Marke 16
16
Matooso enyuusihi e Jesu o nca leku na akaasi
Matye 28.1-8; Like 24.1-12
1Cuhu mawumaŋa eyira, Mariya a Madala, bɨla Mariya a nguhu a Jake na Salome, asuumi maari bɨla eyombo mo okɨla obiimi o Jesu. 2Eto cuhu e pulu na encyere bo ayeni muuma, tari eki emisaraha. 3Bo maduha o mpaniŋi e bo ndi: «Acyese saabe kele mo onwa a muuma na?» 4Ŋa bo asaara miisi bu, bo amoni ndi amicyese kele, yo eki na onini bo mini. 5Bo se anyuniŋi nca muuma, bo amoni ojambu a balaha o nci mo kwoho olumi omalaasa mfa e kubuhu. Bo amoni ongwo. 6Ŋa nde oduhi na bo ndi: «Leka monoŋo vwoho ni! Be lesaha Jesu a Najarete, makomi ma lembanji. Nde omanyusiha o nca leku, nde kuuni kali. Lemono biri ma aki ma amacuusa nde. 7Ŋaa lejyehe na aduha na alwoni a nde, be se leduha na Pyere mbɨri: “Nde acwomo levusu le be Ngalili, be leje omono nde o kwa, mo osuumbu a nde aduhi be.”» 8Bo acuuhi nca muuma adɨmi ma anciini, obila bo aki na vwoho bɨla antɨrihi. Bo se aka duha jaa na mvuuru ni, obila bo aki na vwoho.
Jesu alaha nyuru
Matye 28.9-10,18-20; Like 24.13-53
[9Nde onyusiha nca leku na encyere o cuhu e pulu, nde obaani olaha nyuru na Mariya a Madala. Okaasi a Jesu acuuri edidima me ebi ncaami o nyuru. 10Nde oyeni na aduha na baari ma kiihi bɨla nde. Bo aki o nca nkwono na elili. 11Ŋa bo ayuha nde aduha ndi Jesu oli mwo nde se amoni Jesu, bo aka yalaha maami a nde aduhi ni.
12Emana Jesu olahi nyuru mo osuumbo okɨma na olwoni vwele, ma aki o njila mo oje na ovʉla. 13Bo ayi na avuriha na aduha na abuha, baa se aka yalaha ni.
14Jesu omana olahi nyuru na alwoni a kuumi na omo o ntini e bo ma aki o tanda. Nde obye na bo mo kaama oyalihi o bo, bɨla etima e bo mo onono. Obila bo aka yalaha enyusihi e nde e nca leku o ntini e baari ma amoni maduhi bo ni. 15Emana nde oduhi na bo ndi: «Leje yula ncye eso na otooso Ncya e mve na lewaanga leso. 16Mvuuru aje oyalaha ma aje ompa nde ateeme nde aje ovuuha. Aje obɨsa oyalaha ma aje oliisa nde. 17Lemono adiimi ma aje oka bɨla baari ma aje oyalaha: mo nkuumi e me, bo ma aje ocuura edidima me ebi. Bo ma aje owobo anjuuyi ma anyarihi. 18Bo ma aje okwara antaari o jyala e bo. Bo onyuwa kiila obuuna obuma bo, kari i sa bo jaa e mbi ni. Bo ma aje olehe jyala o yula abyeri, ŋa abyeri ma aje owuuma.»
19Jesu omana owobo na bo vwa, abiri Jesu a Nkʉmu yulu, oki o nci o kwoho o Njyam i olumi. 20Alwoni ayeni na otooso Ncya e Mve me ebiri eso. Nkʉmu ajanja bɨla bo, nde se alaha mbari ma andiimi ma amonihi.]
Currently Selected:
Marke 16: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
