Marke 11
11
Jesu anyuniŋa nca Jerusaleme
1Bo aciina tuha na Jerusaleme, paani e Betefaje na Betani, o paani okuri eliive, Jesu otumi alwoni a nde vwele. 2Nde oduhi na bo ndi: «Leje o mpuhu eli vusu. Be onyuniŋa o yo, be lebasaha mwana aane amakura, mvuuru okini sa akuma o nde ni. Be lenaani, leyi na me nde. 3Mvuuru opɨsa be ndi: “Be lesa bu mo oma?” Be leduhi na nde mbɨri: “Nkʉmu na kaama o nde, ŋaa nde avuura nde kuuni paraabu.”»
4Bo ayeni, bo abasihi mwana aane amakura o nji, o paani onwa a njo omo o njila. Bo anaani nde. 5Baari makiihi o ŋaa apɨsi bo ndi: «Be lenaana mwana aane yu mo oma?» 6Alwoni akaali maami a Jesu aki aduhi bo, anyili bo ayeni. 7Bo ayi na Jesu mwana aane jwa. Bo alehi amfa a bo o yula aane, Jesu okumi oya o nci. 8Baari kuna ajyali angoyi a yulu o njila. Ŋa maamo ncuusi e bo macebi nca swaha. 9Baari malaaniŋi levusu le Jesu bɨla malwoniŋi mawʉla ankɨma ndi: «Osana!#11.9 Ojana mo juuyi lerameye mo oduha ndi lekʉma le Njyami. Pisoome 118.25. Njyami ompa mvuuru aya o nkuumi e Nkʉmu andosoho! 10Andosoho aka na onkani mo oya, onkani o Davide a taara a saabe! Osana o nkara yulu!» 11Jesu onyunuŋi nca Jerusaleme, oyeni njo e Njyami. Nde okeesi angulu aso, nde oyeni Betani bɨla alwoni a kuumi na vwele. Obila cuhu eki emikolo.
Oti a fiige kali
12Eto na encyere o ntini e bo macyehi Betani, njala esi . 13Nde otaali oti a fiige omo aki na ncuusi, nde oyeni na akeese yuhu nde aki abuuna obasaha kiila. Nde ociina, nde obasihi ntuusi ntu, obila jya eki ka ntini o tolo a fiige ni. 14Ŋa Jesu okaali na ofigye ndi: «Mvuuru aka ma aje oja mburu e we ni!» Alwoni a nde se ayuhi.
Jesu acuura atehi a biibi o njo e Njyami
15Bo ato Jerusaleme. Jesu onyuniŋi nca njo e Njyami, oya acuura baari matehii na masuumihi biibi o nca njo e Njyami. Nde obuuni atanda a baari makalihi adoro, na ebiri e ma anci e baari mateehi ambinga, 16nde se aka nyila mvuuru obiri mpɨni kiila o nca njo e Njyami ni. 17Nde ayisiha bo, aduha bo ndi: «Akini oteende ndi: “Ma aje ocwolo njo e me o njo mavwonoŋo e baari aso ni”? Ŋa be, be lemasa yo eya jisihi embeŋe!» 18Asi mavwoŋi ma anini bɨla ayisihi me ekele eyuha vwa, bo asahi osuumbu mo obuma Jesu. Ŋa bo amoni vwoho obila lemvuuru leki lemamono ove me eyisihi e nde. 19Ekikolo eto, Jesu bɨla alwoni a nde acuuyi nca onguundu.
Oti a fiige oka kaa: oyalihi bɨla ovwono
20Eto na encyere, bo ayira amoni oti a fiige omakaa. Omakaha tii ngo ekaŋa. 21Pyere oyibihi maami ma ayiri, oduhi na Jesu ndi: «E Nkʉmu, mono oti a fiige a we alohi omikaa aso.» 22Ŋa Jesu oduhi na alwoni a nde ndi: «Be lesi oyalihi o Njyami! 23Sisyiele me eduha be, mpɨni mvuuru aduha na okuri ki ndi: “Cyehe o ŋa we oma va nca okeri onini”, yuhu nde i sa ekemi nca otima a nde ni, nde se oyalihi ndi maami a nde aduha ma aje oya. Ma aje ompa nde mo se. 24Kya obila o me eduha be mbɨri: aso a be lepɨsa nca ovwoni, leyalaha mbɨri be lemibaha. Ma aje ompa be jo se. 25Ŋa ntini e be leka mo otele mo ovwono, yuhu we na jaa na mvuuru, boloho nde mo bu ndi Taara a be ali o yulu oboloho se maami a be ma abi.» [26#11.26 Nca eteendihi eke, olwo yu mva Mat 6.15. Amatzennde ndi: «Yuhu be i boloho abuha ni, Taara a be o yulu aka boloho maami a be ma abi se ni».]
Onkani o Jesu ogwaha kuni
27Bo ayi navuriha o Jerisaleme. Ntini e Jesu aki aje aya o nca njo e Njyami, asi mavwoŋi ma anini bɨla ayisihi me ekele na akuuru aciini na e nde. 28Bo apɨsi nde ndi: «We asyaha maami ma mo onkʉmu o na? Ampi we onkʉmu mo osa mo na?» 29Jesu okaali na bo ndi: «Me se emalehe be oduhu omo. Lekaala me ŋa me eduha be onkʉmu o me esiha maami maa o bo. 30Ateeme a Jan awuuhi na yulu sii na baari mo omwo? Lemakaala me!» 31Bo aya mawobo o mpaniŋi e bo ndi: «Saabe okaali mbɨri: “Na yulu”, nde opɨsa saabe ndi: “Be lebisi oyalaha Jan mo oma?” 32Ŋa saabe se okaala mbɨri: “Na baari ma omwo...”?» Bo aki na vwoho ma lemvuuru, obila baari acimiŋi ndi Jan aki jaa jaa owobi a mbari e Njyami. 33Ŋa bo akaali Jesu ndi: «Bisi iyaani.» Jesu oduhi na bo ndi: «Me se eka duha be onkʉmu o me esyaha maami ma ni.»
Currently Selected:
Marke 11: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
