Mareke 4
4
Ngana ye okuni
(Lekese se Matye 13.1-9; Luke 8.4-8)
1Jezu vuri yizigi mpaana oduba o Ngalile. Lembuuru lekuna lekugi lejeniŋi nde. Ma bwa nde kumi kanca vaari ŋa ki manci. Nde kiigi yila oduba ŋa lembuuru leso kiigi ma ncye, tuga anja. 2Nde kiigi yiziga bo kuna le maami ma angana. Ŋa nde kiigi wobo bo kanca eyizigi ndi: 3«Leyuga! Okuni aje nguunu ma kakuna. 4Ntini ye akuna nde, kabari ka mburu kavi ma opaani a njila. Anyoyi ayi ŋa bo aji eso. 5Kabari kamon ka vi yila ncye ye akele eli ncye kiigi nceti. Parabu ŋa mburu emeni ŋa asisari ma ncye ye kiigi owunu onyaŋa. 6Ŋaa muyi kacuuga, nde buzigi ye mi mene, ŋa yo ekpi, ma yo ye kaami ekaŋa, ŋa yo ekayi. 7Bugu lekima lemburu levi kanca ancyene. Ancyene akumi ŋa ayiniŋi yo, ŋa nde ki mpa ŋi. 8Ŋaa bugu lekima levi kanca ncye yeemve, ntini ye yeli yo, yo empi mburu kuna kuna: nke empi mburu ekuumu etari, nkima empi ekuumu esyami, beemon ekima ekuumu kuumu.» 9Ŋa Jezu vuri dugi ndi: «Mbuuru wooli ŋa acu ma kayuga, nde yugi!»
Meema Jezu awobo ma angana
(Lekese se Matye 13.10-17; Luke 8.9-10)
10Ntini ye cyegi Jezu kanca lembuuru, baakiigi jeneŋe nde bila alwoni a nde akuumu ŋa bwele apizi nde ndi: «Meema we awobo ma ngana?» 11Nde kaali bo ndi: «Njyami ampa be, ma be, asisyele ma aswogi ma Omfumu o Njyami, ŋaa abuga baamo baayuga ma angana atu. 12Ma bwa
Bo ba kese, ŋaa bo ki mono ŋi,
Bo baayuga, ŋaa bo ba kayuzuga ŋi,
Aka bo kiigi baayuzuga, bo kiigi baakalaga mpila Njyami, ŋa Njyami kiigi abologo bo#4.12 Ezayi 6. 9-10..»
Jezu asamaŋa ngana ye mburu ya kuni
(Lekese se Matye 13.18-23; Luke 8.11-15)
13Amana, Jezu dugi ŋa baali kaŋa ndi: «Be le kayuzuga ngana yi ŋi? Ŋaa, be bunu leyuga angana maamon? 14Okuni akuna mbari a Njyami. 15Ake ali ma opaani a njila eli mbari a Njyami a ma kuna: ntini ye yugi bo, Sata yi ŋa asisari ŋa cyezi mbari ye akuni kanca bo. 16Baamon ba yaga yo nca ncye ye akele: parabu kayuga bo mbari, bo ayagi yo bila kase. 17Ŋaa mbari ekaŋa nca bo kali, bo jiila ma kakaala ecimiŋi e bo kali. Amana, ntini ye mpasi, sikali aka baasaga kawuele bo ma mbari a Njyami, parabu bo anyini. 18Nkima yeemon ya baayaga kanca eyuba ba ancyene: ba baayuga mbari, 19ŋaa wo abaraga biibi ba okiri wu. Bo kasaga kabaga ka oca ŋa bo ŋa ajya akima akuna kuna. Mabwa, maami maaso ma mayiniŋa mbari, ŋa yo ye kampa kiila ŋi. 20Mburu nkima yeeva kanca ncye yeemve. Ncye yeemve, kamaka baari ba baayuga mbari ŋa bo ayaligi. Yo empi mburu: eke ekuumu etari, baamo ekuumu esyami, ekima ekuumu kuumu!»
