Mareke 5
5
Jezu asalaga nga epundu beebi
(Lekese se Matye 8.28-34; Luke 8.26-39)
1Jezu ŋa alwoni a nde awi lengulu le oduba lemo, kanca kasi ka Ngerazeniye. 2Nde surigi kanca vaari. Parabu, balaga lemo le cuugi kanca kari amuuma yi baraga nde. Balaga lya kiigi ŋa kapundu keebi. 3Ŋa nde kiigi kaka kanca amuuma. Se mbuuru ki buna nde ka kura ŋi, se bila lengazi. 4Okorogo, ba abaana kura njyala ŋa miili e nde bila angazi, ŋaa nde ma bologo jo eso ŋa mbuuru ki buna nde kakwara ŋi. 5Antini aso, muyi ŋa lempiimbi, nde kaka kanca amuuma ŋa yila ekuru. Nde kiigi ta esarigi ŋa nde kiigi jwala bila akele. 6Nde moni Jezu kalala, ŋa nde dumi ciini, vi ma bwo ka ovuzu o nde. 7Ŋa nde ti osarigi ndi: «We ema asaga ma mi, Jezu Mwana Njyami o kara yulu? Mono mi nya, ma nkuumu Njyami, biza mi kasisa!» 8Okorogo, Jezu kiigi duga nde ndi: «Kapundu keebi, cuuga ma balaga li!» 9Jezu pizi nde ndi: «Nkuumu a we na?» Nde kaali ndi: «Nkuumu a mi “Abege”, kabila bizi bege.» 10Ŋa nde mpi nde akolokolo ma kabiza katuma bo lala ŋa kasi.
11Ŋi, kaŋa kiigi ŋa njiimi leenini le enguu le kiigi saga biila e bo mpaana kakuru. 12Epundu beebi empi Jezu akolokolo ndi: «Tuma bizi kanca enguu bi, ŋa bizi lenyunuŋa kanca jo!» 13Jezu tumi bo. Ŋaa epundu ecuugi ma balaga ŋa jo enyuniŋi kanca enguu. Njiimi le biri ciini, lecyegi kakuru ma kaje va kanca lemere. Enguu kiigi otali aciina akama ana. Jo eso enywi anja. 14Akyeli enguu adumi ŋa abiri ncya kanca kangundu ŋa kanca mpugu. Baari ayi mono ma ayiri. 15Bo ato mpaana Jezu ŋa amoni balaga eli kiigi epundu beebi e ma kwara: nde kiigi mancina, yiga nde ma laza amfa ŋa nde li yemiŋi. Ŋaa bo abagi bwogo. 16Ba amoni aso adugi bo ma ayiri ma balaga le nga epundu beebi ŋa enguu. 17Ŋaa bo amono ba ampa Jezu akolokolo ma kacyege bungu le bo. 18Ntini ye Jezu ka kiigi kuma kanca vaari, wooli kiigi ŋa kapundu keebi mpi nde akolokolo ma kaka bila nde. 19Jezu ki yalaga ŋi, ŋaa nde dugi nde ndi: «Vuruga mpila we, kanca nkwono we. Duga aso a Mfumu ma kasi ma we bila lemigi le nde kamoni we nya.» 20Ŋaa balaga le yeni ŋa kawobi kanca bungu le Dekapole aso ma Jezu makasi ma nde, ŋa ekoli baari aso.
Mwana Jayiruse bila okaazi wo aciila mfa Jezu
(Lekese se Matye 9.18-26; Luke 8.40-56)
21Jezu vurugi lengulu lemo ma vaari. Lembuuru lekugi lejeniŋi nde ŋaa nde kiigi mpaani anja. 22Omon kanca amfumu ba njo ye baabwono, wo acwoli ma Jayiruse, yi. Nde moni Jezu, vi ka miili e nde, 23ŋa selegi mpi nde akolokolo ndi: «Mwana mi wo okaazi yiga ma leku. Ya lege njyala yila nde mabuni nde kavuuga, ŋa nde kaka mwo.» 24Jezu yeni bila nde. Lembuuru leenini lekanama nde ŋa le kayiina nde ma angulu aso.
25Kiigi ŋa okaazi omo wo kiigi bila ovugu, yiga esibi kuumu ŋa jyele. 26Nde kiigi ma mono mpasi kuna ma esaligi ba anganga. Nde kiigi mi mana kabaga ka nde kaso, ŋaa eki sa se kiila ŋi, yo eseligi vuli. 27Nde kiigi yuga ba wobo ma Jezu. Nde yi nca lembuuru ngula Jezu ŋa ciili mfa nde. 28Kabila nde cimiŋi ndi: «Aka mi eciila se amfa a nde, mi eje kawuuma!» 29Parabu ovugu a nde sugi ŋa nde moni ni nde mi wuuma ma ngayi a nde. 30Ma ntini yoankulu yia Jezu moni ni mpari mon e mi cyege ma nde. Nde kaligi kanca lembuuru ŋa nde kiigi piza ndi: «Wo aciila amfa a mi na?» 31Alwoni a nde akaali nde ndi: «We amono lembuuru le leyiina we li, we apiza ni: “Wo ciili mi na?”» 32Ŋaa Jezu seligi kesi lembuuru le maajeneŋe nde ma kamono wo si bwa. 33Okaazi terigi ma obwogo, kabila nde kiigi yayi maayi ma nde. Nde yi va ncina miili e Jezu ŋa nde dugi nde asisyele aso. 34Jezu ŋa nde ndi: «Mwana mi wo kaazi, lila le we le mi vuzuga we, je bila kadusu ŋa wuuma ma ngayi a we.»
35Ntini ye Jezu ye ka kiigi wobo, baari atoyi njo mfumu wo njo ye baabwono ŋa dugi nde ndi: «Mwana we wo okaazi mi kpa, nyina kama wuele Oyizigi a we.» 36Ŋaa Jezu yugi maami ma ŋa nde dugi mfumu a njo ye baabwono ndi: «Biza bwogo kamono, yalaga otu!» 37Nde ki nyina se mbuuru ma kayila nde ŋi, kangula Pyere, Jake ŋa Jan, wo ndumu Jake. 38Bo ato njo mfumu wo njo ye baabwono, eli Jezu moni ngimiŋa ŋa baari ba baalila ŋa ba baata anya maanini. 39Nde nyuniŋi ŋa nde ŋa bo ndi: «Meema yi ngimiŋa ŋa bi elili? Mwana kini kpa ŋi, nde li tolo.» 40Ŋaa bo asebi nde. Ŋaa nde cuzigi bo aso, yagi bila nde taara, nguugu ŋa alwoni a nde atari, amana nde nyuniŋi kanca katini eli mwana li. 41Nde kwari nde ma kwogo ŋa nde ndi: «Talita kum!» Ma kaduga ni: «Onkere okaazi, mi eduga we, temeŋe.»
42Onkere okaazi, wo kiigi esibi kuumu ŋa jwele, sarigi parabu ŋa yiga je. Bo aso abagi akimi maanini. 43Ŋaa Jezu dugi bo bila otori lebiza se mbuuru kaduga, ŋa nde dugi bo ma kampa mwana biila ba kaja.
Currently Selected:
Mareke 5: teg
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
