Malk 4
4
Kumvu ye uŋkuni
(Mat 13.1-9; Luk 8.4-8)
1Yumana, Zezu avele dze ne ulakɨse batu, uŋkolo ŋwe dzanga dze Ngalilee. Batu beyitsi baya kukene konedzi, yedzi ebita se mbungu asunda untsitsi. Mbungu yedze ni kule dzanga, batu besi bavuka sɨna, uŋkolo ŋwe dzanga. 2Zezu alakɨse bangu mamvu meyitsi ne mengana. Se bilakisɨli byedzi atanda ne bangu ati: 3«Yukayi! Vʉsa votu, muutu motu atse ŋwasa mbulu se kuba yedzi. 4Ndili yedzi edze ne uŋwasa mbulu, pesi yotu ye mbulu ya naŋwe uŋkolo ŋwe peyi. Benyodzi baya dza mbulu yesi. 5Ne mbulu mboko ya naŋwe kule senze ye memanya buma ye nde senze uyitsi. Mbulu yamene mesadzi ni nde senze. 6Ni ndili ye musa wibala ne singa, ye musa witsumba bimeni. Ye bimeni bikanye, ne bimeni nde mikanga. 7Ne mbulu mboko ya naŋwe tima ye minzila. Ye minzila mimene ye myangu milutʉmise bimeni bive ne bimeni nde yele. 8Ni mbulu mboko ya naŋwe se senze yimve, bimeni bya mene, bya nene, bya buta mbulu, abi bya buta mbulu meku mesatu(30), byoko meku untuba(60), ne byoko uŋkama (100)». 9Ye Zezu evele tanda ati: «Widzi ne meluyi me uyuka, ayuka!»
Ye Zezu iwowe ne milimvɨle niyi
(Mat 13.10-17; Luk 8.9-10)
10Ndili ye Zezu elawe ne uŋkuka, bedze konedzi bane bebingi iku ne bole basuŋwule ne Zezu ati: «Yowe iwowe ne milimvɨle niyi?» 11Zezu akakule ne bangu ati: «Nzambi akaba beyi utsengu ve uyiba mamvu medzi midzi isole se Ukani ve Nzambi, ni milimvɨle myedzi ni mye batu boko. 12Yayu,
“Bangu bewaya, ni bangu nde yene,
bangu beyuka, ni nde yila yi nyidzile se meluyi me bangu.
Bangu bebiki yuka, tadzi bangu beye vʉtse kwele ye Nzambi, ye Nzambi biki boloko mesumu me bangu.”»
Zezu asilile ngana ye uŋkuni
(Mat 13.18-23; Luk 8.11-15)
13Ye Zezu evele tanda ne bangu ati: «Ni ti unlimvɨle ŋwu, ŋwa ke nyidzile se meluyi me beyi. Ni milimvɨle myoko myetse nyidzile se meluyi me beyi nivi? 14Uŋkuni aŋwasa ni iwowe dze Nzambi. 15Mbulu mboko ya naŋwe uŋkolo ŋwe peyi. Uŋkolo ŋwe peyi, ni batu biyuka iwowe dze Nzambi. Ni ye Sata iya pinule iwowe dze Nzambi dzidzi se milima mye bangu. 16Mbulu mboko ye naŋwe se memanya. Senze yidzi ne memanya, yedzi ni batu biyuka iwowe dze Nzambi, ye bangu bimekidze dzangu ne itsisa. 17Ni iwowe dze Nzambi nde nyuŋwe se milima mye bangu ne ubomo mikanga, bangu bedzi ni ngulu ngulu. Ndili ye bangu bikwanye ne mamvu me udilu, na ndili ye bangu biyene mepasi utsɨna ne iwowe dze Nzambi, palikɨse ye bangu bidzika byesi. 18Mbulu mboko ye naŋwe tima ye minzila, yedzi ni batu biyuka iwowe dze Nzambi, 19ni metsimini me bangu medzi ni se mamvu me se senze. Bangu befumba ni Untamvu umbi ne tsesi ye bila byesi. Utsɨna ne vavu, iwowe dze Nzambi nde nene ne dzangu nde yele. 20Ni mbulu mboko ye naŋwe se senze yimve. Senze yimve, ni batu biyuka iwowe dze Nzambi ye bangu bimekidze dzangu. Ye dzangu dzibuta mbulu, boko mbulu meku mesatu(30), boko meku untuba(60), boko uŋkama (100)».
