Asi Efese 5
5
Leka le nca oyalala
1Ŋaa be baana a Njyami amadya, lesa mpari mo oka mva nde. 2Ove ekiihi e be eki ekiihi e mo dya, mva o Krisi se amadya saabe. Nde omampa lebihi le nde mo saabe, mva ndamini bɨla vwoŋi oyombo eli na nculu e mve.
3Be epeende e Njyami, mo vwa ove i mono maami mo obɨla na maami a nkɨri si kali mfunwamwo o mpaniŋi e be ni. 4Be se i matuha abuha, be i matusuha mbari ojili si kali e nkɨri ni. Ŋaa be, be ompaha eso ni Njyami leve. 5Ŋaa ove be lejyabi mbɨri: mvuuru ali na obɨla na nkɨri, na lekandangoyi nde mva mvuuru avwonoho anjyami mo oca oca. Bo ma aka aje obaha wanda e mo Onkani o Krisi bɨla Njyami ni.
6Mvuuru i taasa be mo mbari ankʉra ni. Mo aso ŋa maami ma abi a Njyami abyeŋe nkala na baari mabesehe nde. 7Be leka syaha maami a mo bɨla bo ni. 8Be leki na kala o nca lempiibi. Lobi be leya mo oyalala o Nkʉmu. Ŋaa leka mva baana mo oyalala. 9Obila lemburu le oyalala omakaaha leve bɨla maami a tele na asisyele. 10Lekeese maami ma asa Nkʉmu ove. 11Be leka kaaha bɨla baari masyaha maami mo oca o nca lempiibi ni. Ŋaa letusuha mo o nji baari ayaa. 12Obila eli na okʉru mo owobo o maami a baari ake masyaha majisihi. 13Ŋaa maami ma amatusuha aso, alahi mo mo oyalala. 14Obila maami ma ali mo oyalala aso, makiriha se oyalala. Kya obila maduuha ndi:
«We ali tolo nyusuha,
temeŋe o mpaniŋi akwi,
ŋa Krisi aje okyeme o we.»
15Mo vwa, be lesyaha ayiba me ekiihi e be. Be leka syaha maami mva ejili ni, ŋa mva anga ncimi. 16Lekele antini ma, obila ecuhu leli o jo bi ebi. 17Be leka kaaha mva baari ma ali oyeri kali ni, ŋaa leyuha ediiŋi e Nkʉmu yemihi.
18Be leka nywaha mali kuna ni. Mo mataasa mvuuru, ŋa ove be luuli mo Oduduma Santi. 19Leyaasa abuha ma apisome na aluumu a Njyami, na aluumu mo Oduduma ampaaha. Be leyimi, be leberehi angwomi mo oyima aluumu a Nkʉmu bɨla etima e be eso. 20Lempa Njyami a Taara leve ma antini aso, na o maami aso. Mo nkuumi e Nkʉmu a saabe Jesu Krisi.
Ekiihi ma akari bɨla alumi
21Be lenyiimaha abuha o mpaniŋi e be mo baani e mo Krisi. 22Akari lenyiima alumi a be mva o be lenyiimaha Nkʉmu. 23Obila olumi omakaaha nkʉmu okari. Mva o Krisi ali nkʉmu Okuha. Krisi omakaaha ovusihi Okuha ali nyuru e nde. 24Mo osuumbu Okuha anyiimaha Krisi, akari se ove anyiimi alumi a bo o maami aso.
25Alumi ledya akari a be, mva o Krisi amadya Okuha. Nde se ampa lebihi le nde mo Okuha. 26Krisi adii vwa mo bu ndi Okuha oka mo Njyami, mo ocuka nde ma anja na Mbari. 27Nde adii olaha Okuha o nde anku nca owali o nde oso. Okuha ali ce ce jaa e mbi kali, mpɨri bɨla enkari kali. Se jaa nkɨma e mbi kali. 28Mo vwa, alumi ove adii akari a bo mva o bo ma amadya anyuru a bo anku. Mvuuru adya okari a nde, nde adii nyuru e nde anku. 29Mvuuru aka belehe nyuru e nde anku ni. Kali mabunuha ni yo akyeli yo yemihi, mva o Krisi asyaha mo Okuha. 30Ŋaa saabe mbaa eto e ma nyuru e nde. 31Mva ma amateende ndi: «Kya obila eli balaha eje onyila taara bɨla nguhu a nde, mo oka bɨla okari a nde, ŋaa bo vwele aka lekabi lemo.» 32Jya omakaaha jaa enini e ma ajisi. Me eduha mbɨri yo jaa egwana Krisi bɨla Okuha. 33Mawobo ŋa se na be: ove olumi odii okari a nde mva e nde amadya nyuru e nde ankulu. Ove okari se onyiimi olumi a nde.
Currently Selected:
Asi Efese 5: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
