Malk 5
5
Zezu asaka muutu widzi ne mimbiti
(Mat 8.28-34; Luk 8.26-39)
1Ye bangu bedzanga ngulu ye dzanga dze Ngalilee se ilongo dze batu be Ngelaseni. 2Zezu apula se mbungu, palikɨse muutu motu apula se mesongo aya kwanye nedzi. Muutu wayu edze ne umbiti se nyulu yedzi. 3Wangu adze ni tima ye mesongo. Nde muutu tine motu we ituka kwata wangu, bakutaka wangu ne bitseyi. 4Ni ndili ye bikutaka wangu meboko ne mekulu ne bitseyi, yedzi itsitaka byesi, nde muutu tine motu widzi ne singa ye ukwata wangu. 5Mendili mesi ne musa ne pinzi, wangu adze si tima ye mesongo ne kule bikudzi. Wangu awula misima yedzi ilwalise ne nyulu yedzi mene ne memanya. 6Yedzi eyene Zezu ne ulayi, atanga ne mbangu, anaŋwe mebongo ne sɨna busu vedzi. 7Awula usima ne singa ati: «Yowe ifumba nami niyi? Zezu, Ŋwana we Nzambi we ikulu amene, kolokolo yowe, ne kumvu ye Nzambi, we nde yukuvuse me mbonzi.» 8Wangu etanda vavu ni ne Zezu etanda nedzi ati: «Umbiti, pula se nyulu ye muutu yu!» 9Zezu asuŋwule ne muutu mene ati: «Kumvu yowe niza?» Wangu akalule nedzi ati: «Kumvu yami ni beyitsi, ne besu bidzi uyitsi se nyulu ye muutu yu.» 10Yedzi ebondoko Zezu ati: «We nde panza mimbiti mi ulayi ne ilongo.»
11Ni awawu, yedze ne dzimvu dzineni dze bingu, dzedze ne ufumba bila bye udza kule kudzi. 12Ye mimbiti mye bondoko Zezu ati: «Luma besu se bingu, yayu besu benyidzile se byangu.» 13Zezu amekidze. Ye mimbiti mye pula se muutu mene ye myangu mye nyidzile se bingu. Dzimvu dze bingu dze meku mye mikama myole mye bingu (2000), ye bingu bye yinga kule kudzi ne unaŋwe se dzanga ye byangu bye yinaka. 14Batu bedze ne ubata bingu batanga, batse ne utandaka mesuta se ngundu ne membuka. Batu baye yene mesuta. 15Ndili ye bangu bedzanga kone Zezu ye bangu beyene muutu wedze ne mimbiti se nyulu, untsitsi, aswa mengoyi, mulu ŋwedzi ŋwedze ŋwa lunga. Ye batu beyene bongo. 16Batu beyene mesi batanda ne boko mesuta ne muutu wedze ne mimbiti se nyulu ne mesuta ne bingu. 17Ye batu bebondoko Zezu ati: «Teme ilongo dze besu!» 18Ndili ye Zezu ebita se mbungu, muutu wedze ne mimbiti se nyulu abondoko wangu ati: «Me tuka dze benu!» 19Zezu eke mekidze, ni wangu atanda nedzi ati: «Vʉtse sombo yowe, kwele ye yali yowe, we tanda me Kuŋwu mepika we ne nda wangu meyene we tsesi.» 20Ye muutu mene etse. Wangu atse ne utandaka se ilongo dze kumvu Bingundu Iku, mesi me Zezu epika wangu, ne batu besi bakima.
