Ngalate 3
3
Ekele si oyalihi
1Aa asi Ngalates be ncimi kali, amaloho be na, ni bu o miisi a be amalaha be Jesu Krisi ma amakomo ma lembanji? 2Lemapasa me jaa ji, be lemabaha Oduduma ŋa ma lenyiima le ekele si mo osuumbu a be leyuhi mbari o yalihi? 3Be tii bu ncimi kali? Be lebaani maami bɨla Oduduma, be lesaha omana mo mpari akabi? 4Be lemasa maami mva maa ngori? Kali ka ngori ni! 5Mvuuru ampaha be Oduduma omana osi emaa o mpaniŋi e be, nde asiha vwa mo osuumbu masyaha maami me ekele, sii mo osuumbu a be lemayuha mbari oyalihi?
Baari mayalaha mabaha andosoho bɨla Abraame
6Mo oma Abraame «aki na oyalihi o Njyami, jya biri e Njyami ŋa ayahi nde o mvuuru a tele.» 7Ŋa leyuha lo: baari ma ali na oyalihi, baa baana ma Abraame. 8Mo oma, Esaangumu emabaana ojyese ndi Njyami asa baari ma ali ka Ajife ni aka tele mo oyalihi, nde obaani otooso ncya e mve ji na Abraame ndi: «Esi eso me eje obaha puha o ngula we.» 9Ŋa baari ma amayalaha mabaha andosoho bɨla Abraame nga oyalihi.
10Ŋa baari aso manyiimaha ekele eli o nca ndoho, obila amateende ndi: «Ndoho eka na mvuuru mpɨni nde ali i nyiima maami ma amateende nca esaangumu me ekele ni.» 11Eli ni celele ndi: mvuuru i ka tele o miisi a Njyami obila me ekele ni. Mo oma, amateende ndi: «Mvuuru ali tele mo oyalihi aje obaha lebihi.»#3.11 Aba 2.4. 12Mo oma, ekele bɨla oyalihi osuumbu ka omo ni. Amateende ndi: «Mvuuru aje onyiima maami me ekele me eduha aje obaha lebihi o jo.»#3.12 Det 27.26
13Krisi omagʉra mo vusuha saabe mo ndoho ekele. Nde anku omakiriha ndoho mo saabe, mo oma amateende ndi: «Ndoho eka na mvuuru alehe swe mo oti.»#3.13 Det 21.23 14Mo vwa, andosoho ma Abraame ato na e baari a Jesu Krisi ma ali ka Ajife ni. Mo bu ndi saabe lebaha Oduduma o ngula oyalihi, Oduduma a Njyami alehi ndayi.
Ekele bɨla ndayi
15Baana ma anguhu lemamono maami a baari mo omwo. Yuhu mvuuru omateende osaangumu o wanda yemihi, mvuuru okɨma i buuna odiisa si kali oluusa maami akɨma ni. 16Mo oma, ndayi alehi na Abraame bɨla mwana a nde. Aka duha ndi: «Bɨla ŋa baana a nde ni.» Mva maduha ndi baana a kuna kuna. Ŋa malaha mvuuru omo ndi: bɨla ŋa «mwana a nde» , omakaaha Krisi. 17Leyuha ecimiŋi e me: Njyami mvuuru abaani oteende osaangumu o wanda o yemihi. Ekele e Moyise eyi enkama me esibi ena na ekuumi me esibi etari (430) emiyira. Ekele eka diisa osaangumu owanda ni, kari se i diisa ndayi e Njyami alehi ni. 18Mo oma, yuhu mabaha wanda o ngula ekele, jya eyiha ka ndayi ni. Okoroho Njyami ampi Abraame mpolo e nde o ngula ndayi.
19Ŋa okele ncwo ma? Aluusi okele mo osa ndi ajyaba maami ma abi, mo dɨla ejiihi e mwana Abraame malehi ndayi o nde. Abaanji baari ma asi ndi ayaa okele, mo kwoho ŋa owobi omo aki o mpaniŋi. 20Ŋa owobi aki o mpaniŋi jwa aka wobo ma lengulu le mvuuru omo ni. Ŋa Njyami ni omo otu.
21Okele abese andayi a Njyami? Mbaa kali. Yuhu aki amampa okele, okele ampaha onkʉmu mo obaha lebihi, nkaa mvuuru mo oka tele ove mo okele. 22Ŋa esaangumu e Njyami me eduha ndi ncye eso eli o ncina mpari e mbiini, kya obila eli ove amoni ndayi e Njyami o baari ma amayalaha aso. Obila mo oyalihi o bo o mo Jesu Krisi.
23Ntini oyalihi oki okini oya ni, saabe lekihi ayiha mo okele, mo odɨla ntini e Njyami aje osa saabe oyaa oyalihi. 24Mo vwa, okele aki kiila ekyelihi saabe mo odɨla Krisi, mo bu ndi saabe leka tele mo oyalihi. 25Ŋa oyalihi omana oya, saabe leya ka ngula okyeli jwa ni.
26Obila be aso leya baana a Njyami mo oyalihi o ma Jesu Krisi. 27Ee be aso lemayaha ateeme o Krisi, be leya mva Krisi. 28Eyiha Ajife bɨla Angɨreke kali, ayiha bɨla baari a nyengele se kali, okaasi bɨla balaha se kali. Obila be aso leya mvuuru omo o Jesu Krisi. 29Ŋa yuhu be baari a Krisi, njaa be omakaaha baana ma Abraame, be anga wanda e ndayi malehi.
Currently Selected:
Ngalate 3: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
