มท 25

ลอง ดีบยา ฆึร วี

1วาย อัน ตี เฌา เยซู วี แค อูพามา. อัน ต็อห, “ปัน ดี ฌัม อาคราว ดี โตต ฌาด นี, ปัน ดี ตัห เฌาพรา อึบ กาดาย, อึณ ดี ปี บลอย คัด. อึณ ปี, อึณ มึห ดีบยา ฆึร วี. เฆ ดึห เงา ออม เฆ, ต็อห ดี ฮาว รวห กาโณม. 2ดีบยา ฆึร วี ตึอน ยี มึห พัน วี อี มึห อางยาน. พัน วี ตู มึห อางยาน. 3เฆ พัน วี อี ตู มึห อางยาน ตึอน, เฆ ดึห เงา ออม เฆ. เฆ ยี ปีว ดี โฆ็ง นามัน. 4เฆ ดีบยา อี มึห อางยาน, เฆ ยี โฆ็ง บอ เงา ออม บอ นามัน ปี ฮับ เฆ แคง กาเปา. 5ยี เหลณ, กาโณม ตู ตัห. โคว, เฆ ดอน อี วี แบน ซี อีด, บอ ปึอน ดี อีด ซีคยา.

6แคง หมึร กาแต ซึอม เฆ ยี ยึร อี ดัด ต็อห, ‘กาโณม แฮะ ตัห, แตห เบ เลห โดง กอย เบ, ฮาว รวห กาโณม.’

7ดอ อัน ตี เฆ ดีบยา ฆึร วี วี อึณซึห, วี กับ แซ เงา ออม, แตห เงา วี บลาง. 8เฆ อี ตู มึห อางยาน ยี ต็อห ดี เฆ อี มึห อางยาน, ‘หมาณ, แตห เบ ดัว นามัน เบ คอ อี แจก. เงา ออม เย แฮะ รีน ดี ยัด.’

9เฆ วี ต็อห, ‘อาว ปึอน ดัว, โยว นามัน เย ตู ฆลึม บอ เย บอ เบ. แตห เบ ฮาว จึห ดี ดูอี ย็อง อาดา เบ.’

10ดอ ฮาว จึห เฆ นามัน ตี, กาโณม ตึอน บอ ตัห. เฆ ดีบยา อี หน็อะ อัน, เฆ วี ฮาว โดบ อัน, แตห เฆ ฮาว ฌัม แคง กาง โฮม เฆ บลอย คัด. เฆ แฮะ ฮอต ลึบ แคง กาง, เฆ วี กาบีด มาโลห.

11วาย อัน ตี ดีบยา เฆ อี ฮาว จึห นามัน ตึอน บอ วี ตัห. เฆ แดะ ต็อห, ‘ดา, แตห แม วึห มาโลห, แตห บอ เย ปึอน ดี ลึบ.’

12ดา กาณา กาง ยี ต็อห, ‘โอว ต็อห อาคัร ดี เบ. โอว ตู นับ เบ.’

13โคว อึณ ปาย ตี, เบ โลว บัร เซเซ โกบ ตู นับ เบ ปัน เหมา โอว ดี วี ตัห.” แคะ ตี เฌา เยซู แค ลอง ดีบยา ฆึร วี ตึอน.

