อง 31
31
โฆรห อางยาน ปี กาลาง คูนดีคัม
1โฆรห นี มูห โฆรห คูนดีคัม อาเลมูลัะ. อึณ บอ มูห ปี มาโนว ดัว มา อัน ดี อัน.
2มา อัน แฮะ ต็อห, “อึย ฆอน โอว, แม มูห ฆอน อาราง ปี ร็อก โอว. แม มูห ฆอน ปี ซาคึร ปี หมาณ โอว.
3แกวะ ปีชึม แฮณ แม ดี อีบึณ กืน, แกวะ ลาย เฆ อีบึณ อี นับ ดี ปยาต คูนดีคัม.
4อึย อาเลมูลัะ แตห แม โทม. คูนดีคัม อาว กาอาบ เดียง อึม มางูน. ดา กาณา อี อึบ มืง, อาว กาอาบ เดียง ป็อห อี ปราง กาเซา.
5เฆ ฮี ฮอต เดียง, โยว เฆ ปีว โฆรห ดารา. โยว เฆ ซูงพยาด อามู เฆ ดูอี ฆีน, ตู โดบ ดารา.
6แตห แม ดัว อึม ป็อห ดี ดูอี อี แฮะ รีน ดี ยัม บอ ดี ดูอี อี มึห น็อห ลึร น็อห กลึร.
7แตห เฆ เดียง, แกวะ ฮู แตห เฆ โหลห ดูก เฆ. แตห เฆ ปีว ลอง ฆีน ลอง พลาน เฆ.
8แตห แม กอย บลาก ดูอี อี ตู นับ ดี กาลาง ลอง โดว เฆ. แตห แม จอย เฆ กาลาง. แตห แม จอย บอ เฆ อี ตู มึห โดง ดี บึง.
9แตห แม จอย เฆ กาลาง, ซูงพยาด ซืร ซืร หมาน หมาน อามู เฆ, บัร อาเร เฆ อี ฆีน บอ เฆ อี ตู มึห มาเซ.”
ลอง อีบึณ อี หมึอม
10เซ เอ เหรต อีบึณ อี หมึอม, อึณ บอ หณาบ ดี กาตูณ. อีบึณ ฌึร ตี, อัน บอ ง็อห ตาง หลึอม แซณ อี แฮะ ง็อห ตาง กาเซา.
11อีมาย อัน บอ หณึม น็อห อีบึณ ตี. อัน มืร ตู ชึม ดอ เหมา.
12อีบึณ ตี มืร ตู ปยาต ปี โบง อีมาย อัน อี ดี แบน อาฆยึร. อัน บอ โบง นา บอด นา หมึอม บอ โจว อัน.
13อัน บอ นับ ดี เหรต ฮึก มาบู บอ กาตัม ลูย. อัน บอ โฆยวฆยา ดี ด็อะ, แตห อึณ แบน ครึง ตา.
14อัน นับ ดี ดึห ตัห ปี ดี โฮม ดี ฆอน อัน. อัน ปี ดูอี อี กาจึห กาย็อง, อี แฮะ ตัห โต็ง.
15อัน ยีต ซีณ ซีณวัห อาต บลาง แปร, บอ แรน ปี ดี โฮม อาดา อึณโฮม อัน. อัน บอ จัร เฆ หมาย อีบึณ, แตห เฆ นับ ปี ดี โลว โบง เฆ ดอน อี.
16อัน บอ นับ ดี ยอด ซีคยา โดง นา. แฮะ ฮอต, อัน มืร จึห. อัน บอ ดึห รึอน แปะ แฮะ ปึอน อัน, วี โบง มาน มางูน.
17อัน มืร ตู กราน ดอ เหมา. อัน โฆยวฆยา ดี โบง ฆาน แคะ ปึอน อัน โบง.
18ปี ดี จึห ปี ดี ย็อง อัน, อัน นับ ดี โบง แตห อึณ มึห อามยาด อัน. แคง หมึร อัน บอ โบง ฆาน, ราง เงา ออม.
19แด อัน มืร ตู มึห ดอ โลย, อัน บอ บัด เซณ, แตห อัน ปึอน ดี ด็อะ แบน ครึง.
20อัน บอ มึห น็อห ฮาง ดี เฆ อี เอต อี ฆีน. อัน นับ ดี ดัว ดี เฆ อี ตู มึห มาเซ.
21อึม ดาด ปี บอ โจห, อัน มืร ตู โยว. โคว, ดูอี แคง อึณโฮม อัน ดอน อี แฮะ ฮอต มึห ครึง ซีอูณ.
22อัน บอ นับ ดี ด็อะ ฮึบ อี ปลึก ดอ อีด. อัน บอ ตา ครึง อี ชีด กาเซา.
23อีมาย อัน มืร มึห ซาเร บอ ตูต รึม โดบ เฆ ดา ตาง แคง มืง.
24อัน บอ นับ ดี จีณ ครึง, บอ โบง แซะ, ย็อง ดี เฆ ดา กาณา โกรว.
25อัน บอ มึห โปลม มึห แฮณ, บอ แบน ปี โรวเซ อี เฮา. เซ อัน เฌณฌา ลอง นา อาต อึณ ดี ปาย เหมา, อัน มืร ตู มึห ดี โลว โยว มาเซ.
26อัน บอ นับ ดี กาลาง โฆรห อี มึห อางยาน บอ มาโนว อี เซเซ, แตห อึณ หงึย โดบ.
27อัน บอ นับ ดี ยอด แมน ดูอี แคง อึณโฮม อัน. อัน มืร ตู กราน ดอ เหมา.
28แคะ กอย เฆ ฆอน อัน, เฆ บอ นับ ซีคยา ปี ปาย ฆูง เฆฌู อาฆยึร อัน. อีมาย อัน มืร อืบ มยูก อัน ต็อห,
29“อีบึณ อี เฮา แฮะ กืน, แฮะ มูห อีบึณ บอด, อีบึณ หมึอม. มาแล, แม นี, แม แฮะ หมึอม หลึอม เฆ บอกาเฆลียด.”
30เซ แม ยอด ดี อารึบ อีบึณ, แม มืร ตู นับ โยว น็อห อัน แฮะ หมึอม ตู หมึอม. เซ แม ยอด ชีด อัน, อาว เหลณ อึณ ดี หราย. เซ แม ยี มึห อีบึณ อี โรวเซ เฌาพรา, แฮะ กาอาบ อืบ อัน.
31แตห แม ดัว ดี อัน แคะ กาดาน อาฆยึร ปี โบง อัน. แตห บอ อี เฮา ดอน อี โรวเซ อัน.
© 2021, Wycliffe Bible Translator, Inc. All rights reserved.