กซ 4

1เบ อี มูห ดา กาณา อี, บอ เบ โลว โบง นา มูห นา หมาน, แตห อึณ การัม ดี หมาย เบ. แตห เบ โหลห เซเซ, บอ เบ ซี มึห ดา กาณา อี กอย แคง มืง ฆางหราว.

2แตห เบ บอ ซาคึร เซเซ. แตห เบ ดาง ฆูง เฆฌู บอ ซาดีก บัร เซเซ. 3ดอ ซาคึร เบ, แตห เบ ซาคึร บอ ดาง เย, แตห เฌาพรา แตห เย ปึอน ดี กาลาง ลอง เฌา เยซู ปี ตู ดึอม ยึร อี, แตห ดูอี กืน ปึอน ดี โทม. โกบ โฆรห เฌาพรา ตี, โอว มืร กอ โจห กาปึม. 4ซาคึร, แตห โอว บอ ปึอน ดี กาลาง ลอง อัน ตี ปี กาอาบ กาลาง, แตห อึณ ลึห ซีคยา. 5ปี โบง เบ ดอน โมยว ดี เฆ ดูอี อี ตู หณึม, แตห อึณ โดบ อางยาน บอด. ดอ ซี ปึอน เบ ดี โบง, แตห เบ โฆยวฆยา ดี โบง, แตห อึณ แบน อาฆยึร ดี ดูอี กืน. 6แตห เบ กาลาง โฆรห ดาคึย, โฆรห หมึอม โทม, แตห อึณ ปี ฮาบ อี แฮะ ฮับ ซัยะ. แตห เบ บอ นับ ปี ดี ปาย ดี วี เวียะ โฆรห ดี ดูอี ดอน อี.

7-8ดอ ตี นี, โอว แฮะ จัร อาทูคีด ฮาว ฌัม โดง กอย เบ, แตห อัน กาลาง ดี เบ ลอง โอว ดอน โมยว, แตห อึณ แบน โปลม แบน แฮณ ดี น็อห เบ. อาทูคีด ตี มูห วา ปี ร็อก โอว, อัน บอ มูห ดา ซารา อี โบง ซีคยา ฆาน เฌาพรา. ยาย บอ มูห อู ฆึก โบง รึม ฆาน. 9โอว แฮะ จัร บอ อาออเนซีม โดบ อาทูคีด. บอ อัน มูห วา ปี ร็อก โอว อี มึห น็อห ซืร น็อห หมาน. อัน มูห ดูอี อี บาะ แคง พึง เบ. ฆาย ดี บอ กาลาง ดี เบ ลอง ปี ปาย แคง มืง นี.

10อารีทาคู อี แฮะ โจห กาปึม โดบ โอว บอ อามากู อี มูห วอแว อาบานาบัะ บอ อายูทู อี จืร บอ อาเยซู. เฆ ดอน อี แฮะ นัมโหลห เบ. อี มูห อามากู, โอว แฮะ ดึอม กาลาง ดี เบ ลอง อัน. เซ อัน บอ ตัห โดง กอย เบ, แตห เบ รวห ซีคยา อัน. 11อี มูห ดูอี อายูดา อี หณึม เฌา เยซู, อึณ บอ มึห มี เฆ โอย วี นี, อี โบง รึม ฆาน โดบ โอว. เย โบง รึม ฆาน, แตห มืง ปี อึบ เฌาพรา เจว ตัห. เฆ มืร แตห น็อห โอว ฆยามซา. 12บอ อาเอปาพัะ อี มูห แดเจณ เฌา เยซู แฮะ นัมโหลห เบ. อัน บอ บาะ แคง พึง เบ. อัน บอ ซาคึร ดาง เบ เซเซ, แตห เบ หณึม ซีคยา, มึห น็อห มัน ปี ดูอี ตาง, บอ โบง โดบ ปี อึง เฌาพรา เซเซ, แกวะ แตห อึณ ซี มึห อี กาฟัร กาเฟียน แคง น็อห เบ. 13โอว แฮะ นับ แคะ โฆยวฆยา ดีงัณ อัน ดี โบง แตห อัน จอย เบ บอ เฆ ดูอี อี กอย แคง มืง ลอดีกี บอ ดูอี อี กอย แคง มืง เฮราปอลี. 14บอ อาลูกา อี มูห ซาราโวน ปี ร็อก เย, บอ อาเดมาด แฮะ นัมโหลห เบ. 15เย แฮะ ซี แตห เบ กาลาง บอ ดี เฆ บีนอง อี กอย แคง มืง ลอดีกี ลอง ปี นัมโหลห เย ดี เฆ. แตห เบ กาลาง ลอง อัน ตี บอ ดี นาง นูมพา บอ ดี เฆ แคง พึง เฌา เยซู อี กอย แคง กาง อัน.

16วาย แฮะ ฮอต ตีห เบ แปะ นี, แตห เบ วี ตึย ฮาว ดี เฆ แคง พึง เฌา เยซู อี กอย แคง มืง ลอดีกี, แตห บอ เฆ วี ตีห. เบ มืร, แตห เบ ปี วี ตีห แปะ แฮะ แดม ตึย โอว ดี เฆ อี กอย แคง มืง ลอดีกี ตี.

17แตห เบ บอ กาลาง ดี อาแคปู ต็อห, “ฆาน แปะ แฮะ จัร เฌาพรา แม โบง, แตห แม โฆยวฆยา ดี โบง แตห อึณ กอ ฮอต.”

18ดอ ตี นี, โอว อาปอลู วี แดม ราง โอว ลอง ปี นัมโหลห โอว ดี เบ. แกวะ แตห เบ ปีว ลอง วัน ฮีน แปะ แฮะ ปัก เฆ ดี โอว. แตห เฌา เยซู เฆฌู เบ ดอน อี.

Currently Selected:

กซ 4: pce

Highlight

Copy

Compare