1 ทล 1

1โอว อาปอลู บอ อาซีลาด บอ อาทีโมวเท, เย แดม แปะ นี ตึย ดี เบ ดูอี แคง พึง เฌา เยซู อี กอย แคง มืง เทซาโลน. เบ มูห ดูอี ปี อึบ เฌาพรา, อี มูห ฆูณ เอ. เบ บอ มูห ดูอี ปี อึบ เฌา เยซู, อี มูห ดูอี ปี ร็อห ปี ตึย เฌาพรา แตห อัน คยอด เอ. แตห เฌาพรา เฆฌู เบ, ดัว น็อห ฆัด เฆียด ดี เบ.

2เซเซ เย ดาง ฆูง เฆฌู ดี เฌาพรา ดอ ซาคึร เย ดาง เบ. 3เซ เย ซาคึร ดี เฌาพรา อี มูห ฆูณ เอ, เย บอ โหลห เบ เซเซ. น็อห เบ แฮะ หณึม ซีคยา เฌาพรา. อึณ แตห เบ โบง นา หมึอม. เบ บอ ร็อก กาเซา เฌา เยซู, แตห เบ บอ รัณ นังฆัน กาเซา ฆาน อัน. เบ มืร หน็อะ อึณด็อะ เฌา เยซู. โคว, เบ คัม ดูก แบน โมยว แบน โมยว.

4โคว อัน ตี เย บอ นับ, เบ บีนอง, เบ มูห ดูอี ปี ร็อก เฌาพรา. เฌาพรา มืร แฮะ ร็อห เบ. 5ดอ ตัห กอย เย โดบ เบ ตึอน, เย กาลาง โฆรห เฌาพรา ดี เบ, แตห น็อห เบ ดาคึย. โฆรห เฌาพรา ตี อาว มูห โฆรห ปีเยณ. อึณ บอ มึห ปวน ตาง, มึห บอ น็อห พึอม เฌาพรา. เบ บอ นับ ซีคยา, แปะ แฮะ กาลาง เย ดี เบ, อึณ แฮะ หมาน อาคาคัร. เบ มืร แฮะ นับ, เย แฮะ กอย รึม โดบ เบ, แตห อึณ แบน อาฆยึร ดี เบ. 6ปัน ตี เบ มืร โดบ ซีคยา เฌา เยซู, ณึง แคะ ปี โบง เย. ดอ กาดูห เบ ดูก ดอน โมยว, เบ แฮะ หณึม โฆรห เฌาพรา. น็อห พึอม เฌาพรา มืร แฮะ แตห น็อห เบ ดาคึย. ปาย ตี เบ แฮะ แตห โฆรห เฌาพรา ลึบ แคง น็อห เบ. 7ปาย ตี เบ แฮะ บยัะ ดี อี เฮา, แตห บอ เฆ นับ, เหมา เฆ ดี ปาย ดี โดบ เฌา เยซู. บอ เฆ ดูอี อี หณึม เฌา เยซู อี กอย แคง อืง มาเคโดน, บอ เฆ ดูอี อี กอย แคง อืง อาคายา, เฆ นับ ดี ณึง โดบ เบ, โบง แคะ ปี โบง เบ. 8เบ มืร แฮะ ฮอต กาลาง โฆรห เฌาพรา แตห เฆ ดูอี แคง อืง มาเคโดน บอ เฆ ดูอี แคง อืง อาคายา กอ นับ. อาว วัน แคะ ตี. บอ เฆ ดูอี อี กอย ดอน บลาก ดอน นา มืร แฮะ นับ ลอง หณึม เบ เฌา เยซู. โคว, เย ตู โลว วี กาลาง ลอง อัน ตี. 9อึณ มูห ดูอี เฆ ตี, เฆ แฮะ กาลาง ลอง เบ. เฆ นับ ดี แค ลอง แปะ แฮะ รวห เบ ดี เย ดอ ตัห เย ดี เบ. เฆ บอ นับ ดี แค ลอง แปะ แฮะ แวน เบ อารึบ ราง ปี กรึบ เบ. แฮะ ฮอต เบ แฮะ โดบ เฌาพรา อาคาคัร อี มูห เฌาพรา อีม. เบ มืร แฮะ โบง ปี อึง อัน. 10เบ บอ หน็อะ ปัน ดี วี ตัห โลง เฌา เยซู อี มูห ฆอน เฌาพรา แคง ฆางหราว. คา อาต เฌา เยซู แฮะ ฮอต ยัม. เฌาพรา แยะ แฮะ แตห อัน วี ยีต วี อีม. อึณ มูห เฌา เยซู ตี, อัน ดี คยอด เอ, แกวะ แตห เอ คัม ดูก ดอ รู กาเซา เฌาพรา ดี ดูอี อี มึห หมาบ. แคะ ตี เฆ ดูอี เฮา นับ ดี กาลาง ดี เย ลอง เบ.

Currently Selected:

1 ทล 1: pce

Highlight

Copy

Compare