มท 23

ลอง เฆ ดูอี อี ดี ฌัม ดูก ตาง

1เฌา เยซู วี กาลาง โฆรห ดี ดูอี กืน บอ ดี เฆ ดีแบ อัน. อัน ต็อห, 2“เฆ ดา ซารา อี มาโนว ดารา ยูดา บอ เฆ ดูอี แคง พึง พารีแซ, เฆ แฮะ ฆาว ปวน ดา ซารา อาโมวแซ, วี มาโนว ดารา ปี ดัว อัน ดี เบ. 3โคว, เบ โลว โทม โฆรห เฆ, โบง แคะ ปี จัร เฆ. เบ ยี ตู โลว ณึง ปี โบง เฆ. โคว, เฆ มืร ตู โบง โดบ ปี มาโนว เฆ. 4โฆรห ปี กาลาง เฆ, อึณ ปี เฆ แตห อี เฮา ปัห โกรว จัน กาเซา. เฆ ยี ตู จอย มาเซ, แตห อี ปึอน ดี ปัห แคะ ปี ดัว เฆ อี ปัห. กานู เฆ อู โบ็ง มืร เฆ ตู โจะ, ตู คัม ดี จอย.

5แคะ ปี โบง เฆ, เฆ โบง แตห อี เฮา ยึร ลอง โดบ เฆ ดารา. ดอน อี แดม โฆรห เฌาพรา มัง โดว แดง เฌ, ฮับ แคง ฌีดืก ดีแตด ปัก ดึก ดี กาต็อห. เฆ ยี โบง ฌีดืก ตี, แตห อึณ ตาง หลึอม ฌีดืก อี เฮา, แตห อี เฮา ยึร เฆ บอด. ดอน อี บอ มึห อึณปลาย อี ดึก ดี ครึง ปี ตา เฆ, แตห เฆ โหลห เฌาพรา เซเซ. เฆ ยี โบง แตห อึณปลาย ตี วี ตาง หลึอม อึณปลาย โมยว เฮา, แตห อี ปึอน ยึร. 6เซ เฆ บอ ลึบ บลอย อี เฮา, เซ เฆ บอ ลึบ แคง โฌง ยูดา, เฆ บอ อึง ดี กอย โดง จา. 7เซ เฆ วีน ดีแล แคง กาลัห, เฆ อึง, เซ ดูอี กรึบ เฆ. เฆ บอ อึง, เซ อี โรวเซ เฆ ต็อห, ‘ซารา’ ดี เฆ.#23:7 เซ ดูอี อีซาเรลัะ ต็อห ซารา ดี ดูอี อู วี, เฆ โรวเซ บอ โฆม อัน บอ โทม โตต แคะ ปี จัร อัน เฆ โบง.

8เซ อึณ มูห เบ, แกวะ คัม แตห อี อืบ มยูก เบ. โคว, เบ มึห ดา กาณา อู กาดัง อี อึบ เบ. เบ ดอน อี ยี แบน บีนอง. 9แกวะ โรวเซ อี เฮา, ต็อห, ‘แม ปี ฆูณ โอว.’ แตห เบ โรวเซ มี เฌาพรา, อี ปี ฆูณ เบ, อี กอย ฆางหราว. 10แกวะ แตห อาเซ แดะ เบ ต็อห, ‘แม มูห ดา ซารา บอด.’ เบ มึห ซารา บอด อู วี. วี ตี มูห ดูอี ปี ร็อห ปี ตึย เฌาพรา แตห อัน คยอด เบ. 11กาแต เบ, อาเซ แยต อี, อัน ดี วี แบน หมาย อี. 12โคว, เซ ดูอี ปีคึก อัน, เฆ อี เฮา ดี ต็อห, อัน อาว อัห. เฆ ตู โรวเซ อัน. เซ ดูอี ยี ตู ปีคึก อัน, เซ อัน แบน ปี วา ดอน อี, เฆ อี เฮา ดี โรวเซ อัน.

13เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี ณึงราง บอด. เบ ดี ฌัม ดูก ตาง. โคว, ปี โบง เบ อึณ ปี เบ กาบีด มาโลห ดี ลึบ แคง มืง ปี อึบ เฌาพรา. เบ แคร ดูอี ลึบ. โกบ ตู ลึบ เบ, เบ บอ แคร บอ เฆ อี แฮะ ซี ลึบ. 14เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี ณึงราง บอด. เบ ดี ฌัม ดูก ตาง. โคว, เบ บอ หล็อก ดี กาลาง โฆรห, แตห เบ ปึอน กาง เฆ ยา ซีปรัห. เบ บอ ณึงราง ดี ซาคึร เหลณ, แตห ดูอี ยึร เบ. เบ อี โบง ปาย ตี, เบ ดี โลว คัม หมาบ เบ หลึอม อี เฮา.#23:14 บับ ดอ โฆว มัง โมยว อาว มึห กาบัก นี

15เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี ณึงราง บอด. เบ ดี ฌัม ดูก ตาง. โคว, เบ นับ ดี ฮาว ดอน นา ดอน โปละ, เหรต ดูอี อู วี อี ซี โดบ เบ โบง โดบ ดารา. เซ เบ แฮะ กาตูณ อู วี อี ซี โดบ เบ ปาย ตี, อึณ มูห เบ อี โบง แตห อัน โจห กาโละ งาราย รึม โดบ เบ, แตห อัน วี คัม ดูก ตาง หลึอม เบ.

16เบ ดา ซารา อี ตู นับ ซีคยา ลอง เฌาพรา, เบ ปี ดูอี งาย อับ, ยี แยต อี เฮา. เบ ดี ฌัม ดูก ตาง. โคว, เบ บอ มาโนว ลอง คัม กาซัม ดืง. เซ อี ต็อห, ‘โอว แฮะ คัม, เซ โอว ฮี บอ กาโลว, แตห โฮว เฌาพรา กาปยาต,’ ปี คัม อัน ตี อาว มึห ดีโคว. เบ บอ มาโนว อี ดืง ต็อห, ‘เซ โอว ฮี บอ กาโลว, แตห ครีว อี กอย แคง โฮว เฌาพรา บยอง แบน อี ว็อง.’ เบ ต็อห, เซ ดูอี ดืง ปาย ตี, อึณ มึห ดีโคว. อัน โลว คัม โตต ปี ดืง ฌึร ตี. 17โอว ยี ต็อห, เบ รึร. เบ ปี ดูอี งาย อับ, บอ ตู มึห อางยาน. เบ โลว เฌณฌา ลอง โฮว เฌาพรา ฆาย ครีว อี กอย แคง โฮว เฌาพรา. ครีว อาเร อาว ตาง ปี โฮว ตึอน. อึณ มูห โฮว เฌาพรา อี แตห ครีว อี กอย แคง โฮว ตี แบน โกรว อี ซีงา บอด. 18เบ บอ มาโนว ลอง กาซัม ดืง, เซ อี ต็อห, ‘โอว แฮะ คัม, เซ โอว ฮี บอ กาโลว, แตห กาโช็ง หลู ดี เฌาพรา กาปยาต,’ ปี ดืง ฌึร ตี อาว มึห ดีโคว. เบ บอ มาโนว อี ดืง ต็อห, ‘โอว แฮะ ฮอต เบลห ปี ดี หลู โอว แดง กาโช็ง หลู. โคว, โฆรห โอว แฮะ หมาน, ปี ดืง ฌึร ตี, โลว คัม. อาว ปึอน กาโลว.’ 19บอ อาตี บยัะ ซีคยา, เบ ปี ดูอี งาย อับ. เซ อึณ มูห ปี ดี หลู อี กอย แดง กาโช็ง หลู, อึณ มูห กาโช็ง ตี, อี แตห ปี ดี หลู ตี แบน โกรว อี ซีงา บอด. 20โคว, เซ เบ ดืง ต็อห มาเซ ลอง กาโช็ง หลู, อึณ บอ บาะ โกรว อี กอย นา แดง. 21บอ ปาย ตี, อาเซ ดืง ต็อห มาเซ ลอง โฮว เฌาพรา, อึณ บอ บาะ อัน เฌา อี กอย แคง โฮว เฌาพรา. 22อาเซ ยี ดืง ต็อห มาเซ ลอง ฆางหราว, อัน บอ กาลาง ลอง มาลาง อี มูห โดง กอย เฌาพรา. โคว, อึณ บอ บาะ เฌาพรา อี กอย แคง ฆางหราว แดง มาลาง ตึอน. อาว ปึอน กาย็อห โฆรห, แตห อึณ ปี ปี แค เบ.

23เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี ณึงราง บอด. เบ ดี ฌัม ดูก ตาง. เบ โฆยวฆยา ดี ดึห เดา หลึง เฆ หมี แบน โมยว แบน โมยว, หลู ฆึร บูน อู บูน. เบ ยี ตู คัด น็อห ดี โดบ อี มูห ดารา อี อาเร ตาง. เบ ตู ซูงพยาด นา หมาน. เบ ตู กาเว ดูอี. เบ มืร ตู โบง นา หมาน เซเซ. เบ โลว โฆยวฆยา ดี โบง อี มึห ดีโคว, อี มึห อาเร ตาง, ยี ตู ปีว ดี ดัว ฆึร บูน อู บูน. 24แฮะ หมาน, เบ ปี ดูอี งาย อับ, ยี แยต อี. เบ ปี ดูอี อี ซาดีก ดี ทารอง อึม, โยว เบ แมง มาวัะ ดีแตด. เบ ยี นับ ดี แมง มามัก บอ โดว, วี ต็อห, ตู โลว ซาดีก.

25เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี อี ณึงราง บอด. เบ ดี ฌัม ดูก ตาง. โคว, เบ ปี ดูอี อี ดึห ซีลัยะ เฆ พาน, บาย มี นา เรต, แตห อัน ชีด. เบ ยี ตู ยึร อี ว็อง นา แคง. อึณ บอ ปี น็อห เบ. เบ มึห น็อห ลอพัะ บอ น็อห ซี โดบ ปี อึง เบ เซเซ. 26เบ ดูอี พารีแซ, เบ ยี ตู นับ ลอง อัน ตี. เบ ปี ดูอี งาย อับ. เบ ยี โลว โบง, แตห อึณ ปี เบ บาย ซีลัยะ เฆ พาน นา แคง ดี อาต. แฮะ ฮอต, บอ นา เรต อึณ ดี ชีด.

27เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี ณึงราง บอด. เบ ดี ฌัม ดูก ตาง. โคว, เบ ปี กาเดา บาเรว อี แฮะ พ็อห ซีนัม ลูย นา เรต, แตห อึณ ชีด. กาอาง ดูอี ยัม บอ อี ตู ซีงา แบน โมยว แบน โมยว ยี กอย โนะ นา แคง. 28ปาย ตี, เบ มืร ออน ดี บยัะ เบ มูห ดูอี บอด. อึณ บอ มึห นา ตู หมึอม บอ ปี ณึงราง เบ แบน โมยว แบน โมยว, ปี ตู ซี แตห เบ อี ยึร, ยี กอย กอ โนะ แคง น็อห เบ.

29เบ ดา ซารา อี มาโนว ดารา ยูดา บอ เบ ดูอี แคง พึง พารีแซ, เบ มูห ดูอี ณึงราง บอด. เบ ดี ฌัม ดูก ตาง. โคว, เบ นับ ดี ฮาว โบง กาเดา มาว, แตห อึณ แบน บาเรว ปี เบลห เบ ดูอี อี บยาน โฆรห เฌาพรา บอ เฆ อี มึห น็อห ซืร น็อห หมาน แบน วี แบน วี อี แฮะ กอย ดอ มึอน. เบ บอ ปีชีด บาเรว ตี. 30เบ นับ, อึณ มูห ฆูณ ดา เบ อี กอย ดอ มึอน, เฆ แฮะ ง็อห ยัม ดูอี ตี. เบ ยี ณึงราง ต็อห, ‘เซ อึณ มูห เย อี กอย ดอ มึอน, เย ตู จอย เฆ ง็อห ยัม ดูอี อี บยาน โฆรห เฌาพรา ตี.’ 31โกบ กาลาง เบ โฆรห ตี, แฮะ ลึห ซีคยา, เบ มูห หลูกหลาน เฆ ดูอี อี ง็อห ดูอี อี บยาน โฆรห เฌาพรา ตึอน. เบ แฮะ นับ, น็อห เบ ปี น็อห ดูอี เฆ ตี. 32เซ เบ โบง ฮาว หมาบ ปี โบง เฆ ฌึร ตี, อึณ ดี แตห หมาบ ปี โบง ฆูณ ดา เบ อี กอย ดอ มึอน แว กืน. เบ ดี บอ คัม หมาบ เบ ปี เฆ.

