Titɔ 2

Makomo maenge Titɔ koeyecha Baimenyi

1Alakini awɛ Titɔ, eyecha baimenyi bitoengama ne maeyechi me kiinɛkinɛ. 2Ongwa mokosaolea baabaome batae banunu itɛ baongwe bando ba kiya, batuinyemya, be lokani, ne batoemana ngoo mwiekekeo lye kiinɛkinɛ, mo kokondana ne kokemya metema.

3Bakachi banunu naabɔ, ongwa mokobaeyecha itɛ baongwe ne mea myaachi etokonda Kakua. Baatowaena koongwa mɔkɔɔcha bakinɛ bwabea, kabee ngɔlwa. Alakini, batowaena koongwa mokoeyecha mokomo maachi, 4kɔmɔa baeyeche bakaisɔngwa bayabaya kokonda baome babɔ ne baana babɔ. 5Kabee baongwe moko baana itɛ baongwe ne ngani chaachi, ne batasi ne ikɔya ne kokamba meemo ye kebao, ne koongwa baachi, ne koeleleka baome babɔ. Baongwe mokoketa bobo, kɔmɔa bando baɔchaya bwabea ko makomo ma Kakua.

6Mwilwa naayo, baana itɛ baongwe ne lokani lwaachi. 7Awɛ, ongwa mokoketa byaachi kɔmɔa bando bakoeye. Ne mokoeyecha kwao, ndoongaya, kabee ndoongwaya mokoketa makacho. 8Mɛɔcha yao iongwe yee kiinɛkinɛ, etaasi bando baakameangeche. Ongwa mokoketa boa, kɔmɔa baangani nito baaongwaya ne makomo mabea me kɔɔcha ko mbanga yiito, ne bakonje masɔni.

9Bacha* naabɔ banyɛmyɛ bakoo babɔ ku bisɛ ne baimɛmɛ. Kabee, Atabasaolee batobaemanea ikɔmo lɛsɛ, baongwaya mokoangechana naabɔ. 10Kabee, baaongwaya mukuiba tombaambaa twe batobaemanea. Alakini, bienge baongwe bando batobaelwa mu bisɛ. Mokoketa bobo, bisɛ bitoketa abɔ, bitaongwe mokobeesa bɔnyɛmu ko makomo ma Kakua moolochi* wiito, maa matosaola bae.

Kakua osoangwecha lokwa lwakɛ

11Kinɛkinɛ! Kakua osoangwecha lɔkɔka lwakɛ lwakaolola bando basɛ. Kɔmɔa Kakua uchiboe lɔkɔka, ibongo lye kooloka kwe bando basɛ. 12Koetea loa lɔkɔka, Kakua waanga kotoeyecha itɛ toongwe mɔkɔkɔna koketa bitaasi awɛ kokonda, ne kɔkɔna koyea makomo me bokata me oono mɔsɛngɛ. Ano, bokee bae mo oono mɔsɛngɛ, totowaena koongwa ne lokani lwaachi, ne koketa bitowaena kombaa kwa Kakua, ne koketa bitokonda awɛ. 13Toongwe mokoketa boa ko koendecha lusu lwaachi lwaanga bae kolobaela. Loa lusu ne lwakabaka Moolochi* wiito Yɛsu Kilisito, oe Kakua wiito mokoo mo boombe. 14Olya Yɛsu, waocha mwɛchɔ wakɛ awɛ mwɛɛnɛ ko mbanga yiito. Waketa boa ko kotoolola bae mo bwabea bwito, ne kotoketa bando bakɛ ba Ama*, kabee bae ne mbosa ye koketa byachi.

15Kobobo ee mwana waanɛɛ, maa makomo ne matowaena awɛ koongwa moko maeyecha ko bando, ne kobasukua ne kobakandokea. Ongwa mokoketaya boa nɛ bɔkɛtɛ bwao bɔsɛ. Nduimenyaya mondo ɔɔsɛ kɔkɔnyɛka.

Currently Selected:

Titɔ 2: ZMB

Highlight

Copy

Compare