Ngalate 4
4
Lemicyehe mo oyiha leya nyengele mva baana
1Bi ecimiŋi e me: lebihi lo onga wanda aki akini obusi, ekiihi e nde mva mo oyiha, se o nde ali nkʉmu a biibi eso. 2Ŋa nde osa kaha ni ngula baari ma akyelihe nde bɨla biibi e nde, ntii ngo cuhu e taara a nde amayeese. 3Ŋa saabe se, ntini e saabe leki lekini baana, saabe lekihi ayiha a mpari ekuumaha o yula ncye.#4.3 Kol 2.8.Mpili angɨreke eki na mpari mamonoho bɨla ma ali i mono ni. 4Ŋa antini a Njyami ayeesi ato, nde otumi Mwana a nde. Mwana jwa okaasi akʉli. Mwana jwa se aki ncina okele a Moyise. 5Mo ogʉra mvunu e baari ma ali ncina okele, mo bu ndi bo aka nyengele, saabe leka baana a Njyami a mbaha.
6Be jaa jaa baana a nde. Njyami omatuma Oduduma a Mwana a nde nca etima e saabe, agʉla nkɨma: «Aba! Ndi Taara!»
7We oya ka oyiha ni ŋa mwana. Ŋa mva mwana, we se nga wanda: maa maami a Njyami.
Pole amono ongwo ma asi Ngalate
8Ntini e kala be leki kini oya Njyami ni, be leki ayiha ma anjyami mo oca oca ma ali ka anjyami a jaa jaa ni. 9Ŋa lobi be lemiyaa Njyami si kali nde se omiyaa be, be omabuuna ovuriha nca maami mo oca ma ali mpari kali mo ovuriha oka ayiha buni? 10Be lenyiimaha ecuhu bɨla angondo na antini na esibi yemihi! 11Be lempa me ongwo, me emajanja o be ŋa ngori!
12Leka mva me, mo oma me eya mva be. Baana ma anguhu kolokolo e be, be leka sa me jaa e mbi ni. 13Be leyaa mbɨri ntini e me etoosi be Ncya e mve mo jwe le ncomi, me eki na ngaa. 14Be lemoni obi ntini e be lemoni nyuru e me, okoroho be leka bese me be lebɨsi me ni. Ŋa be leyambi me mva obaanji a Njyami, mva Jesu Krisi nde anku. 15Oswere o be kya o co? Obila me esiisa enwa mbɨri: be leki mo obuuna, ka be leki lebɨra miisi a be, be lempa me! 16Ŋa lobi me emikiriha buha le be lo ombangu obila me eduha be asisyele?
17Osuumbu majuusa be jwa ove kali. Bo masaha ocala saabe mo bu ndi be leka bɨla bo. 18Jaa e mve omakaaha, lelaha la leve antini aso, ŋa ka o ntini e me eli o mpaniŋi e be ntu ni! 19Baana a me, me evririha omono ampasi o be mva okaasi akʉliha, ntii ngo o Krisi abaha biri o be. 20Me eki na njala oka o paani e be ma antini ma, mo bu mbɨri me ewobi na be mo osuumbu okɨma. Me emono ongwo obila o be.
Lemihi la Agare bɨla Sara
21Lemaduha me, be baari lesaha oka ngula okele, be leka yuuha osuumbu eduuha okele jwa ni? 22Amateende ndi: Abraame okʉli baana vwele. Omo bɨla okaasi ajanjihi o njo e nde, omo bɨla okaasi a nyengele. 23Ŋa okaasi ojanji akʉli mwana a balaha ma akabi, okoroho okaasi a nyengele akʉli mwana a balaha lemihi na ndayi. 24Jaa obihi eli ŋaa: akaasi a vwele baa omakaaha endihi e jyele. Ondihi omo owiihi na okuri o Sinayi, nde okʉli baana ma aki ayiha. Okaasi jwa omakaaha Agare. 25Obila Agare omakaaha okuri o Sinayi oli ŋa Arabi. Nde ogwana onguundu o Jerusaleme o lobi ki, ŋa nde bɨla baana a nde ayiha. 26Ŋa Jerusaleme e ŋa yulu eli nyengele, jwa nguhu a saabe. 27Obila amateende ndi:
«Swere okaasi onguuma, we aki i kʉla ni!
Gʉla ankɨma mo oswere, we aka jyaba ebaani ni.
Obila okaasi ma amasuba kalihi aje okʉla baana
avɨla mo okaasi ali na olumi.»#4.27 Esayi 54.1.
28Ŋa be baana ma anguhu, be baana a ndayi mva Isake. 29Ŋa osuumbu a mwana makʉli ma akabi aswesihi mwaana makʉli mo Oduduma na kala, osuumbu ju jwa se okini tii ngo lobi. 30Ŋa Esaangumu me eduha ndi nki? Ndi: «Cuura ojanji bɨla mwana a nde, obila mwana okaasi ojanji i buuna obaha wanda mo ntu bɨla mwana okaasi ali nyengele ni.» 31Ŋa mo vwa baana ma anguhu, saabe ka baana mo okaasi oyiha ni, saabe baana mo okaasi a nyengele.
Currently Selected:
Ngalate 4: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
