หม 89
89
โหมว ปี ต็อห ลอง ดอ ฌัม ดูก
อาเอทาน อี มูห ดูอี แคง ครึร อาเอจารา แฮะ แดม โหมว นี.
1อึย แม เฌาพรา, เซเซ โอว ดี ต็อห โหมว ลอง น็อห ร็อก แม เฌา. โอว ดี บอ กาลาง ดี เฆ ดอน โจว ดอน บาน ลอง แม เฌา มึห น็อห หมาน น็อห หมึอม เซเซ.
2โอว ดี แตห อี นับ, แม เฌา มึห น็อห ร็อก กาเว เซเซ. น็อห หมาน น็อห หมึอม แม เฌา ตู บยอง ดอ เหมา. อึณ ดี กอย แคง ฆางหราว เซเซ.
3แม เฌา แฮะ ต็อห, “โอว แฮะ ดัว กาดีก ซัดฌา ดี ดูอี ปี ร็อห โอว, โอว แฮะ กาแซณ ดี อาดาวีด ต็อห,
4‘โอว ดี แตห ครึร แม แบน คูนดีคัม เซเซ. โอว ดี แตห ครึร แม แบน ดา ตาง อี อึบ ดอน โจว ดอน บาน.’”
5อึย แม เฌาพรา, เฆ อี กอย แคง ฆางหราว, เฆ ดี ต็อห โหมว อี อืบ แปะ แฮะ โบง แม อี หมึอม อาม กาเซา. เฆ ดี อืบ น็อห แม อี หมาน อี หมึอม เซเซ. แตห บอ เฆ อี บอด อี กอย รึม วี โทม.
6โคว, แคะ กอย โมยว อี กอย แคง ฆางหราว, อาว มึห อี ปี แม เฌาพรา. แคะ กอย เฆ อามู อามาด แคง ฆางหราว, อาว มึห อี การัม แม เฌาพรา.
7พึง เฆ อี ซีงา บอด, อี กอย แคง ฆางหราว, เฆ บอ โยว เฌาพรา. อาพูง ดังโคว อัน เฌา แฮะ ตาง หลึอม โตต ดอน โมยว อี กอย โคบ อัน.
8อึย แม เฌาพรา อี อึบ โตต โมยว อี มึห ปวน, อาว มึห อาเซ อี ปี แม เฌา. ปวน แม เฌา แฮะ ตาง กาเซา. บอ น็อห แม อี หมาน อี หมึอม เซเซ, อึณ แฮะ ลึห ดอน บลาก.
9อึม นัมมูกซารา อี ดีงึณ กาเซา, แม เฌา อึบ โตต. ดอ แฮะ ซีลอย กาเซา มา อึม, แม เฌา นับ ดี โบง แตห อึณ วี เยน วี หนีม.
10อึณ บอ มึห มากราย อี จืร ราฮาบ อี กอย แคง อึม, แม เฌา บอ กาบัก แมง อัน แตห อัน ยัม. แม เฌา บอ แตห ปวน แม กาโฆห แป เฆ รันซู แม.
11บอ ฆางหราว บอ กาดาย มูห โตต โกรว แม เฌา. อึณ บอ มูห แม เฌา อี พาน เบลห บอ กาดาย บอ อี กอย แดง กาดาย ดอน โมยว.
12แม เฌา แฮะ พาน เบลห, แตห อึณ มึห นา เตต นา กัว. นอน ทาบอรา ฆาย นอน เฮราโมน แฮะ กอย ดาคึย. อึณ ปี เฆ ต็อห โหมว, อืบ แม เฌา.
13ปวน แม เฌา แฮะ ตาง กาเซา. แม มึห โปลม บอ แฮณ อี ตาง หลึอม โตต.
14แดง กาดาย ปี อึบ แม เฌา, แม โบง นา ซืร นา หมาน เซเซ. อึณ ปี อี หมาน อี หมึอม แฮะ แบน เจณ มาลาง โดง ตูต แม. แม บอ ฮาว นา เหมา, อึณ บอ ปี น็อห แม อี ร็อก กาเว เซเซ แฮะ แยต ดี อาต แม เฌา.
15เฆ อี ต็อห โหมว บอ อืบ แม เฌา บอ เฆ อี กอย แคง บลาง แม เฌา, เฆ ดี โบยว ดาคึย.
