อง 29
29
1เซ ดูอี ตู โทม ปี มาโนว อี เฮา แบน เฌณ แบน เฌณ, ยี ซี แนะ ดืร, อัน ดี กาดูห ดูก อู เฌณ. อึณ ปี อัน แฮะ กาบัก ลึร อาว ฮู ปึอน ซีนัม.
2เซ ดูอี อี มึห น็อห ซืร น็อห หมาน ปึอน ดี อึบ มืง, เฆ ดูอี บอกาเฆลียด บอ โคย. เซ ดูอี ฮาย ฮี วี อึบ, ดูอี บอกาเฆลียด ดี วี กลึร, วี หงูน.
3อาเซ อึง บอ ร็อก อางยาน, อัน แตห น็อห ฆูณ อัน โคย. อาเซ ยี โดบ ยา มาลัม, รึอน อัน ดี โตต ปีเยณ, กอ ฆีน.
4เซ คูนดีคัม โบง นา หมาน บอ โบง โดบ ดารา, มาน มืง อัน บอ กอย ซีคยา. เซ อัน ยี ปรา ดี ดึห ลักซอง, มาน มืง อัน ดี บอ ลึร.
5ดูอี อี โหมว ดี เกา ฆึก อัน, อึณ ปี อัน บลัห อูน อึณรับ โดง ดี ว็อะ อัน.
6ดูอี ฮาย, อัน ดี วี เคร ยอต ปี ดีณ อูน อัน. อี มูห ดูอี น็อห ซืร น็อห หมาน, อัน ดี บอ กอย ดาคึย ต็อห โหมว.
7อาเซ มึห น็อห ซืร น็อห หมาน, อัน นับ ดี ซูงพยาด อามู ดูอี ฆีน, แตห อึณ โดบ ดารา. ดูอี มืก ยี ตู ดึห อาเร เฆ, ตู แตห อึณ ลึบ แคง น็อห เฆ.
8เฆ ดูอี อี ลูกตาย อี เฮา, เฆ นับ ดี โบง แตห อึณ ซีนัน ซีนืง บอ มืง. อี มูห ดูอี อี มึห อางยาน, เฆ นับ ดี โบง แตห อึณ เยน ดาคึย.
9เซ ดูอี อี มึห อางยาน กาแทณ ดี ดูอี รึร, ดูอี รึร ตี ดี บอ ปีรู ปี วาณาก อัน, ตู จู, ตู แตห อึณ เยน.
10อาเซ ซี ง็อห อี เฮา, อัน บอ ฌ็อง ดูอี อี มึห น็อห บอด น็อห หมึอม. อี มูห ดูอี บอด, อัน ยี เหรต ดี จอย ดูอี อี มึห น็อห ซืร น็อห หมาน.
11ดูอี ดืร, อัน บอ นับ ดี บยัะ น็อห รู อัน, แตห อึณ ลึห ซีคยา. ดูอี อี มึห อางยาน, อัน ยี แป ดี โอด น็อห รู อัน.
12เซ คูนดีคัม โทม โฆรห กาโลว, อามู อามาด อัน ดอน อี วี แบน โตต ดูอี อี ซีมา กาโลว.
13ดูอี ฆีน ฆาย ดูอี อี คาหนาบ อี เฮา, ฆาย มูห อู โมยว. โคว, เฌาพรา แฮะ แตห ฆาย มึห งาย อี ปึอน ดี ยึร.
14เซ คูนดีคัม ซูงพยาด นา หมาน ดี ดูอี ฆีน, อัน ดี ปึอน ดี อึบ เหลณ.
15เซ แม มาโนว ฆอน ตา อึณเพียะ, อัน ดี มึห อางยาน กืน. เซ แม เบลห แคะ น็อห อัน, อัน ดี โบง แตห มา อัน หมึอม ซาย.
16เซ ดูอี ฮาย ฮี แบร กืน, บอ หมาบ ดี แบร กืน. มาแล, ดูอี อี มึห น็อห ซืร น็อห หมาน, เฆ ดี ยึร ดอ ชึม ดูอี ฮาย ตี.
17แตห แม มาโนว ฆอน อีมาย แม, อาว โลว น็อห แหม โกบ อัน. อัน ดี แตห บอ น็อห แม โคย ดาคึย.
18เซ อาว มึห โฆรห เฌาพรา, ดูอี ดี บอ โบง แคะ ปี อึง เฆ ดอน อี, ตู แตห มืง ดาคึย. เซ เฆ ยี โบง โดบ ดารา, เฆ ดี บอ โบยว ดาคึย.
19เซ แม ซี มาโนว หมาย แม, อาว ปึอน จู มี แคะ โฆรห. อัน ปี บอ แฮะ นับ มืร, อัน ตู ซี โทม.
20เซ แม มาโนว ดูอี รึร, อึณ ซี แกน หลึอม แม มาโนว ดูอี อี ครัน ดี กาลาง, อี ตู เฌณฌา ดี อาต.
21เซ แม เบลห แคะ ล็อะ น็อห หมาย แม ซีณ ดีแตด อัน, อู ซีแง อัน ดี บอ วี ดัว ดูก แบน โมยว แบน โมยว ดี แม.
22ดูอี อี เจว รู กาเซา, อัน บอ นับ ดี โบง แตห อี กาเอห กาแทณ. ดูอี กาฮ็อห บอ นับ ดี โบง หมาบ แบน โมยว แบน โมยว.
23เซ ดูอี ปีคึก อัน, อัน ดี วี โลว ซาย อี. เซ แม มึห น็อห เตียม, อี เฮา ดี วี โรวเซ อืบ แม.
24อาเซ จอย ดา ปรา, อัน ดี วี ฌ็อง โดว บรีม อัน. อัน ปี บอ ดืง ดี อาต ดา ตาง อี ซูงพยาด ดารา มืร, อัน ตู ปึอน กาลาง นา หมาน.
25อาเซ โยว ดูอี, อึณ ปี อัน เคร ยอต. มาแล, อาเซ หณึม บึง เฌาพรา, อาว โลว โยว มาเซ.
26ดูอี กืน ซี แตห คูนดีคัม เฆฌู เฆ. อึณ ยี มูห เฌาพรา อี แตห ดูอี ซูงพยาด นา มูห นา หมาน.
27ดูอี น็อห บอด น็อห หมึอม กาอีห ดูอี อี ซีมา กาโลว. ดูอี ตู หมึอม มืร, อัน กาอีห ดูอี น็อห บอด น็อห หมึอม.
© 2021, Wycliffe Bible Translator, Inc. All rights reserved.