ลอง รึอน ปี ดัว ดา กาณา ดี แดเจณ อัน

14ปอ อู เฌณ เฌา เยซู กาลาง อูพามา. อัน ต็อห, “ปัน ดี ตัห อึบ เฌาพรา กาดาย นี, อึณ บอ ปี ดูอี อู วี, อี ฮาว ปอ อู โปละ ต็อห ดี กอย เหลณ. ดูอี ตี, อัน วี แดะ แดเจณ อัน, ต็อห ดี แตห เฆ ลึมลา โกรวกราม อัน. 15ดูอี อู วี, อัน ดัว รึอน พัน ทาเลน. (อึณ มูห รึอน แฌด อู มาย็อห ดี โอย ฆึร ดี เดา ซัะ). ปอ อู วี อัน ดัว อา ทาเลน. (อึณ มูห รึอน แฌด พัน ฆึร ดี พวน ซัะ). ปอ อู วี อัน ดัว อู ทาเลน (อึณ มูห อา ฆึร ดี บู ซัะ). อัน ดัว รึอน ตี ดี โอย วี ตี, แตห อึณ โดบ แคะ แป เฆ ดี โบง แตห อึณ มึห เอียง อัน. ดา กาณา แฮะ ฮอต ดัว รึอน อัน ตี, อัน วี ฮาว ปอ อู โปละ. 16วาย อัน ตี ดูอี ตึอน, อี แฮะ ปึอน รึอน ดา กาณา อัน พัน ทาเลน ตึอน, อัน วี ฮาว อู เฌณ, ลาย กาจึห กาย็อง, แตห รึอน อัน มึห อามยาด, แตห อึณ แบน ฆึร ทาเลน. 17บอ ดูอี อี แฮะ ปึอน อา ทาเลน, อัน วี โบง, แตห รึอน อัน มึห อามยาด, แตห อึณ แบน พวน ทาเลน. 18อึณ ยี มูห ดูอี ตึอน, อี แฮะ ปึอน อู ทาเลน. อัน ฮาว ฆึห กาเดา, ดีบ อูน รึอน ดา กาณา อัน แคง กาเดา ตี.

19วาย แฮะ เหลณ กาเซา, ดา กาณา ตึอน วี ตัห, ต็อห ดี ยอด แคะ ปี ปึอน เฆ. 20ดอ อัน ตี ดูอี อี แฮะ ปึอน รึอน พัน ทาเลน ตึอน, อัน ตัห โดง กอย ดา กาณา, วี บยัะ ดี อัน บอ พัน ทาเลน ปี ปึอน อัน. อัน ต็อห, ‘แม เฌา, แตห แม ยอด. แม ดัว รึอน พัน ทาเลน ดี โอว. โอว มืร แฮะ โบง แตห โอว ปึอน ปอ พัน ทาเลน.’

21ดา กาณา ตึอน วี ต็อห, ‘แม แฮะ โบง นา หมึอม. แม มูห แดเจณ อี หมึอม, อี โบง ซีคยา ดอน โมยว. แม แฮะ ลึมลา ยอด โกรว อี ตู กืน. โอว ดี แตห แม วี ลึมลา ยอด โกรว โอว อี กืน. แตห แม ดาคึย ปี โอว แฮะ ดาคึย.’

22ปัน ตี ดูอี ตึอน อี แฮะ ปึอน รึอน อา ทาเลน, อัน บอ ตัห. บอ อัน ต็อห, ‘แม เฌา, แตห แม ยอด. แม แฮะ ดัว รึอน อา ทาเลน ดี โอว. โอว แฮะ วี ปึอน ปอ อา ทาเลน อามยาด อัน.’

23ดา กาณา อัน วี ต็อห ดี อัน, ‘แม แฮะ โบง นา หมึอม. แม มูห แดเจณ โอว อี หมึอม, อี โบง ซีคยา ดอน โมยว. แม แฮะ ลึมลา โกรว โอว อี ตู กืน. โอว ดี วี แตห แม ลึมลา ยอด โกรว โอว อี กืน. แตห แม ดาคึย ปี โอว แฮะ ดาคึย.’

24วาย อัน ตี บอ ดูอี อี แฮะ ปึอน รึอน อู ทาเลน ตึอน วี ตัห. อัน ต็อห, ‘แม เฌา, โอว แฮะ นับ, แม มูห ดา กาณา อี หมึอม โยว. แม โซะ โหงว ปี ตู ซัม แม. แม มืร แฆบ กาฌูะ เบล ปี ตู รัณ แม. 25โคว, โอว แฮะ โยว แม. โอว ดึห เครียง รึอน แม แคง กาเดา กาดาย. นี, โอว แฮะ วี ดึห โกรว แม วี ดัว วีว ดี แม.’

26ดา กาณา ตึอน ยี ต็อห, ‘แม มูห แดเจณ โอว อี ฮาย, อี กราน. แม ต็อห, แม แฮะ นับ ลอง โซะ โอว โหงว ปี ตู ซัม โอว. 27เซ อึณ หมาน ปี ต็อห แม, ดอ ปึอน แม รึอน โอว, เซ แม เบลห รึอน ตี, แตห อึณ เลห เอียง อัน, ดอ วี ตัห โอว ดี นี, โอว ดี บอ ปึอน บอ รึอน โอว บอ เอียง อัน.’

