Marke 15
15
Jesu o mwa Pilate
Matye 27.1-2,11-14; Like 23.1-5
1Na encyere e cuhu, asi mavwoŋi ma anini bɨla akuuru na ayisihi me ekele, akusihi abuha bɨla okuha onini ankʉmu ma Ajife aso. Bo akuri Jesu endi, bo abiri na ampa nde na Pilate. 2Pilate olehi nde oduhu ndi: «We nkani Ajife?» Jesu okaali na nde ndi: «We anku aduha.» 3Asi mavwoŋi ma anini maselehe obanaŋa Jesu kuna. 4Pilate ovurihi olehi nde oduhu ndi: «We i kaala jaa ni? We ayuha bo mabanaŋa we maami kuna!» 5Ŋa Jesu aka makaala ni, Pilate obihi mwo oya kimimi.
Mabuma Jesu
Matye 27.15-26; Like 23.13-25
6Acinda aso eki ove Pilate otusihi ongeneŋe omo, mvuuru lemvuuru lepɨsihii. 7Ŋa mvuuru a nkuumi Barabase aki o nca ongeneŋe, bɨla baari ma ayi na okʉrukusu, bo aki amabuma mvuuru o nca okʉrukusu jwa. 8Lemvuuru lekumi mpili e Pilate, leya lepɨsa nde ndi nde osa mo otiiri a nde asiihi. 9Pilate okaali bo ndi: «Be lesaha me nyasaha be nkani Ajife?» 10Obila Pilate amoniŋi ndi asi mavwoŋi ma anini ampi nde Jesu mo mfunwamwo. 11Ŋa asi mavwonŋi ma anini acyesi lemvuuru mo bu ndi Pilate onyasaha bo Barabase. 12Pilate ovurihi oyahi mbari ndi: «Ŋa me esa mvuuru a be lecwoloho mo nkani Ajife yu buni?» 13Bo avurihi awʉli ankɨma ndi: «Komo nde ma lembanji!» 14Pilate opɨsi bo ndi: «Nde jaa e mbi amasa ma?» Ŋa bo aselihi owʉla ankɨma nkara yulu ndi: «Komo nde ma lembanji!» 15Pilate odii osa lemvuuru leve, onyasahi bo Barabase. Nde otumi abuli Jesu ekaci, emana nde ompi Jesu ndi amabuma nde ma lembanji.
Aworo masebe Jesu
Matye 27.27-31
16Aworo abiri Jesu nca lebuhu le njo lepatima. Bo acwoli aworo aso. 17Bo alaasi nde lengoyi le yulu le ba le nkani, emana bo alehi ongunja ma amacwa bɨla ancyene, o yula ocwi a nde. 18Bo aya mawooso nde, bo maduha ndi: «E nkani Ajife, mbulu e we!» 19Bo abeeri nde oboro o yula ocwi, acuuri nde antayi, bo aya mawʉra avwo o miisi a nde. 20Bo amana osebe nde bo acyesi nde lengoyi le nkani le ba lya, avuuri nde amfa a nde.
Abumi Jesu ma lembanji
Matye 27.32-44; Like 23.26-43
Bo abiri nde o nji mo oje na abuma nde ma lembanji. 21Bo akwari balaha mo e nkuumi Simo osi Sirene, aki ayira o ŋaa nde awa na anguunu mo obira lembanji le Jesu. Nde aki taara Aleksandre bɨla Rifise. 22Ŋa bo abiri Jesu o biri macwoloho o Ngolingota, mo oduha ndi o biri okoko. 23Bo asahi ompa nde mali ma amavusuha bɨla miire#15.23 Miire omakaaha oyombo a mvunu ma amawaanga mo ofuuma. Ovusuha miire bɨla mali a nkala, ampi mvuuru mabuma ma lembanji mo bu ndi nde okolo, nde i ma yaa maami ni, nde se i mono nkala ma ampasi ni. Lemihi na esiihi ma Ajife. Ps 69.22. , ŋa Jesu obisi. 24Emana bo akomi nde ma lembanji, bo akabihi amfa a Jesu o mpaniŋi e bo, bo ati owani mo oyaa kiila o mvuuru na mvuuru ayaha. 25Nde akomi ma lembanja na encyere mpili atari wa. 26Aki amateende o yula opaanja makomi nde ma lembanji ndi: «Yu nkani Ajife.» 27Bo akomi embeŋe jyele ma lembanji, omo mo kwoho o nde olumi, omo mo omboho. [28#15.28 Nca ebiri me emo amateende obiri ji ndi: Mamono mbari eduha ndi amatala nde o nca embeŋe. O Like 22.37 ; Esayi 53.12.]
