อง 30
30
1อานี อึณ มูห โฆรห ปี กาลาง อากูรัะ อี มูห ฆอน อายาแก. อัน บยาน โฆรห เฌาพรา ต็อห, “อึย แม อาอีทีเอน บอ แม อาอูคัะ, น็อห โอว แฮะ นูน แฮะ ดีหลัห. โอว ฮู นับ ปี ดี ปาย นา อาต ฮาว.#30:1 แคง โฆรห แฮแบร อึณ ตู ลึห ซีคยา
2โอว แฮะ ปี โดว ซัดดาวา, แฮะ รึร หลึอม ดูอี เฮา.
3โอว มืร ตู ดึอม เฮน อางยาน, ตู นับ ลอง เฌาพรา อี ซีงา บอด.
4อาว มึห อาเซ อี แฮะ โฮะ ฆางหราว ปี วี โลง. อาว มึห อาเซ อี แฮะ ดึอม ปลัก คูน ตา แด อัน. อาว มึห อาเซ อี แฮะ ดึอม ดึห ฮึบ, กาบัน อึม นัมมูกซารา. อึณ มืร ตู มึห อาเซ อี แฮะ หมาย โคบ กาดาย. เซ แม ทาง แฮะ มึห, แตห โอว นับ จืร อัน. แตห โอว นับ อาเซ มูห ฆอน อัน.
5โฆรห ปี กาลาง เฌาพรา แฮะ หมาน. อัน เฌา บอ ฆ็อง แร ดอน อี อี บึง อัน.
6โฆรห เฌาพรา แฮะ ฆลึม. อาว โลว ปัว โฆรห ดูอี. โยว อัน ดัม หมาบ ดี แม, ต็อห แม มูห ดูอี ซีมา กาโลว.
7อึย แม เฌาพรา, ดอ มูห โจว โอว นี, โอว หมาณ อา โมยว ดี แม เฌา, แตห โอว ปึอน.
8โอว หมาณ, แกวะ แตห โอว กาลาง โฆรห ตู หมาน, โฆรห กาโลว. โอว บอ หมาณ, แกวะ แตห โอว ฆีน กาเซา, บอ แกวะ แตห โอว ครัม กาเซา. ดอน ซีแง ดอน ซีแง, แตห โอว มึห แคะ ปี โลว โฮม โลว ตา โอว.
9เซ โอว ฮี มึห กืน กาเซา, โยว โอว แวน แม เฌา วี ต็อห, เฌาพรา ตี, โอว ตู นับ. เซ โอว ฮี ฆีน กาเซา, โยว โอว วี แบน ดูอี ซีมา ปรา, โบง แกวะ แตห อี เฮา โรวเซ แม เฌาพรา.”
10แกวะ พยาก หมาย อี ดี กาณา อัน. โยว อัน ดืง แม, แตห แม ฌัม ดูก.
11อึณ บอ มึห ดูอี มัง อี อี นับ ดี ดืง, นับ ดี เอห ฆูณ เฆ, บอ ตู โบง นา หมึอม ดี มา เฆ.
12อึณ บอ มึห ดูอี อี ทาง แคง น็อห เฆ, เฆ แฮะ บอด. เฆ ยี ตู แวน หมาบ อี หมึอม กาอีห.
13อึณ บอ มึห ดูอี อี ปีคึก เฆ บอ ทาง, เฆ แฮะ บอด แฮะ หมึอม หลึอม อี เฮา.
14อึณ มึห ดูอี มัง อี, เฆ โบง นา จีจีว ดี ดูอี ฆีน เซเซ. เฆ ปี โดว ซัดดาวา อี มึห แปละ อี ลัม อี ปี อาตึม, แตห เฆ ปึอน ดี ก็อะ ยัม ดูอี ฆีน ตี, แกวะ แตห เฆ ซี มึห.
15อึณ บอ มึห มาบลีณ อี ดึก ดี อี บอ นา ปัน บอ นา อาต, อึณ ปี อัน บอ แดะ เซเซ ต็อห, “แตห ดี โอว, แตห ดี โอว.”
อึณ มึห โอย โมยว อี ตู นับ ดี แพ ดอ เหมา. อึณ บอ มึห พวน โมยว อี ตู นับ ดี ต็อห, “แฮะ จู.”
16โมยว ตี, อึณ บอ มูห มืง มารานัะ บอ อีบึณ หมัน, อี ตู นับ ดี มึห ฆอน บอ กาดาย อี ตู นับ ดี แพ อึม บอ เงา อี กาซึม ตู นับ ดี ยัด.