Unlimvɨle ŋwe ibamvu
(Luk 16.18)
21Zezu avele tanda ne bangu ati: «Ndili ye muutu iya ne ibamvu ni ne usomo se mbiya na sɨna ye ilaka? Na wangu awana ni banye ibamvu kule baaka? 22Byesi bidzi isole, betse tuka yene, ne midzi isole me batu nde yiba, metse pulene ituna. 23Widzi ne meluyi me uyuka, wangu ayuka.» 24Zezu avele tanda ne bangu ati: «Pikayi utsengu ne me beyi biyuka. Nzambi atse kaba beyi nda beyi bikaba boko ne medzi itse velise beyi, metse takuse me beyi bepika. 25Yayu, widzi ne va yila, betse vele kaba wangu biyitsi, ni we nde yila, betse pinule wangu ne va yedzi idzi ne yangu.»
Unlimvɨle ŋwe limbulu limene langu mene
26Zezu avele tanda ati: «Ukani ve Nzambi vedzi ni nda unlimvɨle ŋwu. Muutu motu aŋwasa mbulu se kuba yedzi. 27Yumana, ne pinzi yedzi inyidze bembula, masi mesi yedzi inyuse. Ndili yayu yesi, mbulu ya mene, ya nene, ni muutu wayu nde yiba nda mbulu yi mene. 28Senze yangu mene ni yi banda menise bimeni, ye byangu binene, ye byangu bibuta mbulu. 29Ndili ye mbulu yi yele, ye muutu iboko unsele ne utsɨtaka mbulu, ayayu ni ndili ye utolongo.»
Unlimvɨle ŋwe limbulu le mutadi
(Mat 13.31-32; Luk 13.18-19)
30Zezu avele tanda ati: «Yangu yila ye bebe bituka mikise Ukani ve Nzambi ne yangu niyi? Unlimvɨle ŋwe bebe bituka wowe ne Ukani ve Nzambi ni uza? 31Ukani ve Nzambi ve tala ni limbulu le mutadi. Ndili ye biŋwasa langu se senze, langu ni limbulu litakuse mbulu yesi ute se senze yesi. 32Ni ndili ye biŋwasa langu, ye langu limene ye langu liyikwe ŋwili uneni, witakuse mili myesi mye se kuba. Ye bitatsi byedzi binene ne benyodzi betuka tunga mendaku sɨna ye sisiŋwu ye bitatsi byedzi.»
33Zezu alakɨse batu besi iwowe dze Nzambi ne milimvɨle nda myamu, wangu edze ne uwowe ne milimvɨle nati, batu besi beyuka. 34Zezu edze ne uwowe ne bangu si ne milimvɨle, ni ndili yedzi idzi bane bebingi bedzi bangu mene, yedzi iyebise silile bangu milimvɨle myesi.
Zezu atabise ipepe dzineni
(Mat 8.23-27; Luk 8.22-25)
35Vʉsa vangu votu ne ikolo, Zezu atanda ne bebingi bedzi ati: «Yakayi betse ngulu ye dzanga.» 36Ye bangu beteme uŋkuka, ye bebingi betse ne mbungu buma ye Zezu edze. Yedze ne membungu moko kone bangu. 37Ye ipepe dze kamve dze kukudze. Ye mipukisi mye ndama se mbungu, ye mangu meyitsi me nyidzile se mbugu. 38Zezu adzi bembula mbisa ye mbungu, asatse mulu kule pundulu. Bebingi bedzi banyusɨle wangu batanda nedzi ati: «Kuŋwu, bebe bewele! Wangu adzika bebe bewaa tuu?» 39Zezu, anyuse. Akamve ne ipepe atanda ne dzanga ati: «Dzanga dzi, taba!» Ne ipepe dzeke vele kukudze, ne dzanga dzesi dza taba. 40Zezu atanda ne bebingi bedzi ati: «Ye beyi bidzi ne bongo niyi? Singi beyi besande ivʉkidze?» 41Ni bebingi bayene bongo, bawowe tima ye bangu ati: «Ayu muutu niza? We ipepe ne mangu bikuuna!»
Currently Selected:
Malk 4: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
