Marke 13
13
Jesu atooso ecalihi e njo e Njyami
1Ntini e Jesu acuuyi o nca njo e Njyami, olwoni a nde omo oduhi na nde ndi: «E Nkʉmu, makeese! Ma akele na bi ecuuŋi mo owali!» 2Jesu oduhi na nde ndi: «We amono anjo ma anini ma? Kele se mo ake aje oka o yula buha o ŋa ni. Ma aje ocala eso.»
Andoho bɨla ncwesehe
Matye 24.3-14; Like 21.7-19
3Jesu aki o nci o yula okuri eliive tele na njo e Njyami, Pyere bɨla Jake, na Jan na Andɨre malehe nde eduhu o paani, bo mapɨsa nde ndi: 4Duha bisi: «Kari eje oka o jini ntini, ŋaa diimi elaha ndi ma aso ma aje owa ji ni?»
5Ŋa Jesu oya aduha bo ndi: «Be lesi ayiba ncaki mvuuru otaasi be. 6Kuna ma aje oya o nkuumi e me, bo se ma aje oduha ndi: “Yu me!” Omana bo ma aja otaasa baari kuna. 7Ntini e be leje oyuha mawobo me eta na ancya me eta, be leka monoŋo vwoho ni. Ove amoni maami maa, ŋaa ncye eka asa aje okuniŋa ni. 8Obila nkani aje ojwana bɨla nkani okɨma. Ncye eje onyiha me ebiri kuna, bɨla njala yo mini. Eje oka mva ebaanihi mo obaani okʉla. 9Be lesi ayiba. Obila ma aje ompa be ma anjo mapamaŋa baari. Ma aje obeere be nca anjo mavwonoŋo. Ma aje oje na be o mwa apatima bɨla ankani, obila o me. Be leje osiisa enwa e ma me, o miisi a bo. 10Ŋa ove asa tooso Ncya e Mve me esi aso. 11Ntini ma aje obira be nca anjo ma pamaŋa baari, be leka baanaŋa omono ongwo mo jaa e be leje oduha ni. Be leduhi mbari ma aje ompa be o ntini jya, obila ma aje owobo ka be ni ŋaa Oduduma Santi. 12Mwana nguhu aje ompa mwana a nguhu a nde abuma, taara se aje osa vwa mo mwana a nde. Baana ma aje osa ombangu na nguhu bɨla taara a bo, baana ampa abuma bo. 13Baari aso ma aje obele be obila o me. Ŋa mvuuru aje osa nkomoŋo tii ngo mamana, jwa aje ovuuha.
Oswe nde mini
Matye 24.15-28; Like 21.20-24
14Ntini e be leje omono “ocali obi nde mini” oli o biri e nde aka saha oka ni, mvuuru aliira ove oyuhi! Ŋa baari ma aje oka o Jude, ove bo adʉmi nca ekuri. 15Mvuuru aje oka mo oleembe, nde i suriha na ayaha kiila nca njo e nde ni. 16Ŋa mvuuru aje oka nca nguunu, nde i vuriha mbɨsa na ayaha mfa e nde ni! 17Ji ndoho na akaasi ma aje oka na ayimi, na ma aje ompa baana abyele se me ecuhu bya! 18Be levwoni mbɨri kari i ya ma antini a mpebe yo mini ni! 19Obila ecuhu bya, me eje oka ecuhu e mpasi yo mini, akini omono mpasi kɨma mva jya me ebaanihi e ncye e Njyami awaangi tii ngo o cuhu e lobi ni. Ma aka ma aje omono kɨma mva jya ni. 20Nkʉmu aki mo obɨsa okyese ecuhu bya, ka mvuuru se omo aka vuuha ni. Ŋa nde akyesi ecuhu bya, mo baari a nde aswoli. 21Ŋa mvuuru oduha na be ndi: “Lemono, Krisi a yu kuuni!” Si kali: “Lemono nde a yu!” Be leka yalaha nde ni. 22Obila akrisi mo oca na awobi a mbari e Njyami mo oca, ma aje otemeŋe. Bo ma aje osa andiimi a lwari bɨla epuna mo otaasa baari a Njyami amaswolo yuhu bo mabuuna. 23Ŋa be, be lesyaha ayiba! Me emabaana ojyese be o maami aso.
Ejiihi e Mwana mvuuru
Matye 24.29-31; Like 21.25-28
24Nca ecuhu bya o ngula mpasi yo mini jya, muuyi aje odɨma, ngondo aka ma aje ompa oyalala o nde ni. 25Anyari ma aje owa yulu ava, mpari eli e yulu eso eje otɨriha. 26Ŋa ma aje omono Mwana a mvuuru aya nca lengʉri, na mpari bɨla lekʉma le nde leso. 27Nde aje otuma abaanji mo okusuha baari a nde amaswolo ma ancwo a ncye ma ana, mo obaana o ncwo e ncye tii ngo ncwo e yulu.
Mbari oti a fiige
Matye 24.32-35; Like 21.29-33
28Lenyila ncincami eyisaha be maami: ntini entaha e nde me ejwa ncuusi ocuuha, be leyaa mbɨri osibi oya tuha. 29Na be se, ntini e be leje omono ejiihi e maami maa, be leyaha mbɨri Mwana mvuuru oya tuha na enwa ma anjo a be. 30Me eduha be sisyele: njubu ji eka sa aje oyira ni, maa aso ma aje oya. 31Yulu bɨla ncye ma aje oyira, okoroho mbari e me eka aje oyira ni.
Njyami otu oyaa antini ma lembɨsa
Matye 24.36-44
32Ŋa mo cuhu bɨla tari, mvuuru se omo se abaanji, se Mwana i yaa ni, o ngula taara otu.
33Lesa ayiba! Leka mwo, obila be i yaa antini a yo eje oya ni. 34Kari eje oka mva ntini e mvuuru ajyehe opiinga: nde onyili njo e nde na ajanji mo okyele. Nde ompi onkʉmu mvuuru na mvuuru na janja e nde, omana nde oduhi na okyeli lepaangu mo omoho. 35Ŋa lemoho, obila be i yaa cuhu onga njo aje oya ni: na ekikolo, mo otima lempiibi, o ncusu encyere si kali na encyere. 36Mo odɨma nde omaya na vuriha kʉru, ove nde i basaha be ma antolo ni. 37A me eduha be ma, me eduha na baari aso: lemoho!»
Currently Selected:
Marke 13: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
