Marke 10
10
Afarisi malehe Jesu oyere
1Jesu ocyehi ŋa oyeni ngaala e Jude, ngula Jurde. Lemvuuru levurihi lekuhi o paani e nde, nde ayisiha bo mo otiiri a nde. 2Afarisi aciini mo bu ndi bo alehe nde oyere. Bo apɨsi nde yuhu balaha ebuuna ocuura okari a nde. 3Jesu okaali ndi: «Okele a Moyise alehi be oma?» 4Bo ndi: «Moyise aduhi oteende osaangumu ecala be, omana we ocuuri okari.» 5Ŋa Jesu na bo ndi: «Moyise ateendi okele jwa o be, obila be na otima onono. 6Ŋa me ebaanihi e ncye, Njyami owaangi “Balaha bɨla okaasi”. 7Kya obila eli balaha eje onyila taara bɨla nguhu a nde, mo oje na aka bɨla okari a nde, 8ŋa bo a vwele aya lemvwa le mo letu. 9Mo vwa, mvuuru i cala a Njyami amavusuha ni.» 10Nde ovuriha njo, alwoni avurihi alehi nde oduhu o jaa jya. 11Nde okaali na bo ndi: «Mvuuru acuura okari a nde mo oyaha okɨma, nde ŋaa ncuuma asyaha mo okari a ncomi. 12Okaasi se ocuura olumi a nde oyaha balaha nkɨma, nde ŋa ncuuma asyaha.»
Jesu ampa baana andosoho
13Baari ajiihi na baana na e Jesu ndi nde otiila na bo, ŋa alwoni abye na bo. 14Ntini e Jesu amoni vwa, obye nkala oduhi na alwoni ndi: «Lenyila baana aya na e me! Be leka kanaŋa bo ni, obila Onkani o Njyami oka na baari a mva bo. 15Me eduha be sisyele: mvuuru abɨsa oyamba Onkani o Njyami mva onkere, aka aje onyuniŋa o bo ni.» 16Emana nde oyahi baana nca jyala e nde, nde olehi jyala o yula bo, emana ompi bo andosoho.
Osolo bɨla Onkani o Njyami
17Ŋa Jesu oki oya aje, balaha mo eyi ma anciini owʉri avwo o miisi a nde, oduhi ndi: «E Nkʉmu ove, me mo obaha lebihi le mbumbu me osa buni?» 18Jesu oduhi na nde ndi: «We acwolo me mo ove mo oma? Mvuuru ove kali, o ngula Njyami otu. 19We oyaa esibi: “We i buma mvuuru ni, we i sa ncuuma ni, we i jɨba kʉba ni, we i banaŋa mvuuru jaa ni, we i sa mvuuru jaa e mbi ni, we onyiimi taara bɨla nguhu a we.”» 20Balaha jya eduhi na nde ndi: «E Nkʉmu me emanyiima maa aso esi wa me onkere.» 21Jesu okeesi nde bɨla dya eso, oduhi ndi: «We oma yele kiila omo: jyehe, tehe biibi e we ali na jo eso, we ompa anga owuha adoro ŋa we aje obaha osolo o yulu, omana we oya we olwono me.» 22Ŋa nde oyuha mbari jya nde nyuru eyeni, nde omoni obi nde se oyeni, obila nde aki na osolo onini. 23Jesu okeesi alwoni a nde ma aki ma amajeneŋe nde, nde oduhi na bo ndi: «Eje oka na syami ma anga osolo mo onyuniŋa nca Onkani o Njyami!» 24Alwoni aya kimimi o mbari jya. Ŋa Jesu ovurihi oduhi na bo ndi: «Baana a me, mo onyuniŋa nca o Onkani o Njyami na syami! 25Ŋa eli nyengele mo samo ma onuniŋa mo bulu e sori, okoroho mvuuru ali na osolo na syami mo onyuniŋa nca Onkani o Njyami.» 26Alwoni aselihi okɨma, aya mapɨsa o mpaniŋi e bo ndi: «Ŋa abuuna ovuuha na?» 27Jesu okeesi bo oduhi ndi: «Baari mo omwo i buuna ni, ŋa o njyami, Njyami abuuna aso.» 28Ŋa Pyere oduhi na nde ndi: «Ŋa mamono, bisi lemasuba eso kalihi mo olwono we.» 29Jesu okaali na nde ndi: «Me eduha be sisyele: mvuuru onyila njo e nde bɨla baana ma anguhu na ankeri, na nguhu bɨla taara na baana bɨla anguunu a nde obila o me bɨla Ncya e Mve, 30mvuuru jwa aje obaha enkama e biibi ma antini ma. Nde aje obaha anjo, bɨla baana ma anguhu, na ankeri, na anguhu, na baana bɨla anguunu, bɨla ncwesehe se obila o me. Ma antini ma aje oya, nde aje obaha lebihi le mbumbu. 31Baari kuna ma ali levusu, ma aje oka baari ma lembɨsa. Ŋa ma ali lembɨsa se ma aje okɨriha levusu.»
