Asi Efese 6
6
Ekihi e baana bɨla a taara na anguhu
1Be baana, lekuna anguhu bɨla a taara a be mo Nkʉmu, jya jaa eli tele. 2«Nyiima taara bɨla nguhu a we» jwa osibi a ncomi ali na ndayi. 3«Mo vwa we oka nca oswere, we se obaha lebihi le kuna o yula ncye».
4Ŋa be ma ataara, be leka syaha mbɨri baana abye nkala ni. Ŋa lekuusa bo nca andwo na atibi a Nkʉmu ampa be.
Ekiihi ma ayiha bɨla ankʉmu
5Be ma ayiha, lenyiima ankʉmu a mo yula ncye bɨla baani na onyiimi na otima a samblisa mva mo Krisi. 6Ŋa ka o ntini e bo makeese be ntu, mva masyaha baari mo omwo ove ni. Ŋaa lesa ediiŋi e Njyami bɨla otima a be aso, mva ayiha a Krisi. 7Lejanja o bo bɨla ediiŋi me eve, mva o be lejanja o Nkʉmu nde anku se, ŋaa ka mo baari mo omwo ni. 8Be lejyabi mbɨri mvuuru aje osa leve aje obasaha lo mpili e Nkʉmu. Se nde aka oyiha si kali mvuuru a nyengele.
9Ŋaa mo be ma ankʉmu, lesa vwa ma ajanji a be. Be leka liisaha bo oca ni. Ove be leyibihi mbɨri na be na ayiha be nkʉmu omo ali o yulu. Nde aka pamaha reŋe ni.
Biibi me eta e Njyami ampaaha
10Me emanihi, lesa mpari mo Nkʉmu, nca mpari e nde e nini. 11Lebira biibi mo jwana eta e Njyami ampaaha, mo bu ndi be lebuuna obɨsa esima e jabri. 12Mo oma, ngʉru e saabe ka bɨla baari mo omwo ni. Ŋa ngʉru jya bɨla onkʉmu na ankani bɨla ankʉmu a mo osi oli o nca lempiibi ki. Bɨla ŋa mpari edidima me ebi me eli o yulu. 13Leyaha biibi me eta e Njyami ampaaha! Mo oma o tsuhu e mbi, be lebaha okiini mo ojwana tii ngo o be lemana. Be leka mo otele.
14Ŋaa letemeŋe! Lelehe asisyele o lehe mva kwaamba. Be lebiri maami a tele mva kiila madibiha ntulu. 15Be lelaasi okabi mva akoroho o nyiili e be, mo otooso ncya e mve e mo oduusu. 16Ŋaa be leyahi oyalihi mva nduba: kari eje ompa be lengulu mo odiisa aseende ma ambaa mo onga Mbele aso. 17Lebaha evusuhi mva ompaka, ŋa mbari e Njyami mva baha ampele mwele oduduma Santi ampi. 18Oduduma ompa be evwonihi ma amihi aso, bɨla biibi e be lepɨsa ma antini aso. Be lemohi be levwoni me epeende eso, be i kolo ni. 19Be levwono se mo me. Mo vwa, Njyami ompa me mbari e tele o ntini e me ewobo. Me se eduha bɨla lila jaa evusihi e Ncya e mve. 20Ŋaa se me eli mo ongenehe, me omakaaha mvuuru matumi otooso ncya e mve ji. Levwono mo bu mbɨri me wobo bɨla lila mva o me edya.
Ewoosihi ma lembɨsa
21Me esaha mbɨri be lejyaba osuumbu ali, na a me esyaha se. Tisike a mwana a nguhu a saabe a dya ali nkʉmu nde se tele mo janja e Nkʉmu, aje oduha be ancya a me aso. 22Me etuma nde na e be mo bu mbɨri be leyaa osuumbu a bisi leli, nde oyaasa be se.
23Ŋaa oduusu bɨla dya na oyalihi o Njyami a Taara bɨla Jesu Krisi a Nkʉmu, oka na baana ma anguhu. 24Mpolo e Njyami eka na baari aso ma amadya Nkʉmu a saabe Jesu Krisi bɨla dya eli i wa ni.
Currently Selected:
Asi Efese 6: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
