Malk 11
11
Zezu anyidzile se Zeluzalemi
(Mat 21.1-11; Luk 19.28-40; Zan 12.12-19)
1Ndili ye Zezu bane bebingi bedzi, betsindene kone Zeluzalemi ne membuka me Betafazi ne ye Betani, midzi kone kudzi ye Olivye, tima ye bebingi bedzi Zezu aluma bebingi bole lɨbusu. 2Wangu atanda ne bangu ati: «Tsekayi se mbuka yidzi busu ve beyi. Ndili ye beyi bikalwe, beyi beyenele ŋwana we bodzi ye kumvu ane bakuta. Bodzi yayu muutu asande bita kule yangu. Nyangulayi yangu, yakayi me ne yangu. 3Muutu ti asuŋwule beyi ati: “Ye beyi bipika vavu niyi?” Tandayi wangu ati: “Kuŋwu adzi ne unyingu, ni wangu avʉtisele yangu tsaŋwe.”»
4Ye bebingi betse bakobise ŋwana bodzi ituna kone peyi, bakuta busu ve umbele ŋwe ndaku. Ye bangu benyangule bodzi. 5Ye bangu bedze ne unyangule bodzi, batu basuŋwule ne bangu ati: «Ye beyi binyangule ŋwana bodzi, niyi?» 6Ye bangu bekalule ne bangu nda Zezu etanda, ye bedzika bangu batse. 7Bebingi babapa bodzi kwele ye Zezu. Bangu basatse mikanda mye bangu kule bodzi, ye Zezu esunda untsitsi kule bodzi. 8Batu beyitsi bayalaka mengoyi me bangu kule peyi ne boko bitsele bye mebɨla bye bangu betsɨtaka se mekuba. 9Batu bedze ne ulanda busu ve Zezu ne bedze ne ubinga wangu bedze ne uwula misima ati: «Likʉma le Nzambi! Yayu Nzambi akaba meve ne wiya ne kumvu ye Kuŋwu! 10Nzambi akaba meve ne ukani viya, ukani ve Davidi tata we bebe! Likʉma le Nzambi kate ikulu amene!» 11Zezu adzanga se Zeluzalemi, anyidzile se ndaku ye Nzambi. Amana waya byesi bidzi konedzi, Zezu atse Betani bane bebingi bedzi iku ne bole, yedze ni yaya ikolo.
Zezu aloko ŋwili ŋwe kumvu Figye
(Mat 21.18-19)
12Buye ne suka, ndili ye bangu beteme Betani, nzala ya kwata Zezu. 13Wangu ayene ŋwili ŋwe kumvu figye ne mekayi, ne ulayi, wangu atse waya toko wangu atuka bomo mbulu ye figye, ni ndili yedzi etsidene kone ŋwili, wangu ayene si kayi itu, ne yangu ye ke dze siwu ye ŋwili ŋwe figye wibutu. 14Ye Zezu etanda ne ŋwili ŋwe kumvu figye ati: «Muutu tine motu nde tse vele dza mbulu yowe!» Ne bebingi bedzi bayuka medzi etanda.
Zezu se ndaku ye Nzambi
(Mat 21.12-17; Luk 19.45-48; Zan 2.13-22)
15Zezu adzanga se Zeluzalemi. Wangu anyidzile se ndaku ye Nzambi, yedzi ebanda ne upanza besumbisi ne bedze ne usumba bineni se buma yayu, abundile bitabɨli bye batu bedze ne uyikule bedolo, abundile ne bifanza bye batu bedze ne usumbise bembinga. 16Wangu eke dzika muutu tine motu abapa yila ne unyidzile ne yangu se ndaku ye Nzambi. 17Yumana, yedzi elakɨse batu ati: «Se Bisanguvu bye Umpende Nzambi atanda ati: “Betse banga ndaku yami ni ndaku ye umbondu ye batu besi.”» Ne Zezu avele tanda ne bangu ati: «Ni beyi, bayikule yangu ndaku ye beyiibi!» 18Bekuŋwu be bekuŋwu be bekabi be bisemi bye Nzambi ne belakɨsi be bitsɨla beyuka mesuta ye bangu befumba nda bangu bibuuma Zezu, ni bangu bedze ne bongo vedzi ne batu besi bedze ne ukakise bilakɨsili byedzi. 19Ndili ye ikolo, Zezu bane bebingi bedzi bateme se ngundu.
Ivʉkidze ne umbondu
(Mat 21.20-22)
20Buye ne suka, ye bangu bedze ne usuta uŋkolo ŋwe peyi, bangu bayene figye we Zezu eloko. Akanye wesi nzii mikanga. 21Pyeli ayivɨle mesuta yedzi etanda ne Zezu ati: «Kuŋwu, waya, figye wowe eloko akanye wesi.» 22Ye Zezu etanda ne bebingi bedzi ati: «Me tanda beyi, ni umbu amene. Dzayi ne ivʉkidze ne Nzambi. 23Muutu ti atanda ne kudzi yi ati: “Teme wawu naŋwe se nzali ye metsimba”, ti wangu nde mesuna se unlima ŋwedzi, ni wangu amekidze ati medzi me tanda metse ya, metse ya si nda wangu me tanda. 24Yene utsɨna, vami itanda beyi miti ndili ye beyi bimbondo ne udzuka yila, mekidzayi witi beyi bamana bomo ne Nzambi atse kaba beyi yila yayu. 25Ne ndili ye beyi bidzi untele ne umbondo, ti wedzi ne dzamvu ne muutu, boloko wangu, yayu ne Tata we beyi widzi ikulu aboloko beyi ne mamvu mebi me beyi beme pika. 26Ni ti beyi bake boloko boko, Tata we beyi widzi ikulu nde tse boloko beyi mamvu mebi me beyi beme pika.»
Ukani ve Zezu ve yinga niwi?
(Mat 21.23-27; Luk 20.1-8)
27Zezu bane bebingi bedzi bavele vʉtse se Zeluzalemi. Ndili ye Zezu edze ne ulanda se ndaku ye Nzambi, bekuŋwu be bekuŋwu be bekabi be bisemi bye Nzambi, ne belakɨsi be bitsɨla ne bibutu baya kone Zezu. 28Bangu basuŋwule nedzi ati: «We pika mamvu mamu ni ne singa yeza? Wangu we me kaba we singa yayu niza?» 29Zezu akalule ne bangu ati: «Me kaba beyi uŋdzitsi ŋwotu, ti beyi bakalule me, yayu nami me tanda beyi we me kaba me ukani ne upika mamvu ma. 30We luma Zambatisi ne ukaba batu meteme niza? Nzambi na batu?» 31Ni bangu bedze ne uwowe tima ye bangu ati: «Ti bebe bakalule ati: “Nzambi ni we luma Zan”, Zezu asuŋwulele bebe ati: “Ni ye beyi beke mekidze me Zan etanda niyi?” 32Ni bebe ti bakakule ati: “Batu ni beme luma wangu...”?» Bangu bedze ne bongo ve uŋkuka ne batu besi betsimene ati Zambatisi edze ni Muutu we Nzambi amene. 33Ye bangu bekalule ne Zezu ati: «Besu nde yiba.» Zezu akalule ne bangu ati: «Yayu nami me nde tanda beyi we kaba me pilaka ye upika mamvu ma.»
Currently Selected:
Malk 11: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
