Marke 14
14
Ankʉmu ma Ajife makura cuumu o mo Jesu
Matye 26.1-5; Like 22.1-2
1Eki emi siila ecuhu jyele, ma oto cinda e Paake bɨla e mpeembe leviire kali. Asi ma avwoŋi ma anini bɨla ayisihi me ekele, asahi osuumbu okwara Jesu ma onkaa, omana bo abuma nde. 2Bo aduuhi ndi: «Saabe i buuna osa o nca cinda ni, mo odʉma okʉrukusu oma va o nca baari.»
Okaasi omo akɨla Jesu oyombo mo ocwi
Matye 26.6-13
3Jesu aki o Betani o njo e Simo aki na ebila. Ntini e nde aki o tanda, okaasi omo onyuniŋi na pamba alibatɨre emaluula mo oyombo a ce ce nde se a mvunu. Nde onaani pamba, ojirihi oyombo o yula ocwi a Jesu. 4Ake o nca baari ma aki ŋaa amoni obi, bo aduhi ndi: «Nde abiisa oyombo yu mo oma? 5Aki mabuuna otehe nde enkama ma adoro ankoso etari, emana ampi anga owuha!» Bo abye nkala na okaasi jwa. 6Ŋa Jesu oduhi ndi: «Lenyila nde cwo. Be leweele nde mo oma? Nde asi me ŋa jaa e mve. 7Obila be leka aje oyele anga owuha bɨla be ni. Ŋa antini a be ledya aso, be lebuuna osa bo leve. Ŋa me, be leka ma aje oka bɨla me mbumbu ni. 8Nde omasa e nde abuuni osa: nde omibaana okɨla me oyombo a cuhu majiiya me. 9Me eduha be sisyele: ma aje oduha jaa ji mo cimiŋa nde na maami a nde asi, me ebiri eso ma aje otooso Ncya e Mve o yula ncye eso.»
Juda asaha osuumbu mo ompa Jesu na asi mavwoŋi ma anini
10Juda Osikarote ntuma a nca antuma a kuumi na vwele, oyeni na amono asi mavwoŋi ma anini mo ompa Jesu na bo. 11Bo ayuha ncya jya, bo asweri alehi nde ndayi mo ompa nde adoro. Juda aki aya omasaaha ni ntini e mve mo olaha bo Jesu.
Alwoni mayeese biila e Paake
Matye 26.17-19; Like 22.7-13
12Cuhu e ncomi e mpeembe eli leviire kali, mabumaŋa endoombo o Paake, alwoni a nde aduhi na nde ndi: «We asaha mbɨri saabe lemayeese cinda mo oja Paake kuni?» 13Emana nde otumi alwoni a nde vwele na bo ndi: «Lejyehe nca onguundu, mvuuru ali na mbasa anja o yula ocwi aje oya na vuniŋa bɨla be. Be lelwoni nde, 14ŋa biri enyuniŋa nde, be leduhi na onga jo mbɨri: “Nkʉmu apɨsa ndi otini o njo o nde aja Paake bɨla alwoni a me oli kuni?” 15Nde aje olaha be otini o njo enini eli na yulu ma amamana oyeese. Jya biri e be leje oyeese biibi o saabe.» 16Alwoni ayeni, bo ato nca onguundu. Bo abasihi maami aso mo osuumbu a Jesu aduhi bo, bo se alaami biila e Paake.
Jesu aja biila e Paake bɨla alwoni a nde
Matye 26.20-30; Like 22.14-23
17Eto na ekikolo, Jesu oyi bɨla alwoni a kuumi na vwele. 18Ntini e bo ma akihi o tanda bo ma ja, Jesu oduhi ndi: «Me eduha be sisyele: mvuuru omo o nca be aja bɨla me aje otosoho me.» 19Alwoni aso amoni obi, bo aya mapɨsa nde omo na omo ndi: «Me Nkʉmu?» 20Jesu oduhi na bo ndi: «Omo o nca a kuumi na vwele, ali molehe kwoho nca opele bɨla me. 21Obila Mwana a mvuuru aje okwa, mva ma amateende o nde, ŋa ndoho eka na mvuuru aje atosoho Mwana a mvuuru! Tata kaa aka kʉla mvuuru jwa ni!»
