Mareke 3
3
Jezu asalaga ma cugu le baawuuma
(Lekese se Matye 12.9-14; Luke 6.6-11)
1Amana, Jezu vurigi kanca Njo ye baabwono. Kiigi ŋa balaga lemo eli kwogo kaleme. 2Ba kiigi kaŋa amono ba akese Jezu, ma kamono aka nde asalaga balaga lya ma cugu le baawuuma, mabuni bo akata nde. 3Jezu aduga ŋa balaga le nga kwogo kaleme ndi: «We saraga, kaŋa, ka ovuzu o baari aso!» 4Amana nde pizi abuga ndi: «Ngiri buni ye duga ma cugu le baawuuma? Kasa leve sikali obi? Ma kavuzuga omwo o mbuuru sikali kabuma le nde?» Ŋaa mbuuru ki duga ja ŋi. 5Jezu kesi bo aso bila nkala, nde ŋa nya kabila bo aki jya kayuga ŋi. Nde dugi ŋa balaga ndi: «Laba kwogo ka we!» Balaga labi kwogo ŋa ko ka wuumi. 6AFarizi acuugi kanca Njo ye baabwono ŋa avuniŋi parabu bila baari ba Erode ma kasaga osumbu ba kabuma Jezu.
Esaligi mpaani oduba
7Jezu yeni bila alwoni a nde mpila oduba o Ngalile. Bege le lembuuru lelwooni nde. Baari ba kawa Ngalile ŋa Jude, 8Jeruzaleme, Idume, bungu leeli kangulu jurede bila atiniŋa a Tire ŋa Sidon. Lembuuru leenini lya leyi mono Jezu, kabila bo ayugi aso maasi nde. 9Ŋaa Jezu aduga ŋa alwoni a nde ndi: «Leselege mi vaari, mabuni lembuuru lebiza mi kayiina!» 10Okorogo, Jezu kiigi saligi bege le baari, ŋa abyeri aso ayi ŋa asisari ma kaciila nde. 11Ntini ye emoni epundu beebi Jezu, jo evi eti nya ka ebele e nde ndi: «We Mwana Njyami!» 12Jezu wobi ŋa otori bila bo ndi: «Be lebizi kawobo ma mi ŋa mbuuru.»
Jezu aswolo alwoni a nde a kuumu ŋa bwele
(Lekese se Matye 10.1-4; Luke 6.12-16)
13Amana, Jezu yeni yila kakuru. Nde cwoli abalaga a nde ba kajii, ŋa bo ayi mpila nde. 14Kanca bo, nde swoli kuumu ŋa bwele, ŋa nde mpi bo nkuumu ye antuma. Nde swoli bo mabuni bo aka bila nde ŋa ma katuma bo ma kampa ncya ye Omfumu o Njyami. 15Nde se mpi bo onkani ma kacuta epundu beebi. 16Mono antuma ba kuumu ŋa bwele: Simon, eli Jezu ampa nkuumu ye Pyere, 17Jake, mwana Zebede, ŋa Jan, ndumu a Jake: Jezu ampa bo nkuumu ye Boyanerengeze, ma kaduga «Abalaga ba ama awuana ngari», 18Andere, Filipe, Baretelemi, Matye, Toma, Jake mwana Alefe, Simon nga njala kasi, 19ŋa Juda Izekariyote, wo atege Jezu.
Jezu a mi kata ma nga lari
20Jezu yi vuruga njo. Lembuuru leenini levuri kugi. Ŋaa Jezu bila alwoni a nde a ki buna se kaja ŋi! 21Ntini ye yugi kwono nde bwa, bo ayi ma kayaga nde, kabila bo akiigi duga ndi: «Nde yiga nga lari!»
Jezu akaala baampi nde ncozo
(Lekese se Matye 12.22-32; Luke 11.14-23; 12.10)
22Ayizigi angiri, baawi Jeruzaleme, ba aduga ndi: «Jezu ŋa Belezebule#3.22 Belezebule nkuumu kima ma kaduga ndi Sata., mfumu epundu beebi, ma nde! Ma bwa nde acuta epundu.» 23Ŋaa Jezu cwoli ayizigi angiri ŋa nde dugi bo ma lempiini ndi: «Sata abuna kacuta ndemankulu? 24Aka omfumu o ma calaga ŋa baari ba jwana paniŋi a bo, omfumu ki buna kabiga ŋi. 25Ŋa aka baari nca nkwono ba ajwana mpanaŋa bo, nkwono yia ye buna kaka ŋi. 26Aka Sata oli ma eta ma nyuru a ndemankulu, sikali aka nde a kayalaga ndemankulu ŋi, onkani o nde oki biga ŋi, ma nde omiwa.
27«Ŋaa mbuuru akabuna kanyunuŋa kanca njo balaga le mpari lemo eli nde kini kakura nde esya ŋi. Amana nde abuna kanyunuŋa ŋa yagi eso kanca njo. 28Mi eduga be, jaajaa, eso baaje kabologo ma baari amwo: asumu abo bila etugi e bo baasi ma Njyami. 29Ŋaa wo atuga Oduduma Cece, nde ba kaaje kabologo ŋi: nde ncozo ma asumu ma obu-obu.»
30Jezu kawobi ma lemigi lya ŋa ayizigi angiri ma bo ba kiigi duga ndi: «Nde ŋa kapundu keebi ma nyuru a nde.»
Nkwono Jezu e jaajaa
(Lekese se Matye 12.46-50; Luke 8.19-21)
31Amana, nguugu a nde bila andumu ayi. Bo aki kajii ŋa bo atumi mbuuru kanca njo ma kacwolo nde. 32Lembuuru kiigi mancina lema jeneŋe Jezu ŋa adugi nde ndi: «Yuga, nguugu a we ŋa andumu a we ali kajii. Bo ba asaga we.» 33Jezu kaali ndi: «Nguugu a mi na? Andumu a mi bana?» 34Ŋa nde kesi ba amajeneŋe nde ŋa dugi ndi: «Lemono nguugu a mi ŋa andumu a mi. 35Kabila mbuuru wo asa ma ajii Njyami, mbuuru wua ndumu a mi, nkeri a mi ŋa nguugu a mi.»
Currently Selected:
Mareke 3: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
