenah ku Karmel, gelah ijumpaina Nabal, peseh kata mejuah-juah i bas Daud nari. 6Ipedahkenna man anak perana ndai gelah ikatakenna man Nabal, “O teman, Daud ngataken mejuah-juah man bandu, bage pe kerina si lit i bas kam ras keluargandu la kurang kai pe. 7Enggo ibegina maka kam sangana nggunting mbulu biri-birindu, janah ipebetehkenna atena man bandu maka kalak si ermakan asuh-asuhenndu enggo ras kami janah la ibahan kami si jahat man bana. Kerina si lit i bas ia sada pe la lit itangko kidekah ia i Karmel. 8Sungkunilah ia kerina, tentu iturikenna man bandu. Kami enda enggo reh sanga wari pesta, janah ipindo Daud man bandu gelah meriah min ukurndu ngaloken kami. Mekuah min atendu maka iberekenndu kai si terbereken man kami suruh-suruhenndu ras man anakndu Daud.”
9Teman-teman Daud nehken berita enda man Nabal i bas gelar Daud. Kenca bage itimaina i je. 10Janah kedungenna ngaloi Nabal nina, “Daud? Ise kin ia? La enggo pernah kubegi kerna ia! Genduari enda dem kal taneh enda alu budak-budak si lompat i bas tuanna nari! 11La aku nggit muat roti ras laungku, ras asuh-asuhen si enggo kugeleh man si nggunting biri-biringku, jenari merekenca man kalak si la kueteh i ja nari rehna!”
12Mulih teman-teman Daud ndai, nuriken kai si enggo ikataken Nabal. 13“Bentingken pedangndu!” nina Daud mereken perentah; e maka minter bage ibahanna kerina. Daud pe ibentingkenna ka pedangna jenari berkat ia ras kira-kira 400 kalak temanna, janah itadingkenna 200 kalak njagai barang.
14Sekalak i bas suruh-suruhen Nabal ngataken man Abigail ndehara Nabal, “Enggo ibegikenndu maka Daud nuruh piga-piga kalak persuruhen i bas taneh si mesawang nari ngataken mejuah-juah man tuan kami, tapi megombang ia man kalak ndai 15situhuna mehuli kal nge ia man kami; la pernah kami igangguna, janah kidekah kami ras ia i bas mbalmbal enda, la lit sada pe barang kami bene. 16Ikawalina kami suari ras berngi kidekah kami ras ia mpermakani biri-biri. 17Ngarap aku gelah iukurkenndu kerna si enda janah putuskenlah kai si man bahanen. Enda banci maba cilaka si mbelin man tuan kami ras kerina keluargana. Tuan kami jahat perukurenna maka la ia nggit megiken cakap ise pe!”
18Pedas-pedas ipepulung Abigail 200 ngkibul roti, dua guci kuling-kuling dem isin lau anggur, lima biri-biri si ipanggang, sepulupitu kilo buah gandum si isauk, 100 tandan buah anggur ras 200 kue buah ara si enggo ikerahken, jenari itamakenna kerina ku das kelede. 19Kenca bage ikatakenna man suruh-suruhen ndai, “Leben kam berkat janah aku ngikut arah pudi.” Tapi la ia ngata man perbulangenna.
20Sanga Abigail ngersak keledena mentasi sada eluk dalan i teruh uruk, rempet ia jumpa ras Daud ras teman-temanna si reh kempak ia. 21Tupung e Daud sangana rukur, “Sia-sia kap kukawali sikerajangen kalak ah i bas taneh si mesawang enda? La kap lit kebenen barangna, tapi ibalasna kiniulinku alu si jahat. 22Dibatalah si munuh aku adi la kin kubunuh kerina kalak ah ndai keri ope denga erpagi-pagi!”
