Marke 12
12
Ncincami akyeli a viinye
1Jesu oya awobo na bo ma ancincami ndi: «Balaha mo ekuni nguunu e viinye, nde okuri okahi, nde ocimi bulu olehi nyii, nde ocwi ovʉla na yulu mo okeese. Emana nde onyili nguunu na ajanji a nguunu e viinye, nde oyeni opiinga. 2Ntini o tolo eto, onga nguunu otumi ojanji omo mpili ajanji a nguunu e viinye, mo bu ndi bo ampa e nde buhu e mburu e viinye. 3Ŋa bo akwari ojanji abeeri, bo avuuri nde jyala onyaŋa. 4Ŋa onga nguunu otumi bo ojanji okɨma, bo abeeri jwa se mo ocwi, emana bo atuhi nde. 5Nde ovurihi otumi okɨma, jwa bo abumi. Bo asi akɨma kuna vwa: bo abeeri ake kuna, bo abumi maamo. 6Esiili onga nguunu ni mwana a nde adya. Nde otumi bo nde lembɨsa, mo oma nde aduuhi ndi: “Bo ma aje onyiima mwana a me.” 7Ŋa ajanji a nguunu e viinye aya mawobo o mpaniŋi e bo ndi: “Lemono onga wanda. Lecwe! Saabe lebuma nde ŋaa saabe lesiila na wanda!” 8O ŋaa bo akwari mwana abumi, emana bo atɨni obiimi o nde la na nguunu.» 9«Onga nguunu e viinye aje osa bo ŋaa buni? Nde aje oya na avuriha nde obuma ajanji a nguunu e viinye, nde aje ompa nguunu na akɨma. 10Be leka liira mbari ji o nca Osaangumu ndi:
“Kele acwi matɨni vayi
emikiriha kele e kaama ni.
11Nkʉmu mvuuru asi vwa,
yo se jaa e mve o miisi a saabe!”»
12Ankʉmu ma Ajife asahi lengulu mo okwara Jesu. Bo ayuhi ndi nde ata ncincami ji ŋa o bo. Ŋa bo amoni vwoho obila ma lemvuuru. O ŋaa bo anyili Jesu, bo ayeni.
Lepo le Sesare
13Atumi Afarisi ake mpili e Jesu bɨla baari me Erode, mo olehe nde oyere mo osa ndi nde owobo. 14Bo ayi na aduha nde ndi: «E Nkʉmu leyaa mbɨri we mvuuru aduuha asisyele. We vwoho o mvuuru kali, we se aka keesehe baari me elya ni. Ŋa we ayisiha njila e Njyami nca asisyele. Maduha bisi, mabuuna owʉra lepo le Sesare si kali? Ove bisi legʉri si kali?» 15Jesu oki oyaa ompyele a bo, nde oduhi na bo ndi: «Be lelehe me oyere mo oma? Leleha me doro a nkoso omo.» 16Bo ayi na omo, Jesu opɨsi bo ndi: «Olya ki bɨla ampɨri ma a na?» Bo akaali ndi: «A Sesare.» 17Ŋa Jesu na bo ndi: «Levuura Sesare e nde, be levuura Njyami e nde.» Bo aya o nca lekimi lo mini, me ekaliihi e nde.
Oduhu omo o me enyusihi ma akwi
18Asadisi ayi mpili e Jesu. Bo maduha ndi akwi ma aka nyusiha ni. Bo alehi nde oduhu ndi: 19«E Nkʉmu, Moyise ateendi o bisi ndi: “Balaha oka na mwana nguhu okwa onyila okari mwana kali, ove nde oyahi okuuli mo ompa mwana a nguhu akwi baana.” 20Ŋa eki na abalaha ncaami. A ncomi oyahi okari, nde okwi aka nyila baana ni. 21O jwele oyahi okuuli nde okwi, nde aka nyila baana ni. O tari se osi vwa, 22o nca abalaha a ncaami, se omo aka nyila baana ni. O ngula bo aso, okaasi se okwi. 23O cuhu manyusuha ntini akwi ma aje onyusiha, nde aje oka okari a na? Obila bo aso a ncaami aki alumi a nde!» 24Jesu okaali na bo ndi: «Be lematamaŋa, ŋa be leyaa mo oma? Obila be i yaa Esaangumu bɨla mpari e Njyami ni. 25Ŋa ntini e mvuuru anyusiha o mpaniŋi akwi, nde i ma buuna oyaha okari si kali olumi ni, mvuuru oya oka mva abaanji o yulu. 26Ma akwi manyusiha, be leka liira nca osaangumu o Moyise maami a Njyami aduhi nde o paani okikini otio oyahi mbaa ndi: “Me Njyami Abraame, Njyami a Isaake bɨla Njyami a Jakobe ni!”» 27Jesu oluusi ndi: «Nde ka Njyami akwi ni, ŋa a baari ma ali mwo. Be lemitamaŋa mbumbu.»
