Malk 6
6
Batu be Nazaleti beke mekidze Zezu
(Mat 13.53-58; Luk 4.16-30)
1Zezu ateme buma yayu atse Nazaleti, ngundu yedzi enene. Bebingi bedzi basukidze wangu. 2Vʉsa ve idzundu, Zezu abanda ne ulakɨse se ndaku ye umbondu. Yedze ne batu uyitsi. Ye bangu beyuka wangu, bangu bakima kate kima amene ye bangu betanda ati: «We lakɨse wangu mamvu ma mesi niza? We me kaba wangu utsengu vu niza? Wangu apika mamvu me likimiyinda ma nivi? 3Wangu kaka untungi we mendaku, ŋwana we Maliya. Kaka uŋkulu we Zaaki ne Zose ne Zude ne Simo? Bekadzi bedzi bedzi kawa ne bebe?» Utsɨna ne vavu, batu be Nazaleti beke mekidze Zezu. 4Ye Zezu etanda ne bangu ati: «Bekuuna Muutu we Nzambi se bibuma byesi, ni nde kuuna wangu se ngundu yedzi ne se yali yedzi ne se ndaku yedzi.» 5Zezu eke tuka pika dzamvu tine dzotu dze likimiyinda se Nazaleti. Yila yedzi etuka pika si usatse va batu meboko kule myulu, ye bangu belunga. 6Wangu edze se likimi ne batu be ngundu yedzi beke dze ne ivʉkidze nedzi.
Zezu aluma betuma bedzi iku ne bole
(Mat 10.5-15; Luk 9.1-6)
Yumana vavu, Zezu atse se membuka mesi midzi kone Nazaleti ne ulakɨse. 7Zezu abanga betuma bedzi iku ne bole, abanda ne uluma bangu bole bole. Wangu akaba bangu pɨlaka ne upanza mimbiti. 8Yedzi etanda bangu ne singa ati: «Beyi nde boko yila tine yotu se uŋdzunga ŋwu, ni yila ye beyi bituka boko si unsumbi. Beyi nde boko lipembe, nde boko myanza, beyi nde somo bedolo se kwamba. 9Swayi si bekotoko ni bokayi si ingoyi dzotu.»
10Zezu avele tanda ne bangu ati: «Ndili ye biyamba beyi se ndaku mbotu, dzayi wawu nzii ne ndili ye beyi biteme se ndaku yayu. 11Ni ti batu balewe yamba beyi se buma yotu ne bangu ti balewe yuka beyi, temayi ngundu ye bangu, fufulayi iwulu dze metambi me beyi. Beyi ti bapika vavu, beyi belaka wawu ni bangu ati me bangu beme pika nde uve.» 12Ye bebingi betse ne utandaka ne batu ati: «Yikwilayi bɨku bye beyi.» 13Bangu bapanza mimbiti miyitsi, basuwaka madzi kule mibedzu miyitsi mya lunga.
Lɨku le Zambatisi
(Mat 14.1-12; Luk 9.7-9)
14Kani Elodi Antipasi ayuka bewowe ne Zezu ne bedze ne uyuka likʉma ledzi se bibuma byesi. Batu boko bedze ne utanda ati: «Zambatisi anyuse se lɨku, yene utsɨna vedzi ituka pika mamvu me likimiyinda.» 15Ni boko betanda ati: «Wangu ni Eli.» Ne boko bavele tanda ati: «Wangu adzi ni Muutu we Nzambi, nda Batu be Nzambi boko bekala.» 16Ndili ye Elodi eyuka vavu, wangu atanda ati: «Me luma miti betsɨta Zambatisi mulu, ni wangu anyuse se lɨku!»