23Kenca Abigail ngidah Daud pedas-pedas ia nusur i das keledena nari, jenari minter ia erjimpuh ku taneh 24i tapak-tapak Daud, janah nina man Daud, “Mekuah atendu min Bapa, begikenlah aku! Aku sajalah si mersan kesalahen e. 25La pedah iperdiatekenndu Nabal kalak si la terpake e! Ia payo kal bagi gelarna si motu. Aku sangana mbarenda la i je asum suruh-suruhenndu reh, Bapa. 26TUHAN kap si ngolangi kam maka la ibunuhndu imbang-imbangndu. Janah genduari ersumpah aku alu gelar TUHAN si nggeluh maka musuh-musuhndu ras kerina si atena erbahan si jahat man bandu la banci la iukum bagi Nabal. 27Ngarap aku Bapa, gelah ialokenndu luah si enggo kubaba man bandu, janah berekenlah man teman-temanndu. 28Mekuah min atendu Bapa, sasapkenlah kesalahen si enggo kubahan. Tentu ibahan TUHAN kam pagi jadi raja, ras kesusurenndu pe, erkite-kiteken kam nehken perang TUHAN, janah la kam nggit erbahan si jahat kidekah kam nggeluh. 29Adi lit kalak si ngayaki kam atena janah ndarami dalan munuh kam, TUHAN Dibatandu si ngkawali kam bagi sekalak si njagai sada barang si meherga. Janah adi kerna musuh-musuhndu, ugapa pe ibenterkenNa ia ndauh-ndauh, desken sekalak dilaki si menterken batu alu kalimbawangna. 30Janah kenca enggo pagi isehken TUHAN kerina si mehuli si ipadankenNa man bandu janah enggo iangkatNa kam jadi raja Israel, 31lanai pagi perlu kam suhsah ras erkadiola Bapa, erkite-kiteken munuh alu la ersabap ntah pe erbalas rikutken ukurndu jine. Janah kenca pagi isehken TUHAN pasu-pasuNa man bandu, Bapa ngarap aku gelah ola ilupakenndu aku.”
32Nina Daud man bana, “Terpujilah TUHAN, Dibata Israel, si enggo nuruh kam sendah njumpai aku! 33Bujur man Dibata kerna kepantasenndu rukur ras kerna kai si enggo ibahanndu sendah i bas ngolangi aku erbahan kejahaten munuh ras erbalas rikutken ukurku jine. 34TUHAN si erbahanca maka la kusehken si jahat man bandu. Tapi ersumpah aku i bas gelar Dibata Israel si nggeluh maka adi la pedas-pedas kam njumpai aku, kerina teman-teman Nabal enggo min ndai mate ope denga erpagi-pagi!” 35Kenca bage ialoken Daud kai si ibaba Abigail man bana, janah nina Daud man bana, “Mulihlah kam ku rumahndu janah ola aru atendu. Sue ras pemindonndu man bangku bage nge kubahan.”
36Mulihken Abigail, jumpa ia ras Nabal si sangana erpesta i rumah bagi pesta sekalak raja. Ia sangana mabuk ras ersenang-senang, e maka kai pe la iturikenna man bana seh pepagina erpagi-pagi. 37Kenca bage, kenca jore ukurna, ituriken Abigail man bana kerina. Rempet kumat penakit jantungna jenari sitik pe lanai ia ngasup kemuit. 38Kira-kira sepuluh wari kenca si e ipalu TUHAN me Nabal jenari mate ia.
39Kenca ibegi Daud maka Nabal enggo mate nina, “Terpujilah TUHAN! Enggo erbalas IA man Nabal erkite-kiteken igombangina aku janah enggo ijagaiNa aku, suruh-suruhenNa gelah ola aku erbahan salah. TUHAN enggo ngukum Nabal erkite-kiteken kejahatenna.”
Jenari isuruh Daud gelah Abigail isungkuni man ndeharana. 40Lawes suruh-suruhenna ndahisa ku Karmel janah nina man Abigail, “Isuruh Daud kami ngelegi kam jadi ndeharana.”
41Mungkuk Abigail seh ku taneh, jenari nina, “Aku kap suruh-suruhenna, enggo aku ersikap murihi kerina nahe suruh-suruhenna pe.” 42Pedas-pedas ia ersikap jenari iersakna keledena. Itemani lima kalak pelayan si diberu, lawes ia ras suruh-suruhen Daud jenari jadi ndehara Daud ia.
43Ope denga si e Daud enggo ngempoi Ahinoam i Jesreel nari, janah genduari Abigail pe enggo jadi ndeharana. 44Sanga si e, Saul mereken anakna Mihal, ndehara Daud, man Palti anak Lais, si gelgel e ia anak kuta Galim.
Currently Selected:
1 SAMUEL 25: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