Okele a ncomi oma?
28Oyisihi ekele omo oyuhi bo mawobo. Nde omoni ndi Jesu akaali Asadisi yemiŋi, nde ociini opɨsi nde ndi: «Osibi avʉli abuha yu ni?» 29Jesu okaali na nde ndi: «Mono a ncomi: “Yuha, Isayele! Njyami Nkʉmu a saabe , Nkʉmu aso nde otu. 30We odii Njyami a Nkʉmu a we nca otima a we aso, nca oduduma a we, na ecimiŋi e we bɨla mpari e we eso.” 31Ŋa mono ojwele ndi: “We odii buha le we mva we omadya nyuru e we anku.” Osibi okɨma avʉli e jyele kali.» 32Oyisihi ekele oduhi na nde ndi: «E yemiŋi Nkʉmu! We aduhi ŋa jaa jaa: Njyami omo otu, mvuuru okɨma mva nde kali. 33We odii nde bɨla otima a we aso, bɨla oyeri o we oso na mpari e we eso, we se odii buha le we mva o we omadya nyuru e we anku. Vwa evʉli lecuha la anyama mo Njyami, bɨla lempa le nde avwoŋi akɨma.» 34Jesu omoni ndi nde ayalihi bɨla ncimi eso, oduhi nde na ndi: «We oli ka la na Onkani o anjyami ni.» Mvuuru se omo aka mabuuna olehe nde oduu ni.
Krisi bɨla Davide
35Jesu aki ayisiha o nca njo e Njyami, nde opɨsi ndi: «Ayisihi me ekele mabuuna oduha ndi Krisi mwana a davide buni? 36Oduduma Santi oluuli o Davide, nde anku oduhi ndi:
“Nkʉmu a me oduhi na Nkʉmu a me ndi:
Ka o nci o kwoho o me olumi,
tii ngo e me elehe abuha a we mo ombango ncina nyiili e we.”
37Davide nde anku acwolo nde o “Nkʉmu” : ŋa nde oka mwana a nde buni?»
Lenkɨndi la lemvuuru leyuuhi Jesu yemiŋi.
Jesu oduhi ayisihi me ekele osa ayiba
38Jesu ayisihi ndi: «Be lesi ayiba na ayisihi me ekele, bo njala ojyeŋe na amfa ma awali, awoosoho bo ma ambuhu. 39Bo oswoloho ebiri ma levusu nca anjo mavwonoŋo, na ebiri me enini ma ancinda. 40Bo mayaha biibi ma kuuli, bo osyaha evwoni me ela ela ndi amono bo. Ma aje oselehe oliisa bo!»
Okuuli owuha ompi eso me eki na nde
41Jesu oya o nci nca njo e Njyami, tele na biri e baari mampaaha adoro a ndamini. Nde akeese osuumbu a baari mampiihi adoro. Anga osolo a kuna mampa adoro a kuna. 42Okuuli owuha oyi, olehi adoro ankoso vwele. 43Jesu ocwoli alwoni a nde, oduhi na bo ndi: «Me eduha be sisyele: okuuli owuha yu omivʉla abuha aso ompa. 44Obila bo aso kuna ampi nceeri nca osolo a bo, nkʉsa na okuuli ampi eso me eki na nde o nca lebihi le nde.»
Currently Selected:
Marke 12: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