Lempeembe le Nkʉmu
Matye 26.26-29; Like 22.15-20
22Ntini e bo ma jiihi, Jesu oyahi lepeembe, osi ovwoni andosoho, nde ocebi ompi alwoni a nde. Nde oduhi na bo ndi: «Leyaha, ji nyuru e me.» 23Emana nde oyahi kobo e mali, nde omana ompa Njyami leve, nde ompi bo aso anywi. 24Jesu oduhi na bo ndi: «Ji tohi e me, tohi e mo Ondihi, ejɨri mo baari kuna. 25Me eduha be sisyele: me eka aje omanywa viinye ni, tii ngo o cuhu e me eje onwa viinye onyarihi nca Onkani o Njyami.» 26Bo aya mayima aluumu ma apisoome mo okuusa Njyami, emana bo ayeni okuri Eliive.
Jesu atooso ndi Pyere aje otuna nde
Matye 26.31-35; Like 22.31-34
27Jesu oduhi na alwoni a nde ndi: «Be aso leje osuba me kalihi, obila amateende nca Esaangumu ndi: “Me eje obeere okyeli endoombo, ŋa endoombo ecalaha”. 28Ŋa nde oluusi ndi: me onyusiha nca leku, me eje ocwomo Ngalili levusu le be.» 29Pyere oduhi na nde ndi: «Ŋa se abuha maamo aso osuba we kalihi, me eka aje osuba we kalihi ni!» 30Jesu okaali na nde ndi: «Me eduha we sisyele: ma lempiibi le lobi li li, cusu aka asa kwoho ekʉru jyele ni, we aje obɨsa me ekʉru etari.» 31Okoroho Pyere aselehe ojisiha ndi: «Se yuhu me ekwa bɨla we, me eka aje obɨsa we ni!» Bo aso se aduuhi jaa mo.
Jesu avwono o Ngetesemani
Matye 26.36-46; Like 22.39-46
32Emana bo ato o biri ma cwoloho o Ngetesemani, Jesu oduhi na alwoni a nde ndi: «Leeka ma anci o ŋa o ntini e me eje ovwono.» 33Nde obiri Pyere, bɨla Jake na Jan bɨla nde. Nde oya abaana omono vwoho bɨla ongwo, 34nde oduhi bo ndi: «Otima a me amono obi ma leku. Leka o ŋa be lemoho!» 35Nde olabihi nceeri, nde owʉri avwo mo bu ndi yuhu tari ambaba ji ebuuna oyira la na nde. 36Nde aduha ndi: «Aba taara, we abuuna aso. Sa mbɨri kobo ambaba ji elabaha na me. Ŋa ka me ediiŋi e me ni, ŋa me ediiŋi e we.» 37Nde oyi na avuriha, obasihi alwoni ma atari antolo. Nde oduhi na Pyere ndi: «Simo, we omaca tolo? We aka baha mpari mo omoho se tari mo ntu ni? 38Lemoho, be levwono, mo odʉma be lema va nca eciniŋi me ebi. Oduduma na njala osa leve, okoroho akabi na okolo.»
39Nde ovurihi olabihi, ovwoni nde aselehe oduha mbari ji jya. 40Emana nde oyi na avuriha o paani alwoni a nde, nde obasihi bo ali antolo. Obila bo aki i buuna oka miisi buulu ni. Bo se aki i yaa jaa oduha nde ni. 41Nde oya na avuriha mo jwe lo otari, nde oduhi na bo ndi: «Be lekini antolo, be lewuuma? Lemiwa, antini amito. Amimana ompa Mwana a mvuuru o nca jyala ma asi ma ambiini. 42Letemeŋe! Lecwe! Lemono mvuuru aje otosoho omiya!»
Amikwara Jesu
Matye 26.47-56; Like 22.47-53
43O ŋiŋa Jesu aki okini awobo, Juda a ntuma o nca antuma a kuumi na vwele owasihi. Nde oyi bɨla lemvuuru lo mini lemabira abaha ma ampele mwele bɨla ankumaha. Asi ma avwoŋi ma anini, bɨla ayisihi me ekele na akuuru, baari matumi bo. 44Juda atosihi nde aki omayeese bɨla bo mo olaha bo ndiimi ndi: «Mvuuru a me eje ompa amfemfe omakaaha nde. Lekwara nde, be leje na nde, lekyele nde yemihi.» 45Juda okini mo owasiha, ociini mpili e Jesu oduhi na nde ndi: «Rabi!» Emana ompi nde amfemfe. 46Abuha maamo avi o Jesu, bo akwari nde. 47Omo o nca alwoni ma aki ŋaa otusihi baha ampele mwele, otini ojanji osi avwoŋi onini, nde ocebi nde cwi. 48Jesu oduhi na bo ndi: «Be leya bɨla abaha ma ampele mwele na ankʉmuha mo okwara me mva ombeŋe? 49Ecuhu esiiso me ekihi bɨla be me eyisiha nca njo e Njyami, be leka kwara me ni. Ŋa eki ove amoni maami ma amaduha o nca Esaangumu.» 50Ŋa alwoni aso asubi nde kalihi, bo adumi. 51Onjambu abalaha omo aki alwono Jesu, nde aki omalaasa olembe. Asahi okwara nde, 52ŋa nde osubi olembe kya kalihi, odumi otaba.
