มท 24

ลอง อาคราว ดี โตต ฌาด นี

1วาย อัน ตี เฌา เยซู วี เลห แคง แวง โฮว เฌาพรา. ดอ ฮาว อัน ปอ อู โปละ, เฆ ดีแบ อัน วี ตัห ดี อัน, แตห อัน ยอด โฮว แบน โมยว แบน โมยว อี กอย โรบ โฮว เฌาพรา. 2เฌา เยซู วี ต็อห, “แฮะ มูห, โฮว แบน โมยว แบน โมยว ปี ซัม เฆ, แฮะ ตาง บอ ชีด. โอว ยี ต็อห อาคัร ดี เบ, อึณ ดี ลึร โตต. มาว เฆ นี, เฆ ดี ปยาต แวน โตต. มาว อู โบ็ง มืร อาว ฮู วี กอย โดง กอย บรีม อัน.”

3วาย อัน ตี เฌา เยซู วี ฮาว ฌัม แดง นอน เฮ นามัน. ดอ กอย อัน ดี นอน ตี, เฆ ดีแบ อัน วี ตัห กาลาง โฆรห ดี อัน ดอ ตู มึห อี เฮา โทม. เฆ ต็อห, “แตห แม กาลาง ดี เย, ปัน เหมา เฆ ดี โบง แตห โฮว เฌาพรา กาปยาต ลึร? ลักซานา ปาย เหมา อี แตห เย นับ ลอง อาคราว ดี วี ตัห โลง แม แดง กาดาย นี บอ ลอง แฮะ กาตัด ดี ฌัม ปัน ดี โตต ฌาด นี?”

4เฌา เยซู วี ต็อห, “เบ โลว ซาดีก, แกวะ แตห อี ปึอน ดี กาโลว เบ. 5อึณ ดี มึห แบน วี แบน วี, เฆ ดี ตัห ฆาว ปวน โอว. เฆ ดี บอ ต็อห, ‘โอว แฮะ มูห อัน เฌา ปี ร็อห ปี ตึย เฌาพรา แตห อัน คยอด ดูอี.’ ปาย ตี เฆ ดูอี กืน ดี กาลึบ ดี หณึม โฆรห ปี กาโลว เฆ. 6เบ ดี บอ ยึร ซาดาง แบน โมยว แบน โมยว ลอง เฆ ดูอี ลาย กาโฆห, บอ ลอง เฆ ดูอี อี ต็อห ดี กาโฆห ดี อี เฮา. ดอ อัน ตี เบ ยี โลว ซาดีก, แกวะ แตห เบ โยว. อึณ ดี บอ แบน ฌึร ตี ดอน โมยว, ยี หณัม ฌัม อาคราว ดี โตต ฌาด นี. 7อึณ ดี มึห อาโมยว ดูอี อู โมยว, ดี วี แบน รันซู เฆ ดูอี ปอ อู โมยว. บอ คูนดีคัม อู กาดัง ดี วี กาโฆห ดี คูนดีคัม ปอ อู กาดัง. ดอ อัน ตี อึณ ดี บอ มึห ดูอี แบน โปละ แบน โปละ, เฆ ดี เอต ปี ดี โฮม. บอ มาอีม ดีเยณ แบน โปละ แบน โปละ. 8เซ ดูอี กาดูห ดูก ฌึร ตี ดอน โมยว, อึณ บอ ปี อีบึณ อี มึห เซา ดี ฆึอด ฆอน.

9อาคราว ดอ อัน ตี เฆ ดี บอ เหมต เบ, อาบ เบ ดี ดา ตาง, แตห บอ เบ คัม ดูก แบน โมยว แบน โมยว, แตห เฆ ง็อห ยัม บอ เบ. โกบ หณึม เบ ดี โอว, เฆ ดูอี ดอน โมยว ดี บอ ฌ็อง เบ. 10ปัน ดี ฌัม อาคราว อัน ตี, อึณ ดี มึห ดูอี อี หณึม โอว, เฆ กืน ดี บอ แวน โอว, ตู คัม ดูก ฌึร ตี. เฆ ดูอี ตี, เฆ ดี ลาย รู, ดี ลาย พยาก ดี อาต ดา ตาง. 11อึณ ดี บอ มึห ดูอี กืน, เฆ ดี กาโลว ดี ต็อห, เฆ มูห ดูอี อี บยาน โฆรห เฌาพรา. บอ ดูอี กืน กาลึบ ดี หณึม เฆ. 12เฆ ดูอี ฮาย เฆ แว กืน หลึอม คา อาต. โคว, เฆ ดูอี อาว ฮู นับ ดี ลาย ร็อก ปี คา อาต. 13อาเซ ยี มึห น็อห มัน บอ คัม โตต ดอน โมยว, แตห ฌาด ตี กอ โตต, เฌาพรา ดี คยอด อาซาก อัน. 14เฆ ดูอี ตี ดี กาลาง ลอง เฌาพรา ดี อึบ กาดาย, แตห ดูอี แบน น็อห ดาคึย, แตห ดอน อี แดง กาดาย ปึอน ดี โทม. เซ ดูอี ดอน โมยว ฮี นับ ลอง อัน ตี, ฌาด นี ดี โตต.

