Malk 9
9
1Zezu avele tanda ne bangu ati: «Me tanda beyi, ni umbu amene batu boko bidzi wa ne beyi nde tse waa ye bangu besande yene nda Ukani ve Nzambi viya ne singa.»
Pyeli, Zaaki ne Zan bayene Zezu se likʉma le Nzambi
(Mat 17.1-13; Luk 9.28-36)
2Masi untuba masuta, Zezu aboko Pyeli, Zaaki ne Zan, wangu abapa bangu ulayi ne batu, kule kudzi yilayi. Zezu ayikule dzuŋwu busu ve bangu, 3mengoyi medzi mafuma fuu ngeyingeyi amene. Nde muutu tine motu kule senze we ituka pika ati mengoyi mefuma vavu. 4Palikɨse ye bebingi bedzi besatu beyene Eli ne Moyizi, bedze ne uwowe ne Zezu. 5Ndili ye Pyeli etanda ne Zezu ati: «Kuŋwu, adzi ni dzamvu dzive ye bebe bidzi wa. Bebe betunga membanza mesatu, mbotu yowe, mbotu ye Moyizi, ne mbotu ye Eli.» 6Ni Pyeli etanda vavu ni nedzi eke yiba nda wangu iwowe ne bangu besi besatu beyene bongo. 7Lingutsu la yinga ikulu la vʉngile wangu ne sisiŋwu yedzi. Se lingutsu mene dzuyi dza yinga ikulu ati: «Ayu ni Ŋwana wami, wami itondo ne unlima ŋwami ŋwesi. Yukayi wangu!» 8Palikɨse bebingi bawaya me kwele mesi, ni bangu beke vele yene muutu. Zezu wangu mene si wedze kone bangu. 9Sudzi ye bangu bedze ne usundaka kudzi, Zezu atanda ne bangu ati: «Beyi nde tanda ne muutu tine motu me beyi beme yene, nzii ne we yikwene Muutu inyuse se lɨku.» 10Bangu babata medzi etanda, ni bangu bawowe tima ye bangu ati: «Yedzi itanda ati unyuse tima ye bewaa vavu nati yi?»
11Yumana vavu ye bangu besuŋwule ne Zezu ati: «Ye belakɨsi be bitsɨla bitanda ati: “We ibanda ya ni Eli niyi?”» 12Zezu akalule ne bangu ati: «Eli ni we ibanda ya yebise mamvu mesi. Ni ye Bisanguvu bye Umpende bye tende ati, we yikwene Muutu atse yene membaba meyitsi ne batu betse ketule wangu niyi? 13Ni me tanda beyi miti, Eli edze aya, ne batu bapika wangu me bangu betondo, nda betende se Bisanguvu bye Umpende.»
Zezu asaka ŋwana unte wedze ne umbiti se nyulu
(Mat 17.14-21; Luk 9.37-43)
14Ndili ye bangu bedzanga kone bebingi boko, bangu bayene uŋkuka uneni ŋwa dzenze bangu. Belakɨsi be bitsɨla bedze ne uwowe ne bangu. 15Ndili ye batu beyene Zezu, bangu bakima. Ye bangu betse ne membangu ne utse nyusile wangu. 16Zezu asuŋwule ne bebingi bedzi ati: «Me beyi biwowe ne bangu ni meza?» 17Muutu motu se uŋkuka akalule wangu ati: «Kuŋwu, Maya we ne ŋwana wami we ibaka, wangu adzi ne umbiti ŋwe inyokile wangu, ŋwa dzika wangu tsɨna. 18Umbiti ŋwaŋwu ŋwe tuka kwata wangu Pakɨsi buma, ye ŋwangu ŋwe iyisa wangu se senze, ye meteyi mipula wangu se uŋdzumvu, yedzi ikweke mɨna, ne nyulu yedzi yaya si tinini. Ma suŋwule ne bebingi bowe ne upanza umbiti, ni bangu bake tuka panza umbiti.» 19Zezu atanda ne bangu ati: «Beyi, batu belolo, beyi nde ivʉkidze, me tse vele dze ne beyi ni nzii ndili yowi? Me tse tuka bata beyi ni nzii ndili yowi? Yakayi me ne ŋwana.» 20Baya wangu ne ŋwana. Ndili ye umbiti ŋwe yene Zezu, ye umbiti ŋwe nyingise ŋwana ne singa yesi. Ye ŋwana enaŋwe, abɨlɨnga se senze, ne meteyi mapula se uŋdzumvu. 21Zezu asuŋwule ne tata we ŋwana ati: «Mamvu me banda ne ŋwana ni ndili yowi?» Tata akalule ne Zezu ati: «Ye banda wangu si asaka ŋwana unte. 22Masi moko umbiti ŋwe lindeke wangu se ŋwunya ne se mangu, ne ufumba buuma wangu. Ni yene besu tsesi yamene besu, ti wa tuka!» 23Zezu akalule nedzi ati: «Yowe itanda witi: Ti wa tuka pika yila niyi? Muutu widzi ne ivʉkidze atuka pika mamvu mesi!» 24Ye tata we ŋwana ewula unsima ati: «Me dzi ne ivʉkidze, yamene me, nami nde ivʉkidze dziyitsi!»
