Malk 10
10
Sadzi ye Zezu se Zudee
(Mat 19.1-12; Luk 16.18)
1Yumana vavu, ye Zezu ateme wawu. Atse se ilongo dze Zudee, ngulu ye nzali ye Zulʉde. Batu beyitsi bavele kukene konedzi, yedzi elakɨse batu, nda wangu ibanda keke lakɨse. 2Batu be yimvu ye Falizi batsindene kone Zezu, bangu befumba ni dendise Zezu unlamvu ye bangu bisuŋwule nedzi ati: «Unlumi atuka panza ŋwadzi wedzi?» 3Zezu akalule ne bangu ne uŋdzitsi ati: «Tsɨla ye Moyizi ekaba beyi niza?» 4Bangu bakakule nedzi ati: «Moyizi etanda ne unlumi ne utende sanguvu ye utanda ne ŋwadzi wedzi ati ibala dza siya, yumana yedzi ipanza ŋwadzi.» 5Ye Zezu etanda ne bangu ati: «Moyizi etende tsɨla yayu ni ne beyi bidzi ne unlima udilu. 6Ni se mebandu, ndili ye Nzambi ewanga mesi, ''wangu awanga ibaka ne ŋwatu''. 7Yene utsɨna ve ibaka dzitse teme kone ne tata ne mama wedzi ne ulanda bane ŋwadzi wedzi peyi mbotu, 8ye bangu bole biyikwe muutu motu. Yayu, bangu baya kaka batu bole, ni muutu motu. 9Yayu, utsɨna ne vavu ne muutu nde tsala bye Nzambi evʉkise.» 10Ndili ye bangu bevʉtse ndaku, ye bebingi bedzi bevele kaba Zezu midzitsi ne dzamvu dzadzu. 11Zezu akakule ne bangu ati: «Ndili ye muutu ilewe ŋwadzi wedzi, akwele ŋwatu moko, muutu wayu adzi ni se ukali busu ve ŋwadzi we wika, 12ne ndili ye ŋwadzi ilewe unlumi akwele ibaka dzoko, nedzi adzi ni se ukali.»
Zezu ayamba baana bete
(Mat 19.13-15; Luk 18.15-17)
13Batu baya ne baana bete kwele ye Zezu ati wangu asatse bangu meboko. Ni bebingi be Zezu basimba bangu. 14Ndili ye Zezu eyene vavu, yedzi ekamve ne bebingi bedzi ati: «Dzikayi baana bete beya kwele yami. Beyi nde simba bangu, Ukani ve Nzambi ni ve batu bidzi nda baana bete. 15Me tanda beyi, ni umbu amene, muutu we nde yamba Ukani ve Nzambi nda ŋwana unte, muutu wayu nde tse tuka nyidzile se vangu.» 16Yumana, Zezu aboko baana bete se meboko medzi asatse bangu meboko kule myulu, akaba bangu meve.
Muutu we Untamvu
(Mat 19.16-30; Luk 18.18-30)
17Ndili ye Zezu efumba ne utse, muutu motu aya ne mbangu, avʉna mebongo busu vedzi asuŋwule nedzi ati: «Kuŋwu we umve, me pika nivi? Ne ubomo libɨku le nde siya.» 18Zezu akalule nedzi ati: «We banga me kuŋwu we umve ni neyi? Nde muutu we umve, widzi umve si Nzambi. 19We yiba witi bitsɨla bye Nzambi, bye tanda ati: “We nde buuma muutu, we nde kwa se mekali, we nde yiiba, we nde tanda me udzuma kule muutu, kuuna tata ne mama wowe.”» 20Muutu mene akalule ne Zezu ati: «Kuŋwu, me banda kuuna bitsɨla byabu ni me saka iwanzi.» 21Zezu awaya wangu ne itondo dzesi yedzi etanda nedzi ati: «Yedzi ne yila yotu, yowe asande pika, sumbise byesi byowe idzi ne byangu, we kabaka bedolo ne batu bidzi mimvuvu, yayu we bomo Untamvu ŋwe ikulu, yowe imana, waya binga me.» 22Ni ndili ye muutu mene eyuka me Zezu ewowe, wangu adze zunzulu, nedzi idzi ne Untamvu amene.
23Zezu awaya bebingi bedzi, bedze konedzi, atanda ne bangu ati: «Yedzi ne udilu amene ne batu bidzi ne Untamvu ne unyindzile se Ukani ve Nzambi!» 24Bebingi bedzi bakima ne medzi edze ne uwowe, ni Zezu avele tanda ne bangu ati: «Bembatsi bami, yedzi ne udilu amene ne unyidzile se Ukani ve Nzambi! 25Bodzi yineni#10.25 Yedzi ni nyama we uneni we bibangu ne lifala samo. ye kumvu samo ye tuka nyinzile nda ŋwangu se ibunga dze sodze, ni yedzi ne udilu ne muutu widzi ne untamvu ne unyindzile se Ukani ve Nzambi.» 26Bebingi bedzi bakima kata kima amene, ye bangu bewowe tima ye bangu ati: «Yayu witse tuka lunga niza?» 27Zezu awaya bangu atanda ne bangu ati: «Me batu nde tuka pika, Nzambi atuka ni Nzambi atuka pika mamvu mesi.» 28Ye Pyeli etanda ne Zezu ati: «Besu badzika bye besu byesi ne ubinga we.» 29Zezu akakule nedzi ati: «Me tanda beyi ni umbu amene, ti muutu adzika ndaku yedzi, na banzi bedzi, bekadzi bedzi, mama ne tata wedzi, baana bedzi, mekuba medzi, utsɨna nami ne misisili mive, 30byedzi itse bomo byetse dze ni bidzuku mikama myole. Wangu atse bomo mendaku, banzi, bekadzi, bemama, baana ne mekuba, wangu atse bomo ne membaba mesi utsɨna nami, ne se mendili mitse ya, wangu atse bomo libɨku Le nde siya. 31Ni batu beyitsi bidzi lɨbusu lolo betse vʉtse limbisa, ne bidzi limbisa lolo betse tse lɨbusu.»
