กซ 3

1อึณ ปาย นี. เบ แฮะ ปึอน อาซาก กามาย ปี เฌา เยซู แฮะ ปึอน อาซาก กามาย ดอ แฮะ วี ยีต วี อีม อัน วาย แฮะ ฮอต ยัม อัน. โคว อัน ตี แตห น็อห เบ กาดึก กาด็อะ ดี โมยว อี กอย นา แดง. นา แดง ตี มูห โดง กอย เฌาพรา. เฌา เยซู บอ กอย บลาก อาอัห เฌาพรา. 2แกวะ แตห น็อห เบ กาดึก กาด็อะ แบน โมยว แบน โมยว อี กอย แดง กาดาย นี. แตห เบ กาดึก กาด็อะ โมยว อี กอย นา แดง แคง ฆางหราว. 3โคว, อึณ ปี โดว บรีม เบ แฮะ ฮอต ยัม. อาซาก กามาย แปะ แฮะ ปึอน เบ, อึณ กอย รึม โดบ เฌา เยซู อี กอย โดง กอย เฌาพรา. ลอง อัน ตี อึณ ยี ตู ลึห ดี อี เฮา. 4โกบ แปะ แฮะ โบง เฌา เยซู, เอ มึห อาซาก กามาย ตี. โคว, ปัน ดี วี ตัห โลง เฌา เยซู แดง กาดาย นี, อัน ดี แตห ดอน อี ยึร อาพูง ดังโคว อัน. ดอ อัน ตี อัน ดี แตห บอ เอ กอย รึม โดบ อัน, แตห ดอน อี ยึร. 5โคว อัน ตี เบ โลว แวน โตต ดอน โมยว อี โดบ น็อห บรีม, อี แฮะ ฮอต ยัม. โมยว ตี, อึณ บอ มูห น็อห ซี ลาย อีบึณ, โบง อี หมึอม กาอีห แบน โมยว แบน โมยว, บอ น็อห กาวาต, น็อห ซี โบง มี อี ตู หมึอม บอ น็อห ลอพัะ. อาเซ มึห น็อห ลอพัะ ตี, อึณ ปี อัน กรึบ อารึบ. 6โกบ อึณ ปาย ตี, เฌาพรา ดี รู กาเซา ดี เฆ อี ตู โทม โฆรห อัน. 7อาต นี บอ เบ แฮะ ดึอม โบง โดบ น็อห ฌึร ตี, ดอ ซี อึบ น็อห บรีม ตี ดี น็อห เบ. 8มาแล, ดอ ตี นี, เบ โลว แวน น็อห ฌึร ตี ดอน โมยว. อึณ บอ มูห น็อห หงึย รู, น็อห ดอซัะ, น็อห จีจีว, แค จาว อี, บอ กาลาง โฆรห อี หมึอม กาอีห. 9แกวะ แตห เบ ลาย กาลาง โฆรห กาโลว, โฆรห ตู หมาน. โคว, เบ แฮะ ฮอต แวน น็อห บรีม เบ บอ ปี ดึอม โบง น็อห บรีม ตี. อึณ ปี เบ แฮะ กาปลูะ ครึง, แฮะ แวน ครึง บรีม. 10ดอ ตี นี, เบ โลว ดึห น็อห กามาย ตี, แตห อึณ ปี เบ ชึบ ครึง กามาย. น็อห กามาย ตี, เฌาพรา บอ อึณปราย เซเซ, แตห เอ นับ ซีคยา อัน, แตห ปี โบง เอ ปี ปี โบง เฌาพรา อี แฮะ พาน เบลห น็อห กามาย ตี. 11โกบ แฮะ แตห เฌาพรา เอ มึห น็อห กามาย, เอ อาว โลว กาย็อห ดูอี อาโมยว เฮา บอ เฆ ดูอี อายูดา, เอ ตู โลว กาย็อห ดูอี อี แฮะ ฮอต ซัวะ แวน ฮูน ลัะคานา บอ ดูอี อี ตู ซัวะ แวน. โยว เฆ มูห ดูอี อี กอย แคง มืง, ดูอี อี กอย ดี นอน, โยว เฆ มูห หมาย อี, ตู มูห หมาย อี, อาว ฮู มึห ดีโคว มาเซ. เฌา เยซู กอย แคง น็อห เอ ดอน อี อี มึห น็อห กามาย. อึณ บอ มูห มี อัน อี อาเร ตาง.