15อึณ ดี บอ มึห โกรว อี หมึอม โยว, อี แตห โตต ดอน โมยว กาปยาต ลึร. เซ เบ ยึร อี เบลห โกรว ตี แคง โดง บอด, เบ โลว เตา ฮาว ปอ โปละ.” ดูอี อี บยาน โฆรห เฌาพรา อี จืร อาดาเนลัะ, อี กอย ดอ มึอน, อัน แฮะ ดึอม แดม ลอง อัน ตี ต็อห, “อาเซ ตีห ลอง อัน ตี โลว ซาดีก, แตห ลอง ดาง อัน ลึห.” 16เฌา เยซู ต็อห, “เซ เบ ยึร โกรว ตี, เบ อี กอย แคง อืง ยูดา โลว เตา ฮาว แดง นอน. 17เซ ดูอี กอย นา แดง กาง อัน,#24:17 ดอ มึอน กาง แคง มืง อีซาเรลัะ อาว มึห โก็ง. อึณ ฆลัง. บอ มึห อึณแตง อี ปึอน โฮะ. เซ อัน โลง, แกวะ แตห อัน วี ลึบ แคง กาง, ดึห โกรว อัน อี กอย แคง กาง. แตห อัน เตา ฮาว อู เฌณ. 18อาเซ กอย แคง มาน, แกวะ แตห อัน เวณ แคง กาง อัน, ดึห ซีโตว อัน. 19เซ อึณ มึห อีบึณ อี ตู อัห บอ อีบึณ อี มึห ฆอน อางัะ อี ซี ปู ดี มา อัน, เฆ ดี กาดูห ดูก ตาง. 20เบ ยี โลว ซาคึร, แกวะ แตห ดูก ตาง ฌึร ตี ตัห ดอ มูห อาคราว ฆัด เฆียด, แกวะ แตห อึณ มูห ซีแง ดีเหลา. 21อู ซีณ ดอ โฆว อัน, ดอ โบง เบลห เฌาพรา กาดาย กอ ฌัม อาตึร, อึณ ตู ดึอม มึห ดูก ตาง ฌึร ตี แดง กาดาย นี. ฮี ฮอต วาย อัน ตี อึณ มืร ตู วี มึห ดูก ฌึร ตี ดอ เหมา. 22เซ เฌาพรา ตู แตห ดูก ฌึร ตี วี เจว ฮอต, อึณ ตู วี มึห อาเซ อี ดี ลอด ยัม. โกบ มึห เฆ ดูอี ปี ร็อห เฌาพรา, เฌาพรา ตู แตห ดูก ตาง ตี กอย เหลณ. 23ดอ อัน ตี เซ อึณ มึห ดูอี อี ต็อห ดี เบ, ‘ยอด นา นี, อัน เฌา ปี ร็อห ปี ตึย เฌาพรา แตห อัน คยอด ดูอี แฮะ กอย ดี นี,’ เบ แกวะ หณึม โฆรห ตี. เซ เฆ บอ ต็อห, ‘อัน เฌา กอย นา ดอย,’ แกวะ หณึม โฆรห ตี. 24อึณ ดี มึห ดูอี, เฆ กาโลว ดี ต็อห, เฆ มูห ดูอี ดี คยอด อาซาก อี. เฆ ดี บอ กาโลว ดี ต็อห, เฆ มูห ดูอี อี บยาน โฆรห เฌาพรา. เฆ ดี บอ โบง นา หมึอม อาม กาเซา แบน โมยว แบน โมยว. เฆ บอ เทว ดี กาโลว ดี เฆ ดูอี ปี ร็อห เฌาพรา. เฆ ยี ตู แป ดี โบง แตห เฆ หณึม โฆรห ปี กาโลว เฆ ตี. 25เซ อึณ ฮี ฌัม อาคราว ปี ต็อห โอว ตี, เบ ดี บอ นับ, โกบ แฮะ ฮอต แค โอว ดี เบ ลอง อัน ตี.

