Titɔ 1

Kuinokea

1Mee Paulɔ, nae mokambi wa Kakua kabee nae ndomwa* ya Kilisito*. Kakua osondoma ko bando babɛchaya awɛ osobasɔbɔa kombaa, ko abɔ kumuimenya, ne bachebe makomo me kinɛkinɛ. Maa makomo ne matabɛ mokobakwasa ku bikete bituimɛma na Kakua, 2bakonje ibaechi lye mwɛchɔ we meembo. Olya mwɛchɔ, kakua otasi ndaatɔɔcha manu, ne watolaa awo kombaa ndaana sɛnga mɔsɛngɛ. 3Ko keeko kya Kakua, oe moolochi* wiito, akoka akyo, awɛ na koangwecha bando Ikomo lyakɛ koetea makomo manjaolea awɛ itɛ nabasaolee.

Bikete bye mununu mo kanisa

4Titɔ, #1:4 Yɔɔla 2Bal 2:3; 2Tim 4:10. awɛ ne utukunyea mee oona mokanda. Awɛ ne mwaana waanɛ we kinɛkinɛ koetea koongwa kwito mɔ bɔmɔɔsa mu iekekeo. Tati Kakua, ne Moolochi* wiito yɛsu Kilisito baongwe mokoko twambwea ne kɔkɔɛcha nyaa!

Bikete bye mununu we Kakisa

5Cheba itɛ nakusiechi ko kesanga kye Kɛlɛtɛ, kɔmɔa usieche makomo masɛ masaa. Mo kalya kasɛ, emeka banunu batowaena koemanea kanisa ka Kakua, koengama ne malai ma kolaa mee. 6Mununu we kanisa oongwe mondo otaasi nɛ tɔngɔnjɔ, moome we mokachi ɔmɔɔsa.#1:6 Bando bamɔchi baanga kɔyɔɔla lele ikomo itɛ mununu we Kanisa ndaatowaena koongwa ne bwambya. Ne baana bakɛ batokoka ne koongwa baimeenyi, kabee baaongwaya ne tɔngɔnjɔ ɔbɛɛ babea metema. 7Kɔ bɔbɔ, Mununu na olya otoemanea meemo ya Kakua. Kobobo, ndaungwekaya muikomo lyabea bwe: koongwa ne muuma, koongwa we koemoka mbeo, koongwa ngɔlwa, koongwa wabea motema, koongwa we koenga byɛndɔ bitaasi mo njea chaachi. 8Alakini, bitokoka ne oongwe mondo we kɔsɛkɛɛla bɛɛni batoolea kwakɛ ne koongwa mokoketa byaachi. Kabee oongwe ne lokani lwaachi, Kabee oongwe ne lokani lwaachi, ne oongwe wa ɔla, ne oongwe we kiinɛkinɛ, kabee oongwe we kuikɛnga ne bwabea. 9Oongwe bwakaɛ we koketa Makomo matwimenyiwa maa mamoeyecha bae. Mokoketa bobo, otaongwe mokobatɛcha bakinɛ motema koetea ikomo lye kinɛkinɛ ne koongwa mokoangwecha bwabea bwe baa batoangechana naakɛ.

10Kinɛkinɛ, babua asambea baa bando baatɔnyɛmya naanga ne mondo ɔmɔɔsa, kabe baanga koonga bando koetea makomo mabɔ me bokata. Babua asambea abɔ ne Bayula basusia kuimenya Yɛsu Kilisito. 11Baa basɛ, bienge kobachiba tonywa, kɔmɔa mokoeyecha makomo matasi bwaachi, bae mukusia bando basɛ mo nɔngɔ chabua balɛkɛɛ iekekeo lyabɔ. Bae mokoketa bobo ko abɔ kokonja tombaambaa mo njea chabea.

12Baa bando be mosomba we Kɛlɛtɛ, ɔmɔ asambea ndɛnda* chabɔ waɔcha itɛ: «Bando be Kɛlɛte, sangwa ya sangwa baanga ne nee manu. Kabee baanga ne nyama cha choa, ne koongwa baeyea ne ikaa!»

13Maa makomo ne me kinɛkinɛ. Kɔ bɔbɔ, ongwa mokobakandokea byabua, kɔmɔa basekamae muiyekeko le kinɛkinɛ. 14Baabɛchaya mukuiungwecha ngano che manu che Bayula, ɔbɛɛ kɔɔndana ne malombo me bando maanga kɔkɔna makɔmo me kinɛkinɛ. 15Ano, ko bando ba Ama*, bisɛ ne bya Ama*. Alakini, ko bataasi ba Ama*, ne batɔkɔna kuimenya, kuusi kee kya Ama*. Lokani lwabɔ ne bichebi byabɔ bie ne ikɔya. 16Baa bando batɔɔcha itɛ baanga kocheba Kakua, alakini bikete byabɔ biito angwecha itɛ batomocheba. Kabee babea metema, ne baatɔnyɛmya mondo ɔsɛ, ne baatɔɔsɔna koketa kɛsɛ kee kyaachi.

Currently Selected:

Titɔ 1: ZMB

Highlight

Copy

Compare