Filipiye 1
1
Obigi
1Mi, Poole bila Timote, bizi ayiga ba Kirisite Jezu. Mi eteende ŋa baari aso ba Njyami ma Kirisite Jezu baali ka Filipe, bila amfumu ba Okuga ŋa ajanji a Njyami.
2Ndi Njyami Taara bizi a be ŋa Mfumu Jezu Kirisite baampa be puga ŋa kadusu.
Obwoni o Poole ma akiricye ba Filipe
3Mi empa Njyami a mi leve ma antini aso ka ebaraga mi be. 4Otuma mi ŋa kase ma antini aso ka ebwono mi ma be aso, 5ma lemigi le be ba leyambi mi ma kampa Ncya Yeemve keebani ba cugu lecomi tii lubu. 6Mi syele ma jaa lemo: Njyami wo baani ma be osala boove aselege sa tii ncwo, tii cugu leya vuruga Kirisite Jezu. 7Mi ŋa mpyeme e jaajaa e ma kabaga jya lya ma be aso, kabila mi ebira be nca otuma mi. Okorogo, be aso ŋa bugu le puga le Njyami leka si mi, lubu eli mi yiga ka ongeneŋe#1.7 1.7 Voir 1.13. Leki ya kacu le aligi ntuma Poole ma ongeneŋe ŋi., mva aciga, ka ki cuula mi Ncya Yeemve ŋa kampa mi yo bila mpari. 8Njyami temi a mi, ndi mi ŋa jala be kuna bila jya leleya ma Kirisite Jezu nde ankulu.
9Mono ma elaa mi ŋa Njyami nca ebwoni e mi: ni jya le be le selege yele, mabuni be leselege ya asisyele, ŋa ma kayuga maami tata. 10Ŋaa be le buna kampama elogo beeve. Mabuni cugu leya vuruga Kirisite, be leka cece, maami maabi kali. 11Bila kayamba ka Jezu Kirisite, omwo o be aje kaluula ma esima e tele ma lekuma ŋa lempa le Njyami leve.
Ncya yeemve yeye je
12Andumu, mi jii ni be leya lo: beeyi ma mi ba eyamba kasa kanciina Ncya Yeemve. 13Okorogo, aso nca njo nguverenere#1.13 Kamaka njo nguverenere ye bungu, ye buna ka njo ye oju wo aworo ba nkani a Rome. sikali kacu kakima, ayayi ndi mi li ka ongeneŋe ma osala o Kirisite. 14Amono mi ka ongeneŋe, bege le andumu abagi tari leenini nca Mfumu, ŋaa bo aselegi bagi kawasi ma kawobo ma mbari a Njyami eli bo obwogo kali.
15Kamaka jaajaa ndi ake kanca bo ba awobo ma Kirisite bila mfunuŋa mwon, bila eduduma ba etogo, ŋaa baamo ba awobo bila etuma beeve. 16Ba se kasa ma jya, kabila bo ayayi ndi mi li kaŋa ma kakala Ncya Yeemve. 17Baamon kawobo ma Kirisite nca oduduma o yala, esima e bo ki cece ŋi, bo kacimiŋa ma kalusa ampasi a mi kanca ongeneŋe.
18Ye kasa mi jaa ŋi! Aka maali ka nca ecu e bo ave sikali abi, Kirisite ami lyele, mi ŋa kase ŋa mi eselege kaka nca kase. 19Kabila mi yayi ni ma aso maaje kato ma ovuzigi o mi, sala ma ebwoni e be ŋa kayamba ka Oduduma o Jezu Kirisite. 20Mi jii ni eya bwa, mi ŋa tari le omwo. Mi ekaje kabaraga ŋi, nkalave mi kyele tari leenini. Lubu mva obu-obu, baaje kamono ma mi ni Kirisite ŋa onini, se ma omwo o mi se ma leku le mi. 21Kabila ma mi, omwo Kirisite, ŋa leku kabaga. 22Ŋaa yemiŋi ma osala o mi ni mi selege ka nca akabi, nca okiri wu. Ŋa mi ema eswolo? Mi ki ya ŋi. 23Mi ba ajiima ma ecu beejwele: mi jii kacyege omwo wu ma kaka bila Kirisite, ŋa okorogo kuna yemiŋi! 24Ŋaa evuli ove ma be ni mi selege ka mwon nca akabi. 25Ma bwa mi yayi ni mi eje kaka, mi yalaga. Mi eka tuga ŋa be aso ma kayamba be ma kaje osu, ŋa ma kaka ŋa kase nca lila. 26Ŋa bwa, ntini yeya vuruga mi mpila be, be le vura baga mpyeme, ma mi, ma kaselege kasa oyaŋi o be ma Kirisite Jezu.
27Ŋaa leka mva Ncya Yeemve e Kirisite ye kapiza. Ma bwa, se mi ya mono be sikali aka mi ebiza kaka kaŋa, mi eje kayuga ka baawobo ma be, ndi be leka ŋa mpari, be le maakuga mpanaŋa be, ŋa be aso le jwana bila otuma omo, ma kakyele lila ni Ncya Yeemve ebira. 28Mi eya se ni be bwogo ba anywon a be kali. Ma bo, kaliimi ni bo anywoŋo ŋa be le li yila njila ye evuzuga, ŋa jo njwori beeya ma Njyami. 29Kabila Njyami ma ampa be puga ma kasala ma Kirisite, ki ma kayalaga nde otu ŋi, ŋaa ma kavura mono mpasi ma nde. 30Be yiga lesa nguru yo ankulu e be kalemoni mi esa kakala ŋa, be leyuga lo, mi evura sa.
Currently Selected:
Filipiye 1: teg
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
