Asi Efese 4
4
O Krisi okuha oli jaa mo
1Ŋaa me eyaasa be me eli mo ongenehe obila o janja le Nkʉmu, leyeese lebihi le be leka yemihi lemihi na ombila ma ati be. 2Ove be leki baari ma ali na baani bɨla oduusu na ledɨla. Ove be lebahi okiini ma abuha o nca dya. 3Lesa mpari mo oka mvuuru omo o nca Oduduma Santi, mo oduusu omavusaha be. 4Nyuru eli mo ntu Oduduma se omo otu. Mo osuumbu jwa, Njyami omacwolo be se mo lila mo ntu. 5Nkʉmu oli omo otu, oyalihi omo otu, ŋa ateeme se amo atu. 6Njyami oli omo otu, nde Taara a saabe aso. Nde akuuma o yula eso. Nde ajanja ma angulu aso, nde se oli o yulu bɨla ncye eso .
7Saabe mvuuru na mvuuru omabaha mpolo, lemihi ŋa buhu le puha le Krisi. 8Kya obila ma amateende nca Osaangumu ndi:
«Ntini e nde ayeni yulu,
nde okwari engenehe,
nde ompi baari mo omwo apuha.» 9Ŋaa «nde oyeni yulu» vwa mo oduha ndi nki? Vwa mo oduha ndi nde se omasuriha tii ngo ncina ncye. 10Ŋaa mvuuru asurihi omakaaha se mvuuru ayeni nkara yulu, mo bu ndi nde omaluula me ebiri eso me ekiihi e nde. 11Nde mvuuru ampi saabe antuma, na awobi a mbari e Njyami, na atoosi a Ncya e Mve bɨla ankumu mo okuha na ayisihi a mbari e Njyami. 12Mo bu ndi ayamaha epeende mo ojanja, na leyeese le nyuru e Krisi. 13Mo osuumbu jwa, saabe aso leje obuuna oka mvuuru omo o nca oyalihi na leyaa le Mwana a Njyami yemihi. Saabe aso leje omaka akuuru, lemihi na onini o Krisi. 14Ŋaa saabe leka maje oka baana me enkere, me epuhi si kali a pyebi ebiriha nca eyisihi e baari ma akʉraha, bɨla mataasaha me enkaa e baari mo omwo. 15Ŋa ntini leduha asisyele bɨla dya, saabe lekula ma angulu aso mpili e Krisi mvuuru ali nkʉmu Okuha. 16Nde mvuuru asyaha ndi nyuru eso eyama, nyuru emavunuha obila ma ambonoho a yo. Ŋaa ntini oto o nyuru omo ejanja yemihi, nyuru eso ekula yo se eyama mo dya na o nca dya se.
Lebihi le nyarihi mo Krisi
17Ŋaa lemono le me eduha be, me se ejisiha o nkuumi e Nkʉmu: be leka masyaha maami mva baari a me esi ekɨma. Oyeri o bo obira bo nca maami mo oca. 18Ecimihi e bo me ebiinda bo nca lempiibi. Bo o nca lebihi le Njyami ampaaha onyaŋa, bo i yaa jaa ni, obila bo na etima mo onono. 19Bo aya okʉru kali. Bo masa obɨla, bo se masa maami a nkɨri kuna.
20Ŋaa mo be, aka yisiha be Krisi vwa ni! 21Ŋaa a be leyuhi mawobo o nde eki ka Krisi ni? Mayisihi be lemihi na asisyiele a Jesu eki nde. 22O ŋaa be leka masyaha maami a be lesiihi na kala ni. Be i ma ka mvuuru a be leki na kala ni, obila eku e kala bya me etaasa baari. 23Lenyila Oduduma okaala be nca oyeri o be. 24Lekiriha baari ma anyarihi ma amawaanga mo oka mva Njyami nca opami bɨla leka le ce ce, me egwaha ma asisyele.
25Lenyila osami! Mvuuru na mvuuru oduhi asisyele na mwana a nguhu, obila saabe aso mvuuru omo. 26Lebye nkala, okoroho be i sa mbiini ni. Nkala e be ove ewi ntini e tari ekini ova ni. 27Be leka mpaha Jabri lengulu ni. 28Ove mvuuru ajibihi i majiba ni. Ŋa ove nde ojanji yemihi mo jyala e nde. Mo obaha kiila o nde ampa mvuuru ali o nca kaama. 29Mbari e mbi se mo i cuuha me enwa e be ni. Leduha eso ni mbari e mve ebuuna oyamaha mvuuru, eyeese se. Mo osa baari mayuha be leve. 30Leka syaha Oduduma Santi a Njyami lebi ni. Nde omakaaha ndiimi o be, elaha ndi tsuhu eje oya e Njyami aje ovusuha be o maami ma abi mbumbu. 31Be lenyili otima obi, be lenyili ombibɨri, be lenyili nkala, be lenyili ankɨma bɨla etuhi. Be lenyili maami ma abi maa aso. 32Be leki baari ma ave ma ali na nkerihi o mpaniŋi abuha. Be lebolihi abuha o mpaniŋi e be, mva o Njyami amaboloho be o Krisi.
Currently Selected:
Asi Efese 4: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