29Ayiri a njila ma tuha Jesu, bo manyisiha ecwi maduha ndi: «Ee we acala njo e Njyami, we ovuriha ocwa yo me ecuhu etari, 30vusuha nyuru e we anku, we osuruha ma lembanji!» 31Ŋa asi mavwoŋi ma anini bɨla ayisihi me ekele masebe Jesu o mpaniŋi e bo o maduha ndi: «Nde omavuswaha akɨma, ŋa nde i buuna ovuswaha nyuru e nde anku ni! 32Ŋa Krisi a nkani a Isayele osuriha ma lembanji! Mo bu ndi bisi omono, ŋaa bisi leyalaha.» Baari makomi bɨla Jesu matuha nde se.
Leku le Jesu
Matye 27.45-56; Like 23.44-49
33O mwa njanga, lempiibi levi o yula ncye eso tii ngo atari atari a ngula njanga. 34Atari atari a ngula njanga ato, Jesu owʉli nkɨma na ankala ndi: «Elohi, Elohi, lema sabaktani?» Mo oduha ndi: «E Njyami a me, e Njyami a me, we omasuba me kalihi mo oma?» 35Ake o nca baari ma aki o ŋaa ayuhi nde, bo aduhi ndi: «Leyuha nde acwolo Eli!» 36Omo o nca abo oyeni ma ancini ayaha obari o mfa o mali a ŋayi, okuri o ncwo oti, ompi Jesu ndi nde onwa, nde oduhi ndi: «Lemadɨla, lemamono yuhu Eli aya ŋa piisa nde ma lembanji!» 37Ŋa Jesu owʉli nkɨma enini okwi.
38Mfa eki nca nkiina#15.38 Mfa jyia eki ebiinda biri manyuniŋa nca nkiina. Nkiina omakaaha biri opeende e njo e Njyami Ajife, biri e Njyami avuniha bɨla osi avwoŋi. E.26.31-35. obaayi etini jyele, mo owa yulu tii ngo le nci. 39Nkʉmu onkama aworo aki tele na Jesu omoni mva ekwi nde, oduhi ndi: «E jaa jaa, balaha ji eki Mwana a Njyami!» 40Akaasi ake aki o ŋaa se, makeese o la la. O nca bo eki na Mariya a Madala, bɨla Mariya a nguhu a Jake onkere, bɨla ŋa Jose na Salome. 41Akaasi baa alwoniŋi Jesu, bo ajanjihi o nde o ntini eki nde o Ngalili. Eki se na akaasi akɨma kuna makumi Jerusaleme bɨla nde.
Malehe Jesu o muuma
Matye 27.57-61; Like 23.50-56
42Cuhu eki emikolo, yo eki cuhu eli omana yo eto cuhu mayeesehe cuhu mawuumaŋa. 43Josefe osi Arimati oyi. Nde aki mvuuru onini o nca okuha ankʉmu ma Ajife. Nde se adilihi ejiihi mo Onkani o Njyami. Nde obahi mpari mo oje mpili e Pilate na ayaha obiimi o Jesu. 44Pilate oyuha ndi nde omikwa, oya kimimi. Nde ocwoli nkʉmu onkama aworo, opɨsi nde yuhu Jesu oki omibiha na okwa. 45Nkʉmu onkama aworo oduhi nde aso, Pilate oyalihi ompa Josefe obiimi o Jesu. 46Josefe osuumi mfa e lee, opiisi Jesu ma lembanji, oporihi nde o mfa, olehi nde nca muuma matubi o nca akele. Emana nde ociniŋi kele e nini mo obiinda onwa a muuma. 47Mariya a Madala bɨla Mariya a nguhu a Jose, makeese mpili malehi nde.
Currently Selected:
Marke 15: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