16โกบ แม เฌา เฆ แฮะ ดาคึย ดอน ซีแง. เฆ บอ อืบ แม เฌา โกบ มึห แม น็อห ซืร น็อห หมาน.
17แม เฌา แฮะ แตห เฆ มึห อาพูง เฆ แฮณ. โกบ ร็อก กาเว แม เฌา ดี เย, แม แตห เย กาโฆห ออง รันซู เย.
18แม เฌาพรา แฮะ ร็อห อี ดี ฆ็อง อี ดี แร เย. แม เฌาพรา อี บอด อี อึบ ดูอี อีซาเรลัะ, แม แฮะ ร็อห คูนดีคัม ดัว ดี เย.
19ดอ มึอน แม เฌา แฮะ ดึอม กาปลูห ดี เฆ ดูอี อี โดบ ซีคยา แม เฌา. แม แฮะ ต็อห ดี เฆ, “โอว แฮะ ดัว โปลม ดี ดูอี อี กยัะ ดี กาโฆห. โอว แฮะ มยูก กาโณม อู วี กาแต เฆ ดูอี กืน, แตห อัน นับ ดี กาโฆห.
20โอว แฮะ ยึร อาดาวีด. โอว บอ ดึห นามัน อี บอด, พ็อห แดง ฆีณ อัน, แตห อัน แบน คูนดีคัม.
21โอว ดี บอ กอย รึม โดบ อัน เซเซ. โอว ดี แตห โปลม แตห แฮณ ดี อัน.
22แคะ กอย เฆ รันซู อัน, อาว มึห อาเซ อี นับ ดี แป อัน. แคะ กอย เฆ ดูอี ฮาย มืร, อาว มึห อาเซ อี ปึอน ดี คาหนาบ อัน.
23โอว ดี มัห แคะ กอย เฆ รันซู อัน ตี อาต ตัห ฌัม เฆ โดง กอย อัน. โอว ดี ปยาต เฆ อี ฌ็อง อัน.
24โอว ดี ร็อก กาเว อัน เซเซ. โอว ดี แตห อัน กาโฆห ดี ดา ซึก บอ ออง เซเซ.
25โอว ดี บอ ปีว็อห มาน มืง อัน, แตห มืง ปี อึบ อัน จูห ดี อึม นัมมูกซารา, แตห อึณ กอ วี ฌัม ดี แบลง อึม อูพาราด.
26อัน ดี บอ ต็อห ดี โอว, ‘แม เฌาพรา, แม มูห ฆูณ โอว. แม เฌา, แม แฮะ ปี ดาอาง มาว โดง บึง โอว. แม เฌา บอ มูห อี คยอด โอว.’
27โอว ดี บอ แตห อัน ปี ฆอน ฆีณ. แตห อัน แบน คูนดีคัม ตาง หลึอม คูนดีคัม อี กอย แดง กาดาย นี.
28โอว ดี ร็อก อัน เซเซ. โอว ดี บอ โหลห โฆรห ปี กาแซณ โอว ดี อัน เซเซ, ตู แตห อึณ ลึร ดอ เหมา.
29โอว ดี แตห หลูกหลาน อัน แบน คูนดีคัม เซเซ, แตห อึณ เหลณ ปี ฆางหราว อี กอย เหลณ.
30มาแล, เซ เฆ หลูกหลาน อัน บอ แวน โฆรห ปี กาลาง โอว, เซ เฆ อาว ฮู โดบ อากยาม อางยาน ปี ต็อห โอว,
31เซ เฆ มืร ตู โรวเซ โฆรห ปี กาลาง โอว บอ ตู โบง โดบ ปี จัร โอว,
32โอว ดี บอ ดึห อึณเพียะ เรว, ซีเบรียะ เฆ. โอว ดี มาโนว เฆ ปาย ตี, แตห เฆ วี คัม หมาบ เฆ.
33โอว ยี ดี ร็อก อาดาวีด เซเซ. บอ นา หมาน นา หมึอม ปี โบง โอว ดี อัน, โอว ตู แตห อึณ ลึร.
34โอว มืร ตู โบง แตห โฆรห ปี กาแซณ โอว ลึร. โอว ตู วี บยอง โฆรห แปะ แฮะ ดึอม กาลาง โอว.
