Malk 16
16
Zezu anyuse se lɨku
(Mat 28.1-8; Luk 24.1-12; Zan 20.1-10)
1Ndili ye vʉsa ve idzundu ve suta, Maliya we Mangidala, Maliya mama we Zaaki ne Salomee basumba madzi me bevukise ne unyombo ne utse suwaka kule tsinzi ye Zezu. 2Vʉsa ve tsupulu ne suka kwee, ndili ye musa wibala, bangu batse mesongo. 3Ye bangu bedze ne utanda tima ye bangu ati: «We itemisele bebe imanya dze bedziba umbele ŋwe mesongo niza?» 4Ni ndili ye bangu bewaya, bangu bayene ati imanya dzineni dzedze se umbele, bamana temise dzangu badzika kwele. 5Bangu banyidzile se mesongo, bayene ŋwana iwanzi untsitsi kwele boko ye sangwe, aswa mengoyi me fuu, ye baatu beyene bongo. 6Ni wangu atanda ne bangu ati: «Beyi nde yene bongo, beyi befumba ni Zezu we Nazaleti, we bekomidze kule koko ye beliningise, anyuse se lɨku, wangu nde wuya. Wayayi, yene buma ye beyala wangu. 7Yayu tsekayi tanda ne bebingi bedzi, ne Pyeli ati: “Zezu abuka beyi Ngalilee. Beyi betse yene wangu wawu, nda wangu etanda beyi.”» 8Baatu bapula se mesongo batse ne membangu, ne bangu bedze ne utsɨkite ne bayi yesi. Bangu beke tanda ne muutu tine motu, ne bangu bedze ne bongo.
Zezu alaka Maliya we Mangidala nyulu
(Mat 28.9-10; Zan 20.11-18)
9Vʉsa ve tsupulu ne suka, Zezu anyuse se lɨku. Wangu abanda laka nyulu ne Maliya we Mangidala. Wedzi epanza mimbiti uŋtsami myedze se nyulu yedzi. 10Maliya we Mangidala atse tanda ne bebingi bedzi medzi eyene. Bebingi be Zezu bedze se ndoko, bangu balila. 11Ni ndili ye bangu beyuka Maliya atanda ati: «Zezu adzi mongo, ma yene wangu!» Bangu beke mekidze medzi etanda.
Zezu alaka bebingi bedzi bole nyulu
(Luk 24.13-35)
12Yumana vavu, Zezu alaka bebingi bedzi bole nyulu ye bangu bedze ne utse bibanzi. 13Bangu bole baye vʉtse ne utanda boko, ni nde we mekidze me bangu betanda.
Zezu alaka betuma bedzi iku ne motu nyulu
(Mat 28.16-20; Luk 24.36-49; Zan 20.19-23; Dzan 1.6-8)
14Ye Zezu elaka betuma bedzi iku ne motu nyulu, ndili ye bangu bedze ne udza bila. Wangu akamve ne bangu ne bangu bedze nde ivʉkidze, ne bangu bedze ne milima udilu. Wangu atanda ne bangu ati: «Beyi bake mekidze me batu beme yene me mongo, beme tanda beyi.» 15Yumana Zezu atanda ne bangu ati: «Tsekayi se ilongo dzesi, tandakayi misisili mive ne batu besi. 16Muutu witse mekidze, wangu atse boko meteme atse lunga, ni we nde tse mekidze atse kwa uŋkwaka. 17Yene mendimvu mitse sukidze batu bitse mekidze: ne kumvu yami bangu betse panza mimbiti, betse wowe muyi metsaŋwe. 18Bangu betse kwata betadzi ne meboko me bangu, betse tuka noto unlunga bangu nde tse yukuve mbozi. Bangu betse satse meboko kule mibedzu ye myangu milunga.»
Zezu avʉtse kone Nzambi
(Luk 24.50-53; Dzan 1.9-11)
19Wangu amana wowe ne bangu vavu, Kuŋwu Zezu abita ikulu yedzi esunda untsitsi kwele ye boko ye sangwe ye Nzambi. 20Bebingi be Zezu batse se bibuma byesi ne utandaka misisili mive. Kuŋwu adzanza bane bangu, akaba bangu singa ye upika mamvu me likimiyinda. Wangu alaka ati, me bebingi bedzi bitanda ni umbu.
Currently Selected:
Malk 16: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