Jesu atooso leku bɨla enyusihi e nde mo jwe lo otari
32Bo aki o njila mo okuma Jerusaleme. Jesu aki alaana levusu le alwoni. Bo aki amoni ongwo, na baari ma alwoniŋi bo aki na vwoho. Nde ovurihi oyahi alwoni a kuumi na vwele, oya abaana oduha bo maami ma aje oya o nde. 33«Lemono saabe leya lekʉma Jerusaleme, mpili ma aje ompa Mwana a mvuuru o jyala ma ankʉmu ma asi ma avwoŋi ma anini, na ayisihi me ekele. Bo aliisa nde tii leku, ampa nde na ankani ma anjya. 34Bo ma aje osebe nde, acuura nde antayi, bo abula nde ekaci, omana bo abuma nde. Ŋa ecuhu etari oyira, nde onyusuha.»
Jake bɨla Jan mapɨsa Jesu jaa
35Jake bɨla Jan a baana a Jebede, aciini tuha na Jesu. Bo apɨsi nde ndi: «E Nkʉmu bisi lesaha mbɨri we osa bisi jaa e bisi lepɨsa we ji.» 36Jesu okaali ndi: «Be lesaha me esa be oma?» 37Bo akaali na nde ndi: «Ntini e we aje oka nca lekʉma le we, yalaha bisi leka omo o kwoho o we omboho, omo o kwoho o we olumi.» 38Ŋa Jesu na bo ndi: «Be i yaa a be lepɨsiha ni. Be lebuuna onwa kobo ambaba e me eje onwa, si kali obaha ateeme mva ma aje ompa me?» 39Bo akaali na nde ndi: «Ee bisi lebuuna.» Jesu oduhi na bo ndi: «Be leje onwa kobo e me eje onwa, ampa be ateeme ma aje ompa me. 40Me ka mvuuru eswolo mvuuru aje oka mo kwoho o me omboho, si kali o kwoho o me olumi ni. Ebiri bya ma aje ompa baari ma amayeese o jo.»
41Ŋa ntini alwoni maamo a kuumi mayuhi vwa, bo abye nkala na Jake bɨla Jan. 42Jesu ocwoli bo, oduhi na bo ndi: «Be leyaa mbɨri baari mamonoŋo mva ankʉmu me esi makuumaha o yula baari mva ankʉmu. Baari ma anini malaha onkʉmu o bo o yula baari se. 43Ŋa o mpaniŋi e be maami i yira vwa ni. Mvuuru asaha oka onini o mpaniŋi e be, ove nde oki ojanji a be. 44Ŋa mvuuru asaha oka levusu le be aso aje oka oyiha abuha aso. 45Obila Mwana a mvuuru aka aya ndi ajanja o nde ni, ŋaa mo ojanja na lempa la lebihi le nde mva gʉra mo ovusuha baari kuna.»
Jesu asalaha miisi a Baritime
46Bo ato Jeriko. Ŋa Jesu oki acuuha nca Jeriko bɨla alwoni a nde na lemvuuru le kuna, mvuuru ali i mono ni omo macwoloho o Baritime a mwana Time, aki o nci mo osyese a njila mo olaa baari. 47Nde oyuha ndi jwa aki Jesu a Najarete, nde oya awʉla ankɨma ndi: «E Jesu a mwana a Davide, mono me nkerihi!» 48Baari kuna abye na nde ndi nde oka pi, ŋa nde aselehe owʉla ankɨma ndi: «E mwana a Davide, mono me nkerihi!» 49Jesu osuri, oduhi ndi: «Lecwolo nde.» Ŋa bo acwoli mvuuru ali i mono ni, aduhi nde ndi: «Yaasa nyuru, temeŋe nde acwolo we!» 50Ŋa nde otʉni ngoyi a nde a yulu, ongundihi oyi mpili e Jesu. 51Jesu opɨsi nde ndi: «We asaha mbɨri me esa we oma?» Mvuuru ali i mono ni okaali nde ndi: «Rabuni mo oduha ndi “Nkʉmu”, sa mbɨri me evuriha emono!» 52Ŋa Jesu oduhi nde ndi: «Jyehe, oyalihi o we omivusuha we.» O nci na nci ŋaa nde ovurihi omoni, nde oya alwono Jesu o njila.
Currently Selected:
Marke 10: MDT
Highlight
Share
Compare
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