12เบ มูห ดูอี ปี ร็อห เฌาพรา, ดูอี ซีงา บอด, ดูอี ปี ร็อก อัน. โคว อัน ตี แตห เบ ดึห น็อห กามาย, แตห อึณ ปี เบ ชึบ ครึง กามาย. แตห เบ มึห น็อห ดีฮาง, น็อห ร็อก กาเว, น็อห เตียม, น็อห อึณจูะ อึณจัม, น็อห คัม ดี ยืน เหลณ. 13แตห เบ คัม ปี โบง อี เฮา, อี ตู ล็อะ น็อห เบ. เซ ดูอี แฮะ ลูต เบ, แตห เบ วี ลาย ฆ็อห แวน หมาบ. แตห เบ ฆ็อห แวน หมาบ ปี เฌา เยซู แฮะ ฆ็อห แวน หมาบ เบ. 14แดง ตี, แตห เบ ลาย ร็อก. น็อห ร็อก ตี, ดี ปา กาฌูะ น็อห เบ, แตห เบ แบน อู น็อห.

15แตห เบ ดึห น็อห ฆัด เฆียด ปี ดัว เฌา เยซู, แตห อึณ อึบ น็อห เบ. เฌาพรา แฮะ แดะ กาฌูะ เบ, แตห เบ แบน อู พึง อี ปี โดว โบ็ง อู โบ็ง, แตห เบ ลาย กาล็อะ แบน อู น็อห. โคว อัน ตี แตห เบ ดาง ฆูง เฆฌู ดี เฌาพรา. 16แตห โฆรห ปี มาโนว เฌา เยซู ลึบ กืน แคง น็อห เบ. แตห เบ ดึห อางยาน ดอน โมยว, ลาย มาโนว บอ ลาย ดัว ซาดีก. แตห เบ บอ ต็อห โหมว ทัม, ต็อห อึณเจณ ลอง เฌาพรา, อี เลห แคง น็อห เบ โกบ โหลห เบ ฆูง เฆฌู เฌาพรา. 17เบ บอ กาลาง โฆรห, เบ บอ โบง มาเซ, แตห เบ โบง โตต ดอน โมยว โกบ หณึม เบ เฌา เยซู. แตห เบ ดาง ฆูง เฆฌู ดี เฌาพรา โกบ แปะ แฮะ โบง เฌา เยซู ดี เบ.

18เบ อี มูห อีบึณ, แตห เบ คัม ดี โทม โฆรห อีมาย เบ. โคว, เซ เอ หณึม เฌา เยซู, อึณ แฮะ กาอาบ โบง ปาย ตี.

19เบ อี มูห อีมาย, แตห เบ ร็อก อีบึณ เบ. แกวะ คาหนาบ เฆ.

20เบ อี มูห ฆอน, แตห เบ โทม โฆรห ฆูณ มา เบ ดอน โมยว. เซ เบ โบง ปาย ตี, อึณ แฮะ ล็อะ น็อห เฌาพรา.

21เบ อี มูห ฆูณ, แกวะ โบง แตห อึณ ซ็อง ดี น็อห ฆอน เบ. เซ เบ โบง ปาย ตี, น็อห เฆ ดี ลึร.

22เบ อี มูห หมาย อี, แตห เบ โทม โฆรห ดา กาณา อี อึบ เบ แดง กาดาย นี. แกวะ โบง นา หมึอม มี ดอ กอย ดา กาณา เบ. แกวะ โบง โกบ ซี แตห เบ ดา กาณา อืบ เบ. แคะ ปี โบง เบ ดอน โมยว, แตห เบ โบง ซืร ซืร, แตห เบ โบง โกบ โรวเซ เบ เฌาพรา. 23เบ บอ โบง โมยว เหมา, แตห เบ คัด น็อห ดี โบง, แตห อึณ ปี เบ โบง ฆาน เฌาพรา, แกวะ แตห อึณ ปี เบ โบง ฆาน ดูอี. 24เบ โลว โบง ปาย ตี โกบ แฮะ นับ เบ, เบ ดี ปึอน รูห อัน อี มูห คาฆูน ปี ดัว เฌาพรา โกบ แฮะ โบง เบ ปี อึง เฌา เยซู. 25เฆ อี โบง หมาบ, เฆ ยี โลว คัม หมาบ ปี โบง เฆ. เฌาพรา มืร ตู มึห โดง ร็อก โดง ฌ็อง.

Currently Selected:

กซ 3: pce

Highlight

Copy

Compare