Malk 15
15
Zezu busu ve Pilati
(Mat 27.1-2,11-14; Luk 23.1-5; Zan 18.28-38)
1Ne suka kwee, bekuŋwu be bekabi be bisemi bye Nzambi bakukene bane bibutu, belakɨsi be bitsɨla ne yimvu ye bepami be Bezwifi. Bangu bakutaka Zezu mikodzi, ye bangu bebapa wangu kwele ye Pilati. 2Pilati asuŋwule ne Zezu ati: «We ni kani we Bezwifi?» Zezu akalule wangu ati: «We ni we itanda.» 3Bekuŋwu be bekabi be bisemi bye Nzambi bapɨta Zezu mamvu meyitsi. 4Ye Pilati evele suŋwule wangu ati: «We nde kalule? We yuka mamvu meyitsi me bangu bitanda kule yowe ma?» 5Ni Zezu eke kalule dzamvu tine dzotu, ye Pilati ekima.
Bapama Zezu ati uve wangu awaa
(Mat 27.15-26; Luk 23.13-25; Zan 18.39–19.16)
6Me tsɨnda me Paki mesi, uve Pilati apusa muutu motu se ungenenge, muutu we uŋkuka witondo ati apula. 7Yedze ne muutu motu we kumvu Balabasi wedze ungenenge bane bembatsi bedzi, ne bangu bebuuma muutu ndili ye fuŋwule tima ye bangu ne batu be Lomi. 8Batu batse pesi ye Pilati. Bangu basuŋwule nedzi ati: «Pika besu nda wipika keke ne kala.» 9Pilati akalule ne bangu ati: «Beyi befumba nati melekise beyi kani we Bezwifi?» 10Ni Pilati ayiba ati bekuŋwu be bekabi be bisemi bye Nzambi bekaba wangu Zezu ni ne kʉna. 11Ni bekuŋwu be bekabi be bisemi bye Nzambi basikise uŋkuka ne usuŋwule Pilati ati: «Alekise besu Balabasi!» 12Pilati avele suŋwule ne uŋkuka ati: «Ye beyi bifumba ati me pika ne we beyi bibanga kani we Bezwifi niyi?» 13Batu besi bakalule nedzi ne singa ati: «Komidze wangu kule koko ye beliningise!» 14Pilati asuŋwule bangu ati: «Dzamvu dzibi dzedzi me pika niza?» Ni bangu bavele yebise wowe yanga yanga ati: «Komidze wangu kule koko ye beliningise!» 15Ye Pilati epika nda uŋkuka ŋwe tondo, yedzi epusa bangu Balabasi, aluma ne ubuuma Zezu luba ne mimbisa. Yumana vavu, yedzi ekaba wangu ne bewolo ne ukomidze wangu kule koko ye beliningise.
Bewolo basewe Zezu
(Mat 27.27-31; Zan 19.2-3)
16Bewolo babapa Zezu se lipangu le lipatima, ye bangu bebanga bewolo besi. 17Bangu baswise wangu ingoyi dze lwi, batunga linzi ne bitatsi bye mesendile basatse kule mulu ŋwedzi. 18Ye bangu bedze ne unyusile wangu ati: «Wa nyuse, kani we Bezwifi!» 19Ye bangu bedamaka wangu kule mulu ne Lisetse lidzi uŋkolo ŋwe unsulu, batsutsule wangu meteyi bavʉna mebongo busu vedzi ne udondime nzii sɨna. 20Ndili ye bangu bemana sewe wangu, bangu bananguse wangu ingoyi dze lwi, bavʉtise wangu mikanda myedzi mene. Ye bangu bebapa wangu ituna ne utse komidze wangu kule koko ye beliningise.
Bakomidze Zezu kule koko ye beliningise
(Mat 27.32-44; Luk 23.26-43; Zan 19.17-27)
21Muutu we Silene, we kumvu Simo, tata we Alekesandi ne we Lufuse, edze ne usuta wawu, wangu eyinga ni mekuba. Bewolo baluma wangu ne ubapa koko ye beliningise ye Zezu. 22Bangu batse ne Zezu kwele ye buma ye kumvu Golgota, avavu nati: «Buma ye ko-ko ye mulu.» 23Bangu befumba kaba wangu melaku me bevukise ne yila ye kumvu mile. Ni Zezu alewe noto melaku mene. 24Yumana vavu, ye bangu bekomidze wangu kule koko ye beliningise, ye bangu beyisa ndamvu ne uyene muutu wiboko mengoyi medzi, ye bangu bekabene mengoyi tima ye bangu. 25Yedze ni ne suka, musa ŋwedze waki banda bala ye bangu bekomidze Zezu kule koko ye beliningise. 26Kule ibaya batende utsɨna ve bebuuma wangu ati: «kani we Bezwifi». 27Bewolo bakomidze ne mipɨta myole kule koko ye beliningise kone Zezu, motu kwele ye boko ye sangwe ne moko kwele ye boko ye ŋwadzi. 28[ Sangunvu ye Umpende ye tanda ati: «Yetse ya ni vavu. Yangu ye tanda ati: Betala wangu tima ye mipɨta.»]
