หม 90
90
ลอง เฌาพรา กอย เซเซ บอ ลอง ดูอี โลว ยัม
ดา อาโมวแซ อี มูห ดูอี อี โบง ฆาน เฌาพรา, อัน แฮะ ซาคึร ปาย นี.
1แม เฌาพรา, ซีณ อาต นี ดอน โจว ดอน บาน แม แฮะ แบน โดง บึง เย.
2ซีณ อาต พาน เบลห แม เฌา กาดาย เฆ นอน, แม แฮะ กอย แบน ฌาด แบน ฌาด. บอ นา อาต นี ฮาว แม ดี บอ กอย ดอน โจว ดอน บาน.
3แม เฌา แตห ดูอี วี แบน กาปูห. แม เฌา บอ ต็อห, “แตห เฆ ยัม, วี แบน กาปูห ปี บรีม.”
4โคว, เซ อึณ มูห อู แหรณ ซีนัม, แม เฌาพรา ยี ทาง, อึณ ปี ซอ ปวน ฮาว อาหมึร ฮู มึอน. แม บอ ทาง อึณ มูห อา โอย นารี แคง หมึร.
5แม เฌา บอ แตห ดูอี ยัม ดอ อีด เฆ. เฆ บอ ปี เปต อี นับ ดี เหรห มี เจว หณา.
6เจว หณา อึณ ปี บอ แฮะ ชีด แฮะ บรัห ซีคยา, บา ดี อับ อึณ ยี วี เฮียะ กาฮ็อห ยัม.
7บอ เย แฮะ ฌัม ดูก ตาง โกบ แฮะ รู แม เฌา ดี เย. เย มึห น็อห กลึร น็อห โยว โกบ แฮะ จาว แม เฌา ดี เย.
8แม เฌา แฮะ นับ หมาบ แปะ แฮะ โบง เย บอ หมาบ ปี เครียง เย. แม แฮะ แตห อึณ ลึห โตต แคง บลาง อี กอย โรบ แม.
9โกบ แฮะ รู แม เฌา ดี เย, อาซาก เย อาว ฮู โต็ง. อึณ ปี อู โต็ง ดีอีห น็อห, แฮะ ฮอต โตต.
10อาซาก เย ดี โต็ง บู ฆึร ซีนัม. เซ วี เหมา บอ โปลม คัะ บอ ปึอน กอย ดา ฆึร ซีนัม. ดอ กอย เยปาย ตี, อึณ ดูก หณาบ กาเซา. อึณ ครัน, อาว เหลณ แฮะ ฮอต โตต.
11อาว มึห อาเซ อี นับ ปี ปาย เฌาพรา เซ อัน ฮี รู ฮี จาว. โคว, โลว โยว, โลว โรวเซ อัน เฌา.
12โอว หมาณ แม เฌา, แตห แม มาโนว เย, แตห เย โหลห เซเซ ซีแง ดี โลว ยัม เย. แตห อึณ แตห อางยาน บอด ดี เย.
13อึย แม เฌาพรา, โอว หมาณ, แกวะ แตห แม รู ดี เย เซเซ. แตห แม วี กาเว เย อี มูห แดเจณ แม.
14ซีณ ซีณวัห เจว, แตห แม เฌา ม็องการา ดัว น็อห ดาคึย ดี เย โกบ ร็อก กาเว แม ดี เย. แตห เย มึห น็อห โบยว ดาคึย, อืบ แม เฌาพรา เซเซ.
15โอว หมาณ, แตห แม เฌา กาเว เย, แตห เย มึห น็อห ดาคึย, แตห อึณ เหลณ แคะ ดึอม คัม เย ดูก. แตห เย ดาคึย แบน ซีนัม แบน ซีนัม, แตห อึณ ปี แคะ แฮะ คัม เย ดูก แบน ซีนัม แบน ซีนัม.
16แตห แม บยัะ ดี เย แคะ ตาง ปี โบง แม เฌา. แตห บอ หลูกหลาน เย ยึร อาพูง ดังโคว แม เฌา.
17แม เฌาพรา อี มูห เฌาพรา ปี กรึบ เย, แตห แม แตห นา หมึอม ดี เย เซเซ. เย บอ โบง ฆาน โมยว เหมา, แตห แม แตห อึณ ออง ดอน โมยว. แตห อึณ แบน ปาย ตี เซเซ.
© 2021, Wycliffe Bible Translator, Inc. All rights reserved.