17Elodi etanda vavu nedzi eluma ne ukwata Zambatisi ne usomo wangu ungenenge, ye bekutaka wangu ne bitseyi. Elodi epika vavu ni utsɨna ne ŋwadzi wedzi Elodyadi. Elodyadi wayu edze ni ŋwadzi we uŋkulu wedzi Filipi ne Elodi abala wangu. 18Ye Zambatisi etanda ne Elodi ati: «We nde tuka bala ŋwadzi we uŋkulu wowe!» 19Elodyadi edze ne uwunda Zambatisi yedzi efumba ati bebuuma wangu, ni wangu eke tuka, 20ne Elodi edze ne ukuuna Zambatisi. Wangu eyiba ati Zambatisi ni muutu we umpende ne telee ne Elodi edze ne ubata Zambatisi toko wangu ayukuve mbozi. Ndili yedzi edze ne uyuka me Zambatisi itanda, wangu nde vele yiba nda wangu itsimene. Ni wangu edze ne utondo yuka medzi edze ne utanda. 21Ni vʉsa votu, Elodyadi akobise ndili yimve ye bibuuma Zambatisi. Yedze ni vʉsa ve Elodi epika itsɨnda dzineni ne uyivile vʉsa ve bedziya wangu. Wangu abanga bibutu bidzi konedzi ne bekuŋwu be bewolo ne bekani boko be Ngalilee. 22Ŋwana we ŋwatu we Elodyadi anyidzile se liyi ye ndaku yedze ne itsɨnda abanda ne ubɨna. Elodi bane bezenze batsisa ye bangu beyene wangu abɨna. Ye kani Elodi etanda ne ŋwana we ŋwatu ati: «Dzuka me yowe itondo, me kabe we yangu.» 23Yedzi ekana nedzi ati: «Me kabele we byowe idzukele me byesi, dzakene liyi ye ilongo dzami.» 24Ŋwana we ŋwatu apula atanda ne mama wedzi ati: «Yami idzuka wangu niyi?» Mama akalule nedzi ati: «Dzuka mulu ŋwe Zambatisi.» 25Ye ŋwana we ŋwatu evʉtse mesadzi kwele ye kani atanda nedzi ati: «Me tondo miti tsaŋwe mene yi we kabe me mulu ŋwe Zambatisi se mbele.» 26Kani ayene ubi se unlima, ni wangu eke tuka lewe, nedzi ekana busu ve batu bedzi ebanga. 27Ŋwana we ŋwatu eke mana wowe ye kani eluma uŋwolo atanda nedzi ati: «Tseke tsɨta mulu ŋwe Zambatisi we ya me ne ŋwangu.» Ye uŋwolo ŋwetse se ndaku ye ungenenge ne utsɨta mulu ŋwe Zambatisi. 28Yedzi eya ne mulu ŋwe Zambatisi se mbele, akaba ne ŋwana we ŋwatu, nedzi akaba ne mama wedzi. 29Ndili ye bebingi be Zambatisi beyuka vavu, bangu baya boko tsinzi yedzi, ye bangu besodze.
Zezu abungule meku me batu meku me mikama mitanyi (5000)
(Mat 14.13-21; Luk 9.10-17; Zan 6.1-14)
30Ndili ye betuma be Zezu bekukene konedzi, bangu batanda wangu mesi me bangu bepika ne mesi me bangu belakɨse. 31Zezu atanda ne bangu ati: «Yakayi betse ulayi ne batu ne udzunda va ite.» Wangu etanda vavu ni ne batu beyitsi bedze ne utse ne uya ne bebingi bedzi nde ne ndili ye udza bila. 32Ye bangu bebita se mbungu mbotu, ne utse ulayi ne batu. 33Ni batu beyitsi bayene nda bangu bitse, ye batu beyimba Zezu ne bebingi bedzi. Ye bangu beyinga se bingundu byesi ne membangu, bangu badzanga Zezu ne bebingi bedzi lɨbusu se buma mene.