29Batu bedze ne usuta banyingise myulu, batukene wangu, ati: «We fumba tsala ndaku ye Nzambi witi we tunga yangu ne masi mesatu, 30lungise nyulu yome we mene, sunda kule koko ye beliningise!» 31Ne bekuŋwu be bekabi be bisemi bye Nzambi ne belakɨsi be bitsɨla basewe Zezu, ye bangu bewowe tima ye bangu ati: «Wangu we lungise batu, ni ka lungise ne nyulu yedzi mene! 32Yayu, Mesiya, kani we Izayeli, ka sunda kule koko ye beliningise! Besu ti bayene vavu, yayu besu bemekidze medzi itanda!» Batu be bekomidze kone Zezu ne bangu batukene wangu.
Lɨku le Zezu
(Mat 27.45-56; Luk 23.44-49; Zan 19.28-30)
33Tima ye musa, vʉsa va yinda se ilongo dzesi, nzii mbisa ye ngunga. 34Yumana mendili mamu, Zezu awula unsima ne singa ati: «Eli, Eli, lema sabatani?» Avavu nati: «Nzambi wami, Nzambi wami, yowe me dzika me niyi?» 35Tima ye batu bedze wawu, boko bayuka medzi edze ne utanda, ye bangu betanda ati: «Wangu abanga Eli!» 36Muutu motu atse ne mbangu aboko ivʉya atsuba se melaku me nganye akuta ne Lisetse akaba Zezu, ati wangu anoto. Yedzi etanda ati: «Ke bukayi, bebe beyenele nda Eli iyele sundise wangu kule koko ye beliningise!» 37Ni Zezu awula unsima uneni yedzi etsunyive.
38Ye lembe yedze umbele ŋwe ndaku ye Nzambi ye nyasuve tima biliyi byole ne ubanda ikulu nzii sɨna. 39Kuŋwu we bewolo be Lomi, wedze busu ve Zezu, ayene nda wangu ewaa yedzi etanda ati: «Muutu yu edze ni Ŋwana we Nzambi amene.» 40Yedze ne baatu wawu, bedze ne uwaya ne ulayi. Tima ye bangu yedze ne Maliya we Mangidala, Maliya mama we Zaaki we iwanzi ne Zose ne Salomee. 41Bangu ni bebinga Zezu ne bangu bedze ne udzanza nedzi, ndili yedzi edze Ngalilee. Yedze wawu se ne baatu boko beyitsi betse nedzi Zeluzalemi.
Zozefi asodze tsinzi ye Zezu se mesongo
(Mat 27.57-61; Luk 23.50-56; Zan 19.38-42)
42Yedze ni ne ikolo, dze biyebise mamvu me itsɨnda, dze vʉsa ve idzundu dzibanda mbisa yana ne suka. 43Ndili ye muutu we kumvu Zozefi we ngundu ye Alimati eya. Wangu edze ni umpami motu we yimvu ye bepami be Bezwifi. Nedzi se abuka Ukani ve Nzambi. Zozefi akuta utsulu atse pesi ye Pilati ne udzuka tsinzi ye Zezu. 44Ni Pilati akima nedzi eyuka ati Zezu awaa. Yedzi ebanga kuŋwu we bewolo asuŋwule wangu ati: «Zezu anyuŋwe ne uwaa?» 45Wangu amana yuka me kuŋwu we bewolo etanda wangu, ye Pilati etanda ne ukaba Zozefi tsinzi ye Zezu. 46Zozefi asumba lembe. Asundise tsinzi kule koko ye beliningise, wangu akutaka tsinzi se livuŋwu asodze se mesongo me beluma se imanya. Yumana adzuba dzasa dze mesongo ne imanya dzineni. 47Maliya we Mangidala ne Maliya mama we Zose bedze ne uwaya buma ye bisodze Zezu.
Currently Selected:
Malk 15: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
