Filipiye 2
2
Kaka samisami bila onini o Kirisite
1Kirisite ampa be kawasi. Jya le nde lempa be mpari, be ŋa ovunuŋi nca Oduduma. Be ŋa jya lekuna bila nya ma ake bila baamo. Jaajaa, ka bwa ŋi? 2Ŋaa le lusa mi ma kase makaka mbuuru omo, lebaga jya lemo, otuma omo, bila ocimiŋi omo. 3Lendaga kasa ma kayira levuzu le abuga sikali ma jya le lekuma leli kiila kali, nkalave, leka samisami ŋa kacimiŋa ni abuga avuli be ove. 4Lendaga kasaga ni amono be otu, ŋaa lesaga ni amono se abuga. 5Be leka ŋa kabaraga ka ekiigi ma Kirisite Jezu.
6Nde, nde Njyami wo obu-obu,
ŋaa nde ki saga kakyele lemigi le kaka bila Njyami ma nde ŋi.
7Ŋaa aso ma kiigi ma nde, nde ndagi mon. Nde wooli biri ye oyiga.
Nde kirigi mva abalaga, ŋa aso amono yemiŋi ndi kiigi balaga.
8Nde swoli ma kaka samisami ŋa nde onyimi tii leku, ee, leku kayila lemaanji.
9Ŋa mabwa Njyami tesi nde kabiri ekara yulu, mpi nde nkuumu ye vuli ankuumu ma abuga aso.
10Njyami si bwa mabuni ma nkuumu Jezu, baari aso, nca yulu, kayila ncye ŋa ncina ncye, aka ma abwo,
11ŋa baari aso alyele ndi Jezu Kirisite Mfumu, ma lekuma le Njyami Taara.
Kata mva kawi nca okiri
12Mva bwa, abuga ami ajya, be lema alwono eyizigi e mi obu-obu, ntini ye kiigi mi bila be. Ŋaa yemiŋi yiga leselege sa keeli mi ŋa kali. Lesa mpari ma kasala ma kavyere ni be lemi vuuga, lesa lo ma katerege kuna ka ovuzu o Njyami. 13Kabila Njyami asala ma be ŋa nde abuna vuta be ma kajya ŋa ma kasa esima ba jii nde.
14Lesa aso eli be ki ŋiina ŋi eli lebila kali, 15mabwa be leka baari baali akini sa jaa ŋi, ba ka kata be ŋi. Be kamaka baana a Njyami eli maami maabi kali, kanca baari ba ompyele ŋa baabi. Kanca baari ba, ave be leta mva kawi nca okiri, 16kabila ma be ba lebira mbari yo omwo. Cugu leya Kirisite, mi eje kamono ove ma be. Ŋa, lemoo nde yemiŋi: kabila osala o mi bila mpasi ki kalakali ŋi.
17Ŋa se aka togi le mi leje kayiriga ŋa yeka ambwoŋi me lusa mi ma empa be Njyami, ma kalyele ndi osala o lila le be. Aka bwa yeya, mi ŋa kase, ŋa mi ŋa kase bila be aso. 18Be se ma lemigi loankulu lya, be leka ŋa kase, ŋa leka ŋa kase bila mi!
Timote ŋa Epaferodite
19Bila tari nca Mfumu Jezu, yiga tuga, mi ŋa tari leve ma katuma be Timote, mabuni mi maaje kabaga ancya a be, ŋa mon maaje kampa mi kawasi. 20Nde nde otu wo abaraga mva mi, ŋa nde acimiŋa ma be tata. 21Abuga aso kasaga elogo e bo mankulu, ŋa ka ma jaa le Jezu Kirisite ŋi. 22Ŋaa be leyayi lo, Timote mvyeri eki e nde beeve. Nde sali bila mi osala ba Ncya Yeemve, mva mwana tuga ŋa taara nde. 23Ŋaa mi ŋa tari ma katuma be nde ma ntini ye mi lemono jaa le mi tata. 24Ŋa mi ŋa tari nca Mfumu ni mi se yiga tuga ma kaya mpila be.
25Mi barigi ŋa moni yemiŋi ma kavuta be ndumu a bizi a be Epaferodite, o be wo le tumi mpila mi mini nde kayamba mi nca akaama a mi. Nde ndigi a mi kanca osala ŋa ma mvuru ma Ncya Yeemve. 26Nde ŋa jala be aso kamono kuna ŋa nde moni obi kabila ma be ba leyugi ndi nde kiigi ŋa ngayi. 27Ŋa syele nde kiigi ŋa ngayi, esagi kpa nde, ŋaa Njyami moni nde nya. Nde ki suga ma nde otu ŋi, bila mi se mabuni nya yeeli ŋa mi ikuna ŋi. 28Yiga mi selege tuma be nde, mabuni ntini ye mono be nde, be leka nca kase keenyari, ŋa mi ki ma mono nya ŋi. 29Ŋaa leyaga nde yemiŋi bila kase keenini, nde kamaka ndumu a be nca Mfumu. Lenyima kuna le baari mva nde. 30Okorogo, ma osala ba Kirisite nde kiigi tuga ŋa leku. Nde sagi mpa omwo o nde ma kayamba mi, kabila be leki buna kasa lo ma be ankulu ŋi.
Currently Selected:
Filipiye 2: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