35โอว แฮะ ดืง กาแซณ ดี อาดาวีด อู เฌณ ตี, แตห อึณ บอ แบน เซเซ. โอว มืร ตู กาโลว อัน ดอ เหมา. โคว, โอว แฮะ บอด กาเซา.
36โอว แฮะ ต็อห, โอว ดี แตห หลูกหลาน อาดาวีด แบน คูนดีคัม เซเซ, แตห อึณ กอ เหลณ ปี ซีแง ดี กอย เหลณ แคง ฆางหราว.
37มืง อัน ดี กอย เซเซ, ปี มาเฆียน อี บลาง แคง เบลณ กอย เซเซ.” แคะ ตี แม เฌาพรา แฮะ กาลาง ดี เฆ อี กอย ดอ มึอน.
38มาแล, ดอ ตี นี แม เฌา แฮะ ฮอต วี รู ดี ดูอี ปี ร็อห แม ตี. แม แฮะ ฮอต เบลห แวน อัน.
39โฆรห ปี กาแซณ แม ดี แดเจณ แม, อึณ ปี, แม แฮะ ฮอต แตห อึณ ลึร. อึณ ปี แม เฌา แฮะ ฮอต แวน มังฆึม อัน, วี แณต แคง กาปูห.
40แม เฌา แฮะ ฮอต ปยาต โตต แรง มืง ตี. บอ โดง เครียง เฆ ดา ซึก อัน, แม แฮะ ฮอต ปยาต ลึร โตต.
41เฆ อี เฮา, อี ว็อะ ฮาว โคบ อัน, เฆ แฮะ ปรา โกรวกราม อัน. เฆ อี กอย กาตัด อัน บอ กาณัห อัน, แนนัะ อัน.
42แม เฌา แฮะ วี ควาง แตห เฆ รันซู อัน บอกาเฆลียด วี แป อัน, แตห เฆ วี โคย กาเซา.
43แม เฌา แฮะ โบง แตห บลา มาปัวะ ลาง อัน วึห โตต. แม ตู จอย อัน ดอ กาโฆห อัน ดี รันซู อัน.
44แม เฌา แฮะ โบง แตห อาพูง ซาเร อัน หราย โตต. อึณ บอ ปี แม เฌา แฮะ บยัว โจห มาลาง อัน แดง กาดาย.
45แม เฌา แฮะ โบง แตห อัน เจว กัด. แม แฮะ โบง แตห อัน กอ วี ซาย อี เฮา.
46อึย แม เฌาพรา, แม ดี โบง ฮาว ฌึร ตี เหลณ แคะ เหมา? แม ซี เครียง แม เซเซ ปาย ตี? น็อห รู แม อี กาฮัวะ ปี เงา, แม ซี อูน เซเซ?
47โอว หมาณ, แตห แม เฌา วี โหลห ลอง ตู โต็ง อาซาก โอว. ดูอี แปะ แฮะ พาน เบลห แม เฆ นี, อาว มึห ดีโคว.
48อาว มึห อาเซ อี ตู โลว ยัม. อาว มึห อาเซ อี ปึอน คยอด โดว บรีม อัน, แกวะ แตห อัน ฌัม มืง มารานัะ.
49อึย แม เฌาพรา, น็อห ร็อก ปี ดึอม ดัว แม ดี เย, อาว ฮู ปึอน ยึร. บอ กาดีก ซัดฌา ปี ดึอม ดัว แม ดี อาดาวีด, อึณ แหนน แม แฮะ วี ปีว โตต.
50แม เฌาพรา, โอว หมาณ, แตห แม เฌา วี โหลห แคะ คัม แดเจณ แม นี ปี แนนัะ อี เฮา. แตห แม เฌา โหลห บอ แปะ แฮะ กาย็อง เฆ ดูอี อาโมยว เฮา ดี โอว.
51เฆ รันซู แม เฌา แฮะ แนนัะ คูนดีคัม แปะ แฮะ ร็อห แม. อัน ฮาว นา เหมา มืร, เฆ บอ โดบ ดี กาลาง จาว อัน. แตห แม โหลห ฌึร ตี ดอน โมยว.
52แตห เอ อืบ เฌาพรา เซเซ. ซาตู ซาตู.
บับ อึณ พวน
© 2021, Wycliffe Bible Translator, Inc. All rights reserved.