Zezu atanda dzuku ye unsatu lɨku ledzi ne binyusili byedzi
(Mat 20.17-19; Luk 18.31-34)
32Bangu bedze ne peyi ne utse Zeluzalemi. Zezu edze ne ulanda busu ve bebingi bedzi, bedze ne bayi, ne bedze ne ubinga bangu bedze ne bongo. Zezu avele boko betuma bedzi iku ne bole, ne uwowe ne bangu medze makɨtse ya kule yedzi. 33Wangu atanda ne bangu ati: «Yukayi, bebe betse Zeluzalemi, awawu we yikwene Muutu betse tsɨna wangu ne bekuŋwu be bekabi be bisemi bye Nzambi ne belakɨsi be bitsɨla. Bangu betse pama wangu ati, uve wangu awaa, betse kaba wangu se meboko me batu be nde yiba Nzambi. 34Batu betse sewe wangu, betse tsutsule wangu meteyi, betse damaka wangu mimbisa, ye bitse buuma wangu. Ni masi mesatu mesuta, yedzi itse nyuse se lɨku.»
Zaaki ne Zan badzuka Zezu yila
(Mat 20.20-28)
35Yumana, ye Zaaki ne Zan baana be Zebedee, beya kone Zezu. Bangu batanda nedzi ati: «Kuŋwu, besu befumba ati, we pika me besu bitandele we.» 36Zezu atanda ne bangu ati: «Me beyi bifumba ati me pika beyi ni meza?» 37Bangu bakalule nedzi ati: «Ndili yowe itse dze se Ukani vowe ve likʉma, wa sundise besu untsitsi kono we, Ayu ne boko yowe sangwe ne moko ne boko yowe ye ŋwadzi.» 38Ni Zezu atanda ne bangu ati: «Beyi nde yiba bye beyi bidzuka. Beyi betuka noto kopi ye membaba yami itse noto? Beyi betse mekidze ne uwaa nda mitse waa?» 39Ye bangu bekalule nedzi ati: «Besu betuka.» Zezu atanda ne bangu ati: «Beyi betse tuka noto kopi ye membaba yami itse noto? Beyi betse mekidze ne uwaa nda mitse waa? 40Ni mekaka we itobo bibuma bye batu bitse dze untsitsi se boko yami ye sangwe na boko yami ye ŋwadzi, ni Nzambi ni we itse kaba bibuma ne batu bedzi amana tobo.»
41Ndili ye bebingi boko iku beyuka vavu, bakamve ne Zaaki bane Zan. 42Ye Zezu ebanga bangu besi atanda ne bangu ati: «Beyi mene beyiba, ati bekani be melongo be pinyaka batu nda bekuŋwu. Ne batu beneni bedzangite kule bangu ne singa yesi. 43Ni tima ye beyi, mamvu nde suta vavu, muutu we ifumba dze muutu we uneni, uve wangu abanda dze uŋdzanzi we beyi. 44Ne tima ye beyi muutu we ifumba ne udze lɨbusu, abanda ne udze unyiika ŋwe batu besi. 45Yayu, we yikwene Muutu eke ya ati batu bedzanza wangu, ni wangu eya ni ye dzanza boko ne ukaba libɨku ledzi mene ne ulungise batu beyitsi.»
Zezu asaka muutu wedze nde mɨsa Batimee
(Mat 20.29-34; Luk 18.35-43)
46Zezu adzanga Zeliko. Ndili ye Zezu edze ne uteme se ngundu bane bebingi bedzi ne uŋkuka uneni. Muutu motu wedze nde mɨsa we kumvu Batimee, ŋwana we Timee, edze untsitsi uŋkolo ŋwe peyi ne ubembe bedolo. 47Ndili yedzi eyuka ati, yedze ni Zezu we Nazaleti, yedzi ewula unsima ati: «Zezu, Ŋwana we Davidi, yene me tsesi!» 48Batu beyitsi basimba wangu ati, loŋwe, ni wangu avele wowe yanga yanga ati: «Ŋwana we Davidi, yene me tsesi!» 49Zezu asita yedzi etanda ati: «Bangayi wangu.» Ye bangu bebanga wangu batanda nedzi ati: «Singise nyulu, telime, wangu abanga we.» 50Yedzi eyisa ingoyi dzedzi dzineni, atelime kutuku, atse kwele Zezu. 51Zezu asuŋwule nedzi ati: «Yowe itondo witi me pika we niyi?» Muutu we nde mɨsa akalule nedzi ati: «Kuŋwu, dzuvule me mɨsa me fumba vele yene.» 52Ye Zezu etanda nedzi ati: «Tseke ivʉkidze dzowe dza lungise we.» Palikɨse, yedzi eyene, yedzi ebinga Zezu se peyi.
Currently Selected:
Malk 10: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