28ปัน ตี อัน ต็อห ดี แดเจณ ปอ อู วี, ‘แม ดึห รึอน ปี ปึอน ดูอี ตี, วี ดัว ดี ดูอี อี มึห รึอน ฆึร ทาเลน.’ 29แฮะ ฮอต, ดา กาณา วี ต็อห ดี เฆ ดอน อี, ‘โอว โบง ปาย ตี, แตห เบ นับ, อาเซ แฮะ มึห แบน โมยว แบน โมยว, อัน ดี วี ปึอน ปอ อึณปัว, แตห อัน มึห หลึอม คา อาต. อาเซ ยี ตู มึห มาเซ, แคะ ปี ทาง อัน, อัน แฮะ มึห, โอว ดี วี ดึห บอ อาตี, แกวะ ฮู แตห อัน มึห มาเซ.’ 30แฮะ ฮอต กาลาง โฆรห ตี, ดา กาณา วี จัร แดเจณ อัน อู วี, แตห อัน วี ดึห แดเจณ อี ตู หมึอม, วี ตึย อัน เลห ตัะ โดง กอย ดา กาณา อัน, แตห อัน ยาม, กอย แคง อับ ว็อง, แตห กูงกาบ อัน กอ กาดอย โกบ โยว อัน.” แคะ ตี เฌา เยซู แฮะ แค ลอง โลว โบง ปี จัร เฌาพรา.

ลอง มาบู ฆาย มาแป

31เฌา เยซู วี ต็อห, “เซ โอว อี แฮะ แบน ฆอน ดูอี ดี วี ตัห โลง แดง กาดาย, โอว ดี บอ มึห อาพูง ดังโคว. เฆ อามู อามาด เฌาพรา เฆ ดี บอ โดบ โอว. โอว ดี บอ กอย แดง มาลาง, อึบ ดูอี. อึณ บอ มึห อาพูง ดัง โคว เฌาพรา อี กอย โรบ โอว. 32ดอ อัน ตี อึณ ดี มึห เฆ ดูอี ดอน โมยว, ดอน ครึร, เฆ ตัห กาฌูะ ดี อาต โอว. โอว ดี บอ กาย็อห ดูอี, แตห อึณ ปี ดูอี เฮียง มาบู ดี กาย็อห มาบู ฆาย มาแป. 33เซ อึณ มูห ดูอี อี ปี มาบู, โอว ดี แตห เฆ กอย บลาก อาอัห โอว. เซ อึณ มูห ดูอี อี ปี มาแป, เฆ ดี บอ กอย บลาก อาฆัะ โอว.

34อึณ ดี บอ ปี โอว มูห คูนดีคัม. คูนดีคัม ตี, อัน ดี บอ ต็อห ดี พึง ดูอี อี กอย บลาก อาอัห, ‘แตห เบ ตัห กาตัด โอว. เบ มูห ดูอี ปี ม็องการา ดัว ฆูณ โอว.’ อู ซีณ ดอ โบง เฌาพรา กาดาย นี, อัน แฮะ ต็อห ดี แตห เบ ลึบ แคง มืง ปี อึบ อัน. ดอ ตี นี เบ ปึอน ดี ตัห ลึบ แคง มืง ตี, แตห น็อห เบ ดาคึย กาเซา, แตห เบ ปี ดูอี อี แฮะ ปลูะ ฆูณ อัน. 35โคว, ดอ กาปราณ โอว ปี ดี โฮม, เบ แฮะ ดัว ปี ดี โฮม ดี โอว. ดอ ซี เดียง โอว อึม, เบ มืร แฮะ ดัว. ดอ ตัห โอว โดง กอย เบ, แบน แคต เบ, เบ มืร แฮะ บาง โอว ลึบ แคง กาง เบ. 36ดอ ตู มึห โอว ครึง ปี ดี ตา, เบ แฮะ ดัว ครึง ดี โอว. ดอ เซา โอว เบ แฮะ ลึมลา โอว. ดอ กอย โอว แคง กาปึม, เบ แฮะ ตัห แบน ฆึก โอว.