33เบ ปี ฮัณ อี ฮาย กาเซา. เบ ปี ฮัณ เงียน อี นับ ดี โฌะ ยัม ดูอี. โคว, เบ ดี บอ โจห กาโละ งาราย. อาว ปึอน ลอด. 34โอว ดี วี จัร ดูอี อี บยาน โฆรห เฌาพรา บอ ดูอี อี มึห อางยาน บอด บอ ดูอี อี นับ ดี มาโนว ดารา เฌาพรา, แตห เฆ ตัห โดง กอย เบ, แตห เบ ปึอน ดี โทม โฆรห เฆ. มัง อี, เบ ดี ง็อห ยัม แดง ร็อง กาแวะ. มัง อี เฆ ดี เตา ฮาว แบน มืง แบน มืง. เบ ดี บอ โดบ ดี เหมต เฆ, วี ตึย เฆ แคง โฌง เบ, วี ซีเบรียะ เฆ. 35หมาบ ฌึร ตี ดอน โมยว, เบ โลว คัม โตต. แดง กาดาย นี แฮะ มึห ดูอี กืน, อี ตู มึห ดี ลูต มาเซ, ยี แฮะ กาดูห ดี ยัม. ดอ โฆว อากัณ แฮะ ง็อห วา อัน อี จืร อาแบ. แฮะ ฮอต, เฆ แฮะ ง็อห อาซาคารา อี มูห ฆอน อาเบเรก ตึอน ดอ กอย อัน ดี กาแต กาโช็ง หลู ฆาย โฮว เฌาพรา ตึอน. จูห ซีณ อาแบ ตี กอ ฌัม อาซาคารา, หมาบ เฆ ตี ดอน อี, เบ โลว คัม โตต. 36โอว ต็อห อาคัร ดี เบ. หมาบ ฌึร ตี ดอน โมยว, เบ ดูอี ฌาด นี โลว คัม โตต.”

37เฌา เยซู แฮะ ฮอต กาลาง โฆรห ฌึร ตี ลอง เฆ ดูอี ณึงราง บอด, อัน วี กาลาง โฆรห ลอง เฆ ดูอี แคง มืง เยรูซาแลม. อัน ต็อห, “อึย เบ ดูอี แคง มืง เยรูซาแลม, เบ มูห ดูอี อี แฮะ ง็อห อาซาก เฆ ดูอี อี บยาน โฆรห เฌาพรา. บอ เฆ ดูอี ปี ร็อห ปี ตึย เฌาพรา ดี เบ, เบ แฮะ ดึห มาว, วึณ ดี เฆ แตห เฆ ยัม. แบน เฌณ แบน เฌณ โอว แฮะ เทว ดี แดะ เบ ตัห ดี โอว, แตห อึณ ปี มาเอียน แดะ ดี มาหลึม ฆอน อัน. เบ ยี ตู คัม, ตู หณึม โอว. 38นา อาต ฮาว, เบ ดี บอ ยึร, โฮว เฌาพรา ดี กาปยาต ลึร, บอ ราม โตต. 39โอว มืร ต็อห ดี เบ ดอ ตี นี, อาว เหลณ เบ อาว ฮู ปึอน ดี วี ยึร โอว. ฮี ฌัม อาคราว ดี วี ตัห ฌัม โอว โดง กอย เบ, เบ ดี บอ รวห โอว ต็อห, ‘อืบ อัน เฌา ปี ตึย เฌาพรา.’”

Currently Selected:

มท 23: pce

Highlight

Copy