34Ndili ye Zezu esunda se mbungu, ayene uŋkuka uneni. Yedzi eyene bangu tsesi, ne bangu bedze nda bindomvene bye nde bebati. Yedzi ebanda ne ulakɨse bangu mamvu meyitsi. 35Nda vʉsa vedze va kitse yinda, bebingi bedzi batsindene konedzi batanda nedzi ati: «Vʉsa va kitse yinda ne buma yi nde batu. 36Vʉtise batu ba se bibanzi ne membuka me bakaka, awawu bangu betuka sumba yila ye udza.» 37Zezu akalule ne bebingi bedzi ati: «Beyi mene kabayi bangu bila!» Bangu batanda nedzi ati: «We fumba ni witi besu beboko bepɨtisi meku mole ne usumba pembe, yayu besu bekaba bangu bila bye udza?» 38Zezu atanda ne bangu ati: «Beyi bedzi ne pembe kwe? Ketse wayayi.» Bangu batse suŋwule, ye bangu betanda nedzi ati: «Besu bedzi ne pembe itanyi ne beswi bole.» 39Zezu atanda ne bebingi bedzi ati: «Tanda batu besi besunda mitsitsi kule bimvu bye sa ne umene, batu ne ye bangu buma.» 40Batu basunda mitsitsi bibuma, bibuma, abi bibuma mikama mye batu (100), ne byoko bibuma meku me batu metanyi(50). 41Zezu aboko pembe itanyi ne beswi bole, asikule mɨsa ikulu avʉtise Nzambi live ne bila. Zezu atsɨtaka pembe, akaba ne bebingi bedzi, ne ukabaka batu. Zezu avele kabaka beswi bole ne batu besi. 42Batu besi badza ne bangu bayula. 43Bebingi babapa biliyi bye pembe ne beswi bevʉka byangu byesi bya lundise membele iku ne mole. 44Batu bedza bila byabu bedze ni meku me mebaka mikama meku metanyi (5000).
Zezu alanda kule dzanga
(Mat 14.22-33; Zan 6.15-21)
45Yumana, ye Zezu eluma bebingi bedzi ne ubita se mbungu, yayu bangu bebandaka lɨbusu ledzi ngulu ye dzanga, kwele ye ngundu ye Betsayida. Ndili yayu wangu mene edze ne ufumba vʉtise batu mesombo me bangu. 46Ndili ye Zezu emana vʉtise bangu, yedzi etse kule kudzi ne ubondo. 47Ndili ye vʉsa ve yinda, mbungu yedze ni tima ye dzanga, Zezu evʉka ni wangu mene kule kudzi. 48Sudzi ye Zezu eyene ati bebingi bedzi bedze ne udzuka mbungu ne udilu vesi ne ipepe dzedze ne ukukudze kwele ye bangu. Ndili ye besusu bewika bilongo, Zezu alanda kule dzanga ne utse kwele bebingi bedzi, wangu efumba takwe bangu. 49Ndili ye bangu beyene wangu alanda kule mangu, bangu beyiba nati uŋkuku, ye bangu bewula misima. 50Bangu bewula misima ne bangu besi beyene wangu, ye bangu beyene bongo amene. Ni Zezu awowe ne bangu mesadzi, atanda ne bangu ati: «Sundisayi milima, yedzi ni me! Beyi nde yene bongo!» 51Wangu amana tanda vavu, yedzi ebita se mbungu, kone bangu, ye ipepe dze sele. Bebingi bedzi bakima kate kima amene. 52Ni bangu beke yuka mesuta ndili ye Zezu ekabaka pembe. Bangu beke yuka me Zezu epika.
Zezu asaka mibedzu se ilongo dze Zenezaleti
(Mat 14.34-36)
53Zezu bane bebingi bedzi bemana save dzanga, ye bangu bedzanga se ilongo dze Zenezaleti. 54Ye bangu besunda se mbungu ne batu bayimba Zezu si wawu. 55Ye batu bedze ne utanga membangu se ilongo dzesi, ye bangu bedze ne uya ne mibedzu kule bikala, Pakɨsi buma ye bangu biyuka ati Zezu adzi wawu! 56Pakɨsi buma ye Zezu etse, se membuka, se bingundu, se bibanzi, ye batu biya ne mibedzu se bibuma byabu ne ubondoko wangu, ye bangu bitanda nedzi ati: «Dzika mibedzu mye betime si ne soko ye ingoyi dzowe!» Besi bibetime nedzi balunga.
Currently Selected:
Malk 6: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