26โคว อัน ตี เซ อึณ ดี มึห ดูอี อี ต็อห, ‘อัน เฌา อี คยอด เอ, อัน แฮะ ตัห กอย แคง แปร กาฮ็อห,’ เบ แกวะ ฮาว ยอด. เซ อึณ บอ มึห ดูอี ต็อห, ‘อัน เฌา แฮะ ตัห กอย แคง กาง, แคง โฮง อีด,’ แกวะ หณึม โฆรห ตี. 27เซ โอว อี แฮะ แบน ฆอน ดูอี ดี วี ตัห โลง แดง กาดาย นี, อึณ ดี ปี ปลัะ อึณเปลต, อี ตัห นา เลห ซีแง, วี ฮาว ฌัม นา เฆต ซีแง, แตห อี ยึร ซีคยา. 28อึณ บอ ปี ดูอี อี ยึร มาลังดา. เฆ แฮะ นับ, เซ อึณ มึห โดว อี ยัม ดี เหมา, เฆ มาลังดา ดี ตัห กาฌูะ โดง ตี, โฮม.

29เซ เฆ ดูอี แดง กาดาย ฮี ฮอต ฌัม ดูก ตาง ตี, อู เฌณ อึณ ดี บอ แบน ปี ดึอม กาลาง ดูอี อี บยาน โฆรห เฌาพรา อี แฮะ ต็อห, ‘ซีแง ดี อับ ว็อง. บอ มาเฆียน อาว ฮู มึห บลาง อัน. บอ ซีมัณ ดี รัห โจห แคง เบลณ. บอ ปวน อี แตห ซีมัณ กอย แคง เบลณ อาว ฮู ปี บรีม. โคว, อึณ ดียูห ดี เยณ โตต.’

30ดอ อัน ตี โอว อี แฮะ แบน ฆอน ดูอี, โอว ดี กาปลูห แคง เบลณ. เฆ ดูอี อี กอย แดง กาดาย ดอน โมยว, เฆ ดี แบน น็อห กลึร. เฆ ดี บอ ยึร โอว อี แฮะ แบน ฆอน ดูอี, ดอ กอย โอว แคง อึณอูะ, วี ตัห โลง แดง กาดาย. เฆ ดี บอ ยึร ปวน บอ อาพูง ดังโคว โอว อี ตาง กาเซา. 31โอว ดี บอ ตึย อามู อามาด โอว, แตห เฆ บูด เวา นึง มาแป, แตห อึณ ฮัม ตาง, แตห เฆ แดะ ดูอี ปี ร็อห เฌาพรา, แตห เฆ ตัห ดอน นา ดอน โปละ พวน บลาก นา โต็ง ซืด แดง กาดาย บอ นา โต็ง ซืด แคง ฆางหราว, แตห เฆ ตัห กาฌูะ โดง กอย โอว.

32แตห เบ ยอด เฮ ดีปู, แตห อึณ แบน อูพามา ดี เบ, แตห เบ เฮน ดี อัน. เซ เบ ยึร เฮ ดีปู ดี อึณโลห, เบ บอ นับ, ฆลาย ดี ตัห. 33อึณ บอ ปาย ตี. เซ เบ ยึร อึณ แฮะ แบน ปี ต็อห โอว, เบ บอ นับ, โอว แฮะ กาตัด ดี วี ตัห. อึณ ปี, โอว แฮะ กอย ดี อาต มาโลห. 34โอว ต็อห อาคัร ดี เบ. ฌาด นี ตู โตต อาต ดี แบน โตต ดอน โมยว ปี ต็อห โอว ดี เบ ดอ ตี นี. 35บอ เบลณ บอ กาดาย ดี หราย โตต. โฆรห ปี กาลาง โอว ยี ตู หราย ดอ เหมา. อึณ ดี กอย เซเซ.

