Malk 3
3
Zezu asaka muutu vʉsa ve idzundu
(Mat 12.9-14; Luk 6.6-11)
1Yumana, Zezu avʉtse se ndaku ye umbondu. Awawu yedze ne muutu wedze ne leme se boko. 2Batu be Falizi bedze ne uwaya Zezu ne uyene nda wangu isakele muutu wayu vʉsa ve idzundu, ne bangu bifumba pɨta wangu. 3Ye Zezu etanda ne muutu wedze ne leme se boko ati: «Telime, we dze wa, busu ve batu besi.» 4Yedzi esuŋwule ne bangu ati: «Ye bituka pika vʉsa ve idzundu niyi? Upika mamvu meve? Na mamvu mebi? Usaka muutu na ubuuma wangu?» Ni bangu beke kalule wangu. 5Zezu awaya bangu besi ne kamve yesi, wangu eyene ubi amene ne bangu nde tondo yuka. Yedzi etanda ne muutu mene ati: «Simvɨle boko.» Muutu asimvɨle boko, ne boko ya lunga. 6Ndili mene mbotu, batu be Falizi bapula se ndaku ye umbondu. Palikɨse bangu bakukene bane batu be yimvu ye Elodi ne uyene nda bangu bibuuma Zezu.
Batu beyitsi baye kwele Zezu
7Zezu atse bane bebingi bedzi uŋkolo ŋwe dzanga dze Ngalilee, ne batu beyitsi bedze ne ubinga wangu. Batu bedze ne uyinga Ngalilee ne Zudee, 8ne ubanda Zeluzalemi, Idumee ne be ilongo dze ngulu ye Zulʉde, be ilongo dze Tili ne dze Sidoni. Mikuka mye batu myedze ne uya yene Zezu ne bangu beyuka me Zezu edze ne upika. 9Ye Zezu etanda ne bebingi bedzi ati: «Yebisayi me mbungu, toko batu ba, bapinyaka me.» 10Ni, nda Zezu edze ne usaka batu beyitsi, batu besi bedze ne mebedzu bedze ne uya ne mbangu kwele ye Zezu ne ufumba betime nedzi. 11Ndili ye batu bidzi ne mimbiti se nyulu beyene Zezu, ye bangu bevʉna mebongo busu vedzi ne uwula misima ati: «We ni Ŋwana we Nzambi.» 12Ni Zezu atanda ne bangu ne singa ati: «Beyi nde tanda me beyi biyiba kule yami.»
Zezu atobo betuma bedzi iku ne bole
(Mat 10.1-4; Luk 6.12-16)
13Yumana, Zezu atse kule kudzi, abanga batu bedzi etondo, ye bangu betse kwele yedzi. 14Yedzi etobo batu iku ne bole, yedzi luka bangu kumvu ye betuma be Zezu. Wangu epika vavu nati bangu bedze konedzi ne uluma bangu ne utse tandaka misisili mive. 15Wangu akaba bangu ne singa ye upanza mimbiti. 16Yene betuma iku ne bole bedzi etobo: Simo, we Zezu eluka kumvu ye Pyeli, 17Zaaki ne ŋwana mama wedzi Zan, bangu besi bole baana be Zebedee, Zezu aluka bangu kumvu ye Bowanelenge, avavu nati: «Baana be ngadzi», 18Andeli, Filipi, Batelemi, Matye, Toma, Zaaki, ŋwana we Alife, Tadee, Simo we itondo dzanza, 19ne Zuda Isɨkalyoti, witse sumbise Zezu.
Yali ye Zezu ye fumba bapa wangu ulayi ne uŋkuka
20Yumana vavu, Zezu aye vʉtse ndaku. Uŋkuka uneni ŋwavele kukene. Utsɨna ne uŋkuka ŋwe Zezu bane bebingi bedzi nde ne tuka dza bila. 21Ndili ye yali yedzi ye yuka vavu, ye bangu beya boko wangu ne singa ne utse nedzi, ye bangu bedze ne utanda ati: «Zezu ayikwe ni suwa!»
Zezu akalule ne batu bepɨta wangu
(Mat 12.22-32; Luk 11.14-23; 12.10)
22Belakɨsi be bitsɨla, beyinga Zeluzalemi batanda ati: «Se nyulu ye Zezu, yedzi ne Sata kuŋwu we mimbiti, Sata ni we ikaba wangu pɨlaka ye upanza mimbiti.» 23Ye Zezu ebanga bangu awowe ne bangu ne unlimvɨle ati: «Sata atuka panza Sata nivi? 24Ndili ye batu be ilongo dzotu bilwana ibadzi tima bangu mene, ilongo dzadzu nde tuka vele dze. 25Ne ndili ye batu be umoyi votu bilwana tima ye bangu mene, ne umoyi vavu nde tuka vele dze. 26Ni ti Sata alwana ibadzi nedzi mene, avavu nati Sata alewe medzi mene ipika ne ukani vedzi nde tuka nyuŋwe, ne vangu nde tuka vele dze.
27Nde muutu tine motu we ituka nyidzile se ndaku ye muutu widzi ne singa ayiiba Untamvu ŋwedzi, ti wangu asande kutaka muutu wayu mikodzi. Wangu ti amana kutaka muutu wayu mikodzi atuka yiiba byesi bidzi se ndaku yedzi. 28Me tanda beyi, ni umbu amene. Nzambi atuka boloko mesumu mesi me batu bipika. Atuka ne boloko metutsi me bitukene wangu widzi Nzambi. 29Ni muutu we itukene Fudzu ye Umpende, awayu nde tse tuka boloko wangu. Mesumu medzi medze ni umbu ne umbu.»
30Zezu ewowe vavu ni ne bangu betanda ati: «Wangu adzi ne umbiti se nyulu!»
Yali amene ye Zezu
(Mat 12.46-50; Luk 8.19-21)
31Yumana, mama we Zezu ne banzi bedzi baya. Bangu badze ituna, ye bangu beluma muutu ne utse banga wangu. 32Batu beyitsi bedze untsitsi badzenze Zezu, ye betanda wangu ati: «Mama wowe ne banzi bowe bedzi ituna, befumba yene we.» 33Ye Zezu ekalule ati: «Mama wami niza? Ne banzi bami ni beza?» 34Yedzi ewaya batu bedze badzenze wangu untsitsi ati: «Yenayi mama wami ne banzi bami. 35Yayu, muutu we ipika me Nzambi itondo, muutu wayu ni ŋwanzi wami, kadzi wami, mama wami.»
Currently Selected:
Malk 3: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