Zezu asaka ŋwatu anyusile ne ŋwana we ŋwatu we Zayiluse se lɨku
(Mat 9.18-26; Luk 8.40-56)
21Ndili ye Zezu evʉtse se mbungu, ngulu ye dzanga, uŋkuka ŋwe batu ŋwa dzenze wangu. Wangu edze ni uŋkolo ŋwe dzanga. 22Kuŋwu motu we ndaku ye umbondu, we kumvu Zayiluse, aya. Wangu ayene Zezu, anaŋwe sɨna mekulu medzi 23yedzi ebondoko wangu ati: «Ŋwana wami we ŋwatu adzi se lɨku. Yaka satse meboko kule mulu ŋwedzi yayu wangu alunga wangu abɨka!» 24Ye Zezu etse banedzi. Uŋkuka uneni ŋwedze ne ubinga ne upinyeka wangu me kwele mesi.
25Se uŋkuka yedze ne ŋwatu we unsu ŋwedze ne upula se bisiwu iku ne byole. 26Wangu eyene mepasi meyitsi ne usaka nyulu pesi ye besaki beyitsi. Wangu ayisa bedolo bedzi besi, ni wangu eke lunga, ubedzu va yebise nene. 27Ŋwatu mene ayuka bewowe ne Zezu. Yedzi eya se uŋkuka mbisa ye Zezu, yedzi ebetime ne ingoyi dzedzi. 28Yedzi etanda ati: «Ti ma betime dzakene ne mengoyi medzi, me lungele.» 29Palikɨse, unsu ŋwedze ne upula ŋwa sele nedzi ayene ati, wangu alunga ubedzu va siya. 30Ndili mene mbotu, Zezu ayene ati singa yotu ya pula wangu se nyulu. Zezu ayikwene tima ye uŋkuka yedzi esuŋwule ati: «We me betime ne mengoyi mami niza?» 31Bebingi bedzi bakalule nedzi ati: «We yene nda widzi tima ye uŋkuka batu bepinyeke we me kwele mesi, we suŋwule witi: “We me betime nami niza?”» 32Ni Zezu awaya batu bedze konedzi ne uyene muutu we pika dzamvu dzadzu. 33Ŋwatu atsɨkite ne bongo, nedzi eyiba mesuta nedzi, wangu aya naŋwe sɨna mekulu me Zezu yedzi etanda wangu mesi. 34Zezu atanda nedzi ati: «Ivʉkidze dzowe dza lungise we. Tseke ne itavu, lunga.»
35Ndili ye Zezu etanda vavu, batu bayinga ndaku ye Zayiluse batanda nedzi ati: «Ŋwana wowe we ŋwatu awaa. We nde vele wele kuŋwu.» 36Zezu ayuka me bangu bewowe, ni wangu atanda ne kuŋwu we ndaku ye umbondu ati: «We nde yene bongo, somo ivʉkidze.» 37Wangu eke etondo ati muutu tine motu asukidze wangu, mbisa Pyeli ne Zaaki ne Zan, ŋwana mama wedzi. 38Ndili yedzi edzanga ndaku ye Zayulise, Zezu ayene ati batu besi belila ne misima myesi. 39Zezu anyidzile se ndaku atanda ne bangu ati: «Ye yiki yiki niyi? Ye beyi bilila niyi? Ŋwana asande waa, ni wangu adzi ni bembula.» 40Ni bangu basewe wangu. Ye Zezu epanza batu besi, aboko tata ne mama we ŋwana ne bebingi bedzi besatu besukidze wangu. Yedzi enyidzile se liyi ye ndaku kwele ye ŋwana edze. 41Zezu akwata wangu boko nedzi ati: «Talita kumi!» Avavu nati: «Ŋwana we ŋwatu, me tanda we, telime!»
42Palikɨse, ŋwana we ŋwatu atelime yedzi ebanda ne ulanda. Wangu edze ne bisiwu iku ne byole. Ndili ye batu beyene vavu ye bangu bekima kate kima amene. 43Ni Zezu atanda ne bangu ne singa yesi ati: «Beyi nde tanda ne muutu tine motu me mesuta.» Yumana yedzi etanda ne bangu ati: «Kabayi wangu bila.»
Currently Selected:
Malk 5: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