Ngana munda
(Lekese se Luke 8.16-18)
21Jezu vuri dugi bo ndi: «Mbuuru ki buna kalasa munda nde legi yo ncina ngungulu, sikali ncina ntari ŋi. Nkalave nde legi munda kayila okami a njo. 22Jaa le baasa ma ayizigi le baabiza yaa kali, aso ma maasa ma oyeri ba ayaa. 23Aka mbuuru ŋa acu ma kayuga, nde yugi!» 24Jezu vuri dugi bo ndi: «Lesa oyeri ma maayuga be! Njyami aje kampa be mva kampa be abuga, ŋa se, nde aje kasa maavuli be! 25Okorogo, wooli ŋa kiila, ba avura je kampa nde ba evuli. Ŋaa wooli kiila kali, baaje kacyeze nde elogo eso.»
Ngana ye mburu ya ye mene yomotu
26Jezu vuri dugi ndi: «Omfumu o Njyami o maawuana bu: Balaga lemo lekuna mburu kanca nguunu a nde. 27Amana, nde yeni tolo lempiimbi letiina ŋa nde sarigi cugu ŋa cugu, ŋa ma ntini yia mburu emeni ŋa eyeli, ŋaa balaga lya ki ya lemigi ŋi. 28Ncye yomankulu ye baana sa kamene kayuba, amana wula, ŋa ma kamana mburu kanca wula. 29Ŋa ntini ye yele mburu, ŋa balaga levi ma janja bila ompaara, kabila ovu wo ba tolo omito.»
Ngana lemburu le kayuba
(Lekese se Matye 13.31-32,34; Luke 13.18-19)
30Jezu vuri dugi: «Omfumu o Njyami ma ema bizi a be leyezege? Bila yini ngana lebuna kawobo? 31Omfumu o Njyami oma awuana lemburu lekyege le oti woonini. Ntini ye lekuna lo kanca ncye, lo levuli okyege. 32Ŋaa amana, lo kamene ŋa lo lekiriga leenini kanca eyuba eso. Nde ŋa ataŋa maanini eli anyoyi ba buna kasa anjo a bo ncina kayiini ka nde.»
33Jezu kampa baari aso mbari a Njyami, ma kasamaŋa bege le angana ma lemigi li, mva ma baari a nde kiigi ba abuna kayuzuga. 34Nde kiigi ki wobo bo eli ngana kali, ŋaa nde kiigi samaŋa eso ŋa alwoni a nde ntini ye kiigi ndemotu bila bo.
Jezu asa ka wuuma pyebi
(Lekese se Matye 8.23-27; Luke 8.22-25)
35Ekikolo ecugu lomankulu lya, Jezu dugi ŋa alwoni a nde ndi: «Lecwe lengulu lemo le oduba.» 36Bo acyegi lembuuru, alwoni abiri Jezu kanca vaari, eli nde kiigi li. Avaari akima kiigi mpaana nde. 37Ŋa lemono pyebi lenkala ka lewula, epugu evi kanca vaari, ŋa bege le anja anyunuŋi kanca vaari. 38Jezu kiigi ca tolo, ocu yila katini ka atila, kabiza vaari. Alwoni a nde anyusi nde ŋa bo adugi nde ndi: «Oyizigi, bizi a be lekpi! Yo ye kasa we kiila ŋi?» 39Jezu nyuzugi, bami pyebi ŋa dugi ŋa oduba ndi: «Kapi! We kapi!» Ŋaa pyebi lesugi ŋa eso eki pi. 40Jezu dugi ŋa alwoni ndi: «Meema be ŋa obwogo? Be lekini vura baga lila ŋi?» 41Ŋaa bo abagi bwogo boonini ŋa bo awobi mpanaŋa bo ndi: «Nde wu na, eli se pyebi ŋa anja ma anyima nde?»
Currently Selected:
Mareke 4: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