37คูนดีคัม ตึอน ฮี ฮอต ต็อห ปาย ตี, เฆ ดูอี หมึอม ตึอน, เฆ ดี วี ต็อห ดี อัน, ‘แม เฌา, ดอ เหมา แม แฮะ กาปราณ ปี ดี โฮม? ดอ เหมา เย แฮะ ดัว ปี ดี โฮม ดี แม? ดอ เหมา แม แฮะ ซี เดียง อึม, เย แฮะ แตห แม เดียง? 38ดอ เหมา แม แฮะ ตัห โดง กอย เย แบน แคต เย? ดอ เหมา เย แฮะ บาง แม ลึบ แคง กาง เย? เย มืร ตู นับ ลอง แม โลว ครึง ปี ดี ตา, ตู นับ ดอ เหมา เย แฮะ ดัว ครึง ดี แม. 39เย มืร ตู นับ, ลอง แม แฮะ เซา, แม แฮะ กอย แคง กาปึม. เย ตู นับ ดอ เหมา เย แฮะ ตัห, แบน ฆึก แม.’

40ปัน ตี คูนดีคัม ดี วี ต็อห, ‘โอว ต็อห อาคัร ดี เบ. เซ อึณ มึห ดูอี อี ปี วา ดอน อี, อัน บอ ปี วา โอว. แคะ ปี จอย เบ วา โอว ฌึร ตี, อึณ ปี เบ แฮะ จอย โอว.’

41คูนดีคัม ฮี ฮอต กาลาง ฌึร ตี, อัน ดี วี ต็อห ดี เฆ อี กอย บลาก อาฆัะ อัน, ‘ฮาว เลห โดง กอย โอว. โอว แฮะ แตห เบ คัม โวด, แตห เบ กอย แคง เงา อี ตู ยัด ดอ เหมา. บอ โบว กานัม บอ เฆ กานัม อี แบน อามู อามาด อัน, เฆ โลว กอย รึม โดบ เบ แคง เงา แปะ แฮะ บูด อูน โอว อาดา เบ ตี. 42โคว, ดอ กาปราณ โอว ปี ดี โฮม, เบ ตู ดัว โอว โฮม. ดอ ซี เดียง โอว อึม, เบ ตู แตห โอว เดียง. 43ดอ ตัห โอว โดง กอย เบ ปี แคต อี ตัห โต็ง, เบ ตู บาง โอว ลึบ แคง กาง เบ. ดอ ตู มึห โอว ดี ตา ครึง, เบ ตู ดัว ดี โอว. ดอ กอย โอว แคง กาปึม บอ เซา กาเซา, เบ ตู จอย โอว.’

44คูนดีคัม ฮี ต็อห ปาย ตี, เฆ ดี วี ต็อห, ‘แม เฌา, เย ตู ดึอม ยึร แม กาปราณ ปี ดี โฮม. ตู ดึอม ยึร แม ซี เดียง อึม, แบน แคต, ตู มึห ดี ตา ครึง. เย ตู ดึอม ยึร แม เซา, ตู นับ แม แฮะ ดึอม กอย แคง กาปึม. โคว, ดอ เหมา อึณ มูห, เย ตู จอย แม?’

45คูนดีคัม ดี วี ต็อห, ‘โอว ต็อห อาคัร ดี เบ. เฆ ดูอี อี ปี วา ดอน อี, เฆ แฮะ กอย กาแต เบ. ปี ตู จอย เบ ดี เฆ, อึณ ปี, เบ มืร ตู จอย โอว.’

46ปัน ตี เฆ ดูอี ตู หมึอม ดี เลห ฮาว โดง กอย โอว, แตห เฆ คัม หมาบ เฆ เซเซ. เฆ ดูอี อี ดึอม โบง นา หมึอม, เฆ ยี ฮาว กอย รึม โดบ เฌาพรา เซเซ.” แคะ ตี เฌา เยซู กาลาง ลอง มาบู ฆาย มาแป.

Currently Selected:

มท 25: pce

Highlight

Copy