Ngalate 2
2
Pole bɨla antuma maamo ma aka jaa lemo o Jerusaleme
1Ŋa esibi kuumi na ena eyira, me evurihi ekumi na Jerusaleme bɨla Barnabase, me ebiri na Tite bɨla me se. 2Okoroho me ekumi kwa o jaa e Njyami alahi me, me elahi bo Ncya e mve e me etoosi baari ma ali ka Ajife ni. Me se elahi yo na ankʉmu mo okuha o paani. Mo odʉma me emaka mva mvuuru adʉma nciini, mva mvuuuru adʉmiŋi nciini e ngori.#2.2 Ledʉma le nciini omakaaha janja e nde asiihi. 3Ŋa aka mpa Tite aki bɨla me akihi Ongɨreke, okʉra mo osa sasi ni. 4Okoroho baana ma anguhu mo oca oca aki na njala, bo ayi o mpaniŋi e bisi mva abuha mo ombangu, bo ayi na amono osuumbu a bisi lekiihi nyengele, leka le nyengele lya legwaha na e Krisi a Jesu. Bo aki masaha okaala bisi ma ayiha. 5Bisi leka yalaha maami a baari baa se jwe lemo ni, mo bu ndi akyele asisyele a Ncya e mve mo be.
6Ŋa mo baari ma ali na etomi me enini, etomi e bo i sa me ongwo ni, obila Njyami aka keesehe ekiihi e baari ni, ankʉmu baa aka mpa me okʉra mo osa jaa nkɨma ni. 7O ngula ŋaa, bo amoni ndi ampi letooso le Ncya e mve le baari makini osa sasi ni na me, mva o nde atumi Pyere otooso ncya e mve na baari ma amasa sasi. 8Obila Njyami mvuuru asi Pyere oka ntuma a baari ma ali Ajife, nde se mvuuru asi me oka ntuma a baari ma ali ka Ajife ni. 9Ŋaa Jake na Sefase bɨla Jan, ma amayaha mva ankʉmu mo okuha, bo ayiimbi puha e Njyami asi me, bo ayamihi saa Barnabase mo olaha ndiimi ndi saabo jaa lemo. Bisi leyeni mpili e baari ma akini osa sasi ni, ŋa bo ayeni mpili baari ma amasa sasi. 10Bo apɨsi bisi eso ni mo oyubaha anga owuha a nca okuha. Jya janja e me eselihi osa.
Pole bɨla Pyere ŋa Antyose
11Ŋa Pyere oto Antyose, me tohi bɨla nde kenene, obila nde aki ncoso mbi. 12Mo oma, ntini e baari a Jake atumi ma aki akini oto ni, nde ajiihi biri mo bɨla baari ma aki ka Ajife ni. Ŋa bo ato, nde obayi baari ma aki ka Ajife ni, oya o la la, mo odʉma baari ma amasa sasi. 13Ajife maamo se alwoni maami a nde, abiri Barnabase nde anku se nca ompyele a bo jwa. 14Ŋa ntini e me emoni mbɨri nde i sa maami tele bɨla asisyele a Ncya e mve ni, me eduhi na Sefase o miisi a baari aso mbɨri: «Yuhu we ali Ojife, we asa maami mva baari ma ali ka Ajife ni, ŋa ka mva Ojife ni, we obuuna ompa baari ma ali ka Ajife ni okʉra mo ka mva Ajife buni?»
Ajife bɨla baari ma ali ka Ajife ovuuha mo oyalihi
15Akʉli saabe ni Ajife, ŋa ka baari ma ali ka Ajife ni, asi ma ambiini baa. 16Saabe leya mbɨri mvuuru ma aka ceesehe o maami me ekele ni, ŋa mo oyalihi o ma Jesu Krisi otu. Saabe se lemayalaha Jesu a Krisi, mo bu ndi aceese saabe mo oyalihi o ma Krisi, ŋa ka o maami me ekele ni. Obila, mvuuru se omo i ka tele o maami me ekele e Moyise ni. 17Ŋa saabe lesaha mbɨri aya saabe mva baari a tele obila o Krisi, ŋa yuhu mayaha saabe se masi ma ambiini, vwa mo oduha ndi Krisi ojanji a mo mbiini? Mbaa kali! 18Mo oma, me ovuriha oyeese maami me ekele e me eki emacala, me ŋa me enyuruha jo. 19Ŋa obila me ekele me emakwa. Leku leya me ekele jo anku. Mo bu ndi lebihi le me leka o Njyami. Amakomo me ma lembanji bɨla Krisi. 20Me na lebihi, ŋa eya ka me ni, Krisi mvuuru ali na lebihi o me. Lebihi le me le lobi lema akabi leya lebihi lema oyalihi o ma Mwana a Njyami amadya me, nde se ampa lebihi le nde anku o me. 21Me eka bɨsa obiisa mpolo e Njyami ni. Obila yuhu mvuuru oka tele me ekele, ŋa njaa Krisi omakwa ngori.
Currently Selected:
Ngalate 2: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