36ปัน ดี วี ตัห โอว, อาว มึห ดูอี อี นับ ซีคยา ลอง ซีแง อัน, นารี อัน. บอ เฆ อามู อามาด เฌาพรา อี กอย ฆางหราว, บอ ฆอน เฌาพรา มืร ตู นับ. มี เฌาพรา อี นับ ดอ เหมา อึณ ดี แบน ปี ต็อห โอว. 37เซ โอว อี แฮะ แบน ฆอน ดูอี ดี วี ตัห โลง แดง กาดาย, อึณ ปี ดอ มูห ฌาด ดา อาโนว ดอ มึอน ตึอน. 38โคว, ดอ มูห ฌาด อาโนว ตึอน, อาต มึห อึม ตาง อี อึณปูน กาดาย, เฆ ดูอี โฮม ดาคึย. เฆ บอ ลาย ลาย, ลาย คัด, แตห อึณ กอ ฌัม ซีแง ดอ ลึบ อาโนว แคง รึร ซังโพว ตาง ตึอน. 39เฆ มืร ตู นับ, อึณ ดี ปาย เหมา. ดอ ตัห อึม, อึณปูน กาดาย, เฆ บอ ยัม อู เฌณ. ปัน ดี วี ตัห โลง โอว, อี แฮะ แบน ฆอน ดูอี แดง กาดาย นี, อึณ ดี บอ ปาย ตี. เฆ ดูอี มืร ดี ฌัม ดูก อู เฌณ. 40ดอ อัน ตี อึณ ดี มึห ดูอี อา วี โบง มาน. เฌาพรา ดี แตห อู วี โฮะ ฆางหราว. ปอ อู วี ยี กอย นา ปัน. 41อึณ ดี บอ มึห อีบึณ อา วี อี กอย อู โปละ, กรีด คามูน. เฌาพรา ดี ดึห อู วี, วี อูน ปอ อู วี.

42โคว อัน ตี เบ โลว บัร ซาดีก เซเซ, โกบ ตู นับ เบ ดอ เหมา อัน เฌา ดี ตัห. 43แตห เบ นับ ซีคยา. เซ อึณ มึห ดา กาณา กาง, เซ อัน นับ อาคราว ดี ตัห ดา ปรา ลึบ กาง อัน, อัน ดี บอ แคร ดา ปรา, ตู แตห ดา ปรา ปึอน ดี ลึบ ปรา แคง กาง อัน. 44ปาย ตี, บอ เบ โลว บัร เซเซ. โคว, บอ โอว อี แฮะ แบน ฆอน ดูอี, โอว ดี วี ตัห อาคราว ปี ตู ทาง เบ.

45โคว, เซ อึณ มึห ดา กาณา อู วี, อัน ต็อห ดี ฮาว ปอ อู โปละ, อัน แฮะ จัร แดเจณ อัน อู วี ยอด แมน เฆ แดเจณ อัน ดอน วี, เซ อัน ดัว ปี ดี โฮม ดี เฆ ดอ โลว เฆ ปี ดี โฮม, แดเจณ ตี แฮะ โบง นา หมาน, นา หมึอม. 46เซ ดา กาณา อัน วี ตัห, วี ยึร อัน โบง ซีคยา ปี โลว โบง อัน, อึณ ดี แบน นา หมึอม ดี อัน. 47โอว ต็อห อาคัร ดี เบ, ดา กาณา อัน ดี วี แตห แดเจณ ตี อึบ โตต โกรวกราม อัน. 48เซ แดเจณ ตึอน ยี ตู หมึอม. เซ อัน ต็อห, ‘โอว แฮะ นับ, ดา กาณา โอว ดี กอย เหลณ, หณัม หงึย ดี วี ตัห ฌัม ดี นี,’ 49แฮะ ฮอต อัน ดี บอ มัห ฆึก อัน อี มูห แดเจณ ปี อัน. อัน บอ โฮม ตาง, เดียง ป็อห, กอย รึม โดบ ฆึก อัน อี ตู หมึอม. 50ปัน ตี ดา กาณา ดี ตัห ดอ ตู ทาง อัน. อึณ ดี บอ มูห อาคราว ตู หน็อะ อึณด็อะ อัน ดี ตัห. 51ดอ อัน ตี ดา กาณา ตึอน ดี บอ ง็อห อาซาก อัน, แดบ โดว อัน แตห อึณ กาปยาต บอ คร็อง อูน อัน โดง กอย เฆ ดูอี อี ณึงราง ปีหมึอม เฆ. โดง ตี ดอน อี ดี บอ ยาม ตาง. กูงกาบ เฆ บอ กาดอย โกบ โยว เฆ.” แคะ ตี เฌา เยซู กาลาง ดี ดีแบ อัน ลอง อาคราว ดี โตต ฌาด นี.

Currently Selected:

มท 24: pce

Highlight

Copy