17ดูอี อี กาย็อง ฆูณ อัน บอ ลูกตาย ตู โรวเซ มา อัน, อึณ กาอาบ แตห มาลังดา โฮม ยัง อัน บอ มากาอัะ แปร โจะ เลห คอ งาย อัน.
18อี บลืง ดี น็อห โอว, ปี กาพา ตู เลห, อึณ มึห โอย โมยว. ปี ตู นับ โอว, อึณ บอ มึห พวน โมยว.
19อึณ มูห ปัน มาลังดา อี บึณ ฮาว แคง เบลณ บอ ปัน มาฮัณ อี หลัน ฮาว แดง มาว บอ ปัน รึร ซังโพว อี ฮาว กาแต อึม นัมมูกซารา บอ ปี ปาย กาโณม ดีบยา ดี ลาย ร็อก ลาย อึง.
20อีบึณ อี แฮะ มึห น็อห กืน, อัน นับ ดี โบง ปาย นี. อัน แฮะ ฮอต แตห อี ลาย อัน, อัน บอ ตา อึม วี ต็อห, “โอว ตู มึห ดี โบง ลูต มาเซ.”
21ลอง อี แตห กาดาย ดียูห ดีเยณ อึณ มึห โอย โมยว. อึณ บอ มึห พวน โมยว อี แตห กาดาย ตู ปึอน คัม.
22อึณ บอ มูห หมาย อี เฮา อี แฮะ วี ปึอน ดี แบน คูนดีคัม บอ ดูอี รึร, อี แฮะ ปึอน ดี โฮม แพ
23บอ อีบึณ อี หมึอม ฌ็อง, ยี วี นับ ดี ปึอน ดี คัด บอ อีบึณ อี มูห หมาย อี, ยี วี ปึอน ดี ปลูะ ยา กาณา อัน.
24แดง กาดาย นี, อึณ บอ มึห โดว ซัด พวน โมยว อี ดีแตด กาเซา. มาแล, เฆ ปี วี มึห อางยาน กืน กาเซา.
25อู โมยว บอ มูห มาปรูณ. เฆ ตู มึห โปลม เฆ แฮณ, เฆ ยี นับ ดี เหรต อูน ปี ดี โฮม เฆ อาคราว โซะ โหงว.
26ปอ อู โมยว มูห มายูน แปร. เฆ ตู มึห ปวน, เฆ ยี นับ ดี โบง โดง ดี กอย เฆ แคง ดัห มาว, แคง ดาอาง.
27ปอ อู โมยว มูห มา อาโฌ็ง. เฆ ตู มึห คูนดีคัม, เฆ ยี นับ ดี ตัห แบน พึง แบน พึง ปี ดา ซึก.
28ปอ อู โมยว มูห มาร็องกาง. ดูอี แฮะ ปึอน กาเนียม แคง แด เฆ, เฆ ยี ปึอน ลึบ กอย แคง โฮว คูนดีคัม.
29อึณ บอ มึห โอย โมยว อี โหมว ดี ฮาว แตห อึณ หมึอม ยอด. อึณ บอ มึห พวน โมยว อี นับ ดี ฮาว โดบ อึณเตณ แตห อึณ หมึอม งึอบ.
30ฌึร ตี บอ มูห มาครังซี. อัน มึห แฮณ หลึอม โดว ซัด ดอน โมยว. อัน มืร ตู ดึอม เตา อาเซ.
31อึณ มูห บอ อาโฆ็ง อี ปีพูง อัน บอ มาแป อาโล็ง บอ คูนดีคัม อี แยต ดา ซึก.#30:31 แคง โฆรห แฮแบร อึณ ตู ลึห ซีคยา
32เซ แม แฮะ ดึอม รึร, แฮะ ดึอม อืบ โดว บรีม แม, เซ แม แฮะ ดึอม คราม ดี โบง อี ตู บอด อี ตู หมึอม, แกวะ ฮู โบง ฌึร ตี. แตห แม จู.
33โคว, เซ แม กาวัร อึม ปู มัก, อึณ ดี แตห เบรียง อัน เลห. เซ แม ซีเนียะ ฆูงมูห, อึณ ดี แตห หนาม เลห. อึณ บอ ปาย ตี. เซ อี ลาย กาซูห แตห น็อห รู, อึณ ดี แบน กาเอห, กาแทณ.
© 2021, Wycliffe Bible Translator, Inc. All rights reserved.