25Zezu ayene ati batu beyitsi bakukene, yedzi ewowe ne umbiti atanda ne umbiti ati: «Umbiti ŋwe idzika ŋwana nde wowe, nde yuka, me luma we ne upula se nyulu ye ŋwana yu, we nde vele ye vʉtse se nyulu yedzi!» 26Ye umbiti ŋwe wula misima, anyingise ŋwana ne singa yesi, ye umbiti ŋwe pula. Ŋwana edze ni nda muutu wa waa, ne batu beyitsi batanda ati: «Wangu awaa.» 27Ni Zezu akwata ŋwana ne boko, atelɨmise wangu ne ŋwana atelime untele. 28Ndili ye Zezu etse ndaku, ye bebingi be Zezu bedze bane Zezu bangu mene, bangu basuŋwule ne Zezu ati: «Ye besu bake tuka panza umbiti ŋwaŋwu niyi?» 29Zezu akakule ne bangu ati: «Betuka panza umbiti nda ŋwaŋwu si ne umbondu.»
Zezu avele tanda dze lɨku ledzi ne nda wangu inyuse se lɨku
(Mat 17.22-23; Luk 9.43-45)
30Ndili ye bangu beteme wawu, bangu balinanga Ngalilee. Zezu eke tondo ati batu beyiba buma yedzi idzi. 31Zezu elakɨse bebingi bedzi ati: «We yikwene Muutu betse tsɨna wangu se meboko me batu. Bangu betse buuma wangu, masi mesatu mesuta, yedzi itse nyuse se lɨku.» 32Ni bebingi bedzi beke yuka medzi etanda bangu, ne bangu bedze ne bongo ne ukaba wangu midzitsi.
We itakwe boko ubuutu niza?
(Mat 18.1-5; Luk 9.46-48)
33Bangu badzanga Kapenayumi. Ndili ye bangu bidzi se ndaku, Zezu asuŋwule ne bebingi bedzi ati: «Me beyi bedze ne uwowe ne peyi ni meza?» 34Ni bebingi bedzi baloŋwe, ne ye bangu bedze ne peyi, bangu bewowe dze uyiba widzi buutu tima ye bangu. 35Ye Zezu esunda uŋtsitsi, abanga betuma bedzi iku ne bole, yedzi etanda ne bangu ati: «Ti muutu atondo dze lɨbusu, uve wangu adze limbisa le batu besi nedzi adze uŋdzanzi we batu besi.» 36Yedzi eboko ŋwana unte atedze tima ye bangu, akapɨte ŋwana se meboko medzi, yedzi etanda ne bangu ati: 37«Muutu we iyamba ŋwana nda yu utsɨna nami, ame yamba ni me. Ne muutu we iyamba me wayu, ake yamba me, ni wangu ame yamba ni we meluma me.»
Muutu we nde wunda bebe ni we bebe
(Luk 9.49-50)
38Zan atanda ne Zezu ati: «Kuŋwu, besu beme yene muutu motu apanza mimbiti ne kumvu yowe, ye besu beme fumba simba wangu nedzi nde se yimvu ye bebe.» 39Ni Zezu akakule ne bangu ati: «Beyi nde simba wangu, nde muutu wipika dzamvu dze likimiyinda ne kumvu yami, yumana wangu atanda dzamvu dzibi kule yami. 40Ni muutu we nde wunda bebe adzi ni we bebe. 41Me tanda beyi, ni umbu amene miti: “Muutu we ikaba beyi kopi ye mangu ne beyi bidzi be Kɨlisɨti, muutu wayu atse bomo yedzi kuwa.”»
Pikayi kebe beyi nde naŋwe se mesumu
(Mat 18.6-9; Luk 17.1-2)
42Muutu we inaŋwule ŋwana unte se mesumu tima ye beme mekidze me, wuku bakuta wangu imanya dzineni se tsʉngu bayisa wangu se nzali ye metsimba. 43Ti boko yowe ya luma we ne upika mamvu mebi, tsɨta yangu, wuku watse se libɨku amene ne boko yotu, ni kaka wa bata meboko mole, watse se ŋwunya ŋwe nde botse. 44Awawu, misongo midza nyulu nde waa ne ŋwunya ŋwe nde botse. 45Ti kulu yowe ya luma we ne upika mamvu mebi, tsɨta yangu, wuku watse ne kulu yotu se libɨku amene, ni kaka watse ne mekulu mole se ŋwunya ŋwe nde botse. 46Awawu, misongo midza nyulu nde waa, ne ŋwunya ŋwe nde botse. 47Ti dzɨsa dzowe ni dzi luma we ne upika mamvu mebi, nanguse dzangu, wuku watse ne dzɨsa dzotu se Ukani ve Nzambi. Kaka bayisa we ne mɨsa mole se ŋwunya ŋwe nde botse. 48Awawu, misongo midza nyulu nde waa, ne ŋwunya nde botse. 49Batu besi betse suta se ŋwunya ŋwe membaba, yetse dze ni nda bisomo metsimba se bila.
50«Metsimba ni yila yive, ni ti metsimba masamve, bevʉtise ngono ye metsimba ni neyi? Dzayi nda metsimba, landayi ne itavu ne boko ne beyi.»
Currently Selected:
Malk 9: WUM
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