Jesu o mwa okuha onini
Matye 26.57-68; Like 22.54-55,63-71
53Bo abiri Jesu mpili osi avwoŋi onini. Bo aso akusihi abuha, asi mavwoŋi ma anini bɨla akuuru, ŋa na ayisihi me ekele. 54Pyere aki alwoni Jesu o la la, tii ngo nca lebuhu le njo osi avwoŋi onini. Nde oya o nci o ŋaa bɨla ajanji ayoro mbaa.
55Asi mavwoŋi ma anini bɨla okuha Ajife onini asahi jaa e bo mabanaŋa Jesu o yo, mo otuma abuma nde, ŋa bo aka basaha jaa ni. 56Obila baari kuna asiisihi enwa e ncuba o nde, ŋa enwa e bo masiisihi eki aka e mo ni. 57Ake atemiŋi mo osiisa enwa e ncuba o nde ndi: 58«Bisi leyuhi nde aduhi ndi: “Me eje ocala njo e Njyami macwi mo jyala e baari mo o mwo ji, ŋaa nca ecuhu etari me ecwa nkɨma eli ka baari mo omwo macwa o jyala e bo ni.» 59Ŋa se na mo mbari jya, enwa e bo masiisihi eki ka emo ni. 60Osi avwoŋi onini otemiŋi o nca okuha, olehi Jesu oduhu ndi: «We i kaala jaa me enwa e bo masiisisa o we bi ni?» 61Jesu akiihi ni pi, nde aka kaala jaa ni. Osi avwoŋi onini ovurihi olehi nde oduhu ndi: «We Krisi, Mwana a Njyami a bisi lekasahaa?» 62Jesu okaali ndi: «Ee me! Ŋa be leje omono Mwana a mvuuru o nci o kwoho o Njyami olumi o mpari, nde aya nca lengʉri le yulu.» 63Osi avwoŋi onini okasihi amfa a nde anku, oduhi ndi: «Bisi leya kaama mo baari masiisa enwa kali! 64Be lemiyuha mva e nde atuha Njyami, be lecimiŋa buni?» Bo aso abumi nde ncoso, ndi ove nde okwa. 65Baari ake aya macuura nde antayi, aya madibiha nde olya. Bo aya mabeere nde, maduha na nde ndi: «Wobo mva owobi a bari e Njyami!» Ajanji aya mabula nde ampali.
Pyere atuna Jesu
Matye 26.69-75; Like 22.54-62
66Ntini e Pyere aki okini ma lebuhu na nci, ojanji osi avwoŋi onini omo okaasi oyi. 67Nde omoni Pyere ayoro mbaa, nde okeesi nde yemihi, na nde ndi: «We se aki bɨla Jesu a Najarete.» 68Pyere otuni, okaali na nde ndi: «Me i yaa ni me se i yuha a we asaaha oduha maa ni.» Emana nde oyeni mpili onwa macuuha mwa lebuhu. O ŋaa ncusu okwohi. 69Ojanji okaasi omoni nde, ovurihi oduhi na baari ma aki ŋaa ndi: «Balaha ji se e bɨla bo!» 70Ŋa Pyere ovurihi otuni. Antini ayira nceeri, baari ma aki ŋa ma avuriha oduha na Pyere ndi: «Jaa jaa we se a bɨla bo! Obila we se osi Ngalili.» 71Ŋa Pyere oya alaba ekesi, oloho nyuru e nde anku ndi: «Me i yaa balaha e be lewobiho na me o nde ni!» 72O ŋiŋa ncusu ovurihi okwohi ma okʉru o jwele, ŋa Pyere oyibihi maami a Jesu aduhi nde ndi: «Cusu aka asa kwoho ekʉru jyele ni, we aje otuna me ekʉru etari.» Nde ocuuhi ma asisari, oya alila.
Currently Selected:
Marke 14: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
