Janja 28
28
Pole o ndubu e Malte
1Bisi levuuha, bisi leyuhi ndi ndubu jya nkuumi Malte. 2Baari a ma mpuhu jya ayambi bisi yemiŋi. Bo anaasi mbaa enini, bo ayambi bisi mo osyese a mbaa enini jya. Obila mvʉla aki aya anoho, mpebe se eki esa. 3Pole otoniŋi eti ma ekaa kaa, otuni o mbaa. Ŋa mono mpili acuuha o nca nkuyi obila o mbaa, okaari Pole o kwoho. 4Baari ma aki o ndubu jya amoni mpili omakaara o kwoho o Pole, bo aya mawobo o mpaniŋi e bo ndi: «Balaha ji ŋa obumi baari. Nde aka akwa nca okeri onini ni, ŋa opami a Njyami aka nyila nde oka mwo ni.» 5Pole onyusuhi kwoho, ntaari ovi o mbaa, nde aka yuha ngaa se mvabu ni. 6Abuha amoniŋi ndi nde nyuru ebiima, si kali nde ava, okwa o nci na nci ŋa. Bo adili kuna ŋa Pole aka yuha ngaa ni. Bo akaali ecimiŋi, o ŋa bo ndi nde «njyami!»
7O paani e biri jya eki na njo e nkʉmu a ndubu. Nkuumi e nde Pibliyise. Nde oyambi bisi o njo e nde mva andihi a nde, le mihi le ecuhu e tari. 8Taara a Pibliyise aki o tolo, na obaa bɨla mbula. Pole oyeni na amono nde. Pole ovwoni, olehi jyala o yula o cwi a nde. Nde owuuni. 9O ŋa abyeri akɨmaa ma ndubu jya se ayi na e Pole. Nde se osalihi bo. 10Baari aki makuusa bisi kuna. Ntini e bisi le kumiŋi o mbuungu, bo ampi bisi biibi le eki na kaama o jo mo opiinga.
Pole oto Rome
11Angondo atari ayira, bisi lekumi o mbuungu ŋa Aleksandri edilihi ntini e mpebe e kuna o sabi e ndubu. Mbuungu jya ekihi na ndiimi «Adioskire#28.11 A Dyoskire omakaaha ankira ma cwoloho o Kastore bɨla Polikse. Ajanji a nca mbuungu amoniŋi ndi Adyoskire ma akyeli a bo.». 12Bisi leto Sirakise, lesi ecuhu etari o ŋa. 13O ŋa, lepori osyese okeri, leto Rejio. Eto na encyere, pyebi eki eya ewa na mbere. Ecuhu jyele eyira bisi leto Pujole. 14O nca onguundu kya lebasihi baana ma anguhu. Bo acwoli bisi mo osa ecuhu ncaami bɨla bo. Jwa osuumbu a bisi leyeni Rome. 15Baana ma anguhu a Rome ayuha ndi bisi le eya, bo ayi na aviniŋa na bisi tii o Jandu le Apise bɨla maamo ma ayi o biri ma cwoloho ma anjo ma anjya ma atari. Pole omono bo, ompi Njyami leve. Nde oyaasi nyuru. 16Bisi leto Rome, alehi Pole ma e nde njo. Bla ŋa oworo akyelihi nde.
Pole atooso Ncya e Mve o Rome
17Ecuhu etari eyira, Pole ocwoli ankʉmu ma Ajife a Rome o njo e nde. Ntini e bo ma kusihi abuha, nde oduhi ndi: «Baana ma anguhu a me, me eka asa jaa e mbi o baari a saabe, si kali ma lewaanga le ankaha a saabe ni. Okoroho bo akwari me o Jerusaleme, ampi na asi Rome. 18Bo amana olehe me eduhu. Bo asahi onyasaha me. Obila bo aka mono jaa mabuuna obuma me o yo ni. 19Ŋa Ajife aka yalaha ni. Kya obila o me ecwoli Sesare. Mo oma, me eki njala obanaŋa baari a me kali. 20Kya obila o me esahi omono be, me ewobo bɨla be. Be leyaa lila le baari a Isayele. Me amakura ankoso ŋa o lo.» 21Ankʉmu ma Ajife akaali ndi: «Bisi leka basaha osaangumu o we ewa ŋa Jude ni. Mwana nguhu a bisi se omo aka aya na duha bisi ancya ma abi o we ni. 22Ŋa bisi lesaha mbɨri we anku we oduha a we ŋa cimiŋa. Mo oma, bisi leyaa mbɨri baari maduha maami ma abi mo okuha jwa.»
23Bo aswoli cuhu mo ovuniŋa bɨla Pole. Cuhu jya bo ayi akuna kuna na amono Pole o njo e nde. Mo obaana encyere tii eki kolo, Pole owobo na bo, atooso bo Onkani o Njyami. Nde awobo bo o Jesu, nde se asa ndi bo ayalaha nde. Nde aliira ekele e Moyise bɨla esaangumu ma awobi a mbari e Njyami. 24Ake ayalahi a nde aduhi, maamo abɨsi oyalaha. 25Ntini e bo mavurihi, bo aka yuha abuha o mpaniŋi e bo ni. Pole oduhi bo jaa mo ntu ndi: «Oduduma Santi aki na mpyeme, e nde aduhi na ankaha a be ma onwa owobi a mbari e Njyami Esayi. 26Nde oduhi ndi:
“Jyehe na amono baari ba,
we oduha bo mbɨri
Be leje ota cwi, okoroho be leka aje oyuha ni.
Be leje okeese yemiŋi, okoroho be leka aje omono ni.
27Obila baari ba njala oyuha kali.
Bo amadiba acwi a bo,
bo se amadiba miisi a bo.
Bo aki njala omono o miisi a bo anku kali.
Bo se aki jala oyuha ma acwi a bo anku kali,
bo njala oyuha bɨla otima a bo kali.
Bo aki njala okalaha na e me kali. Kya obila o me eka buuna osalaha bo ni.”»
28Pole oluusi ndi: «Ove be lejyabi jaa mo ntu. Njyami atumi Ncya e Mve ovusihi, mo baari ma ali ka Ajife ni. Bo ma aje oyuha nde!»
[ 29#28.29 Mo mbari e Pole jya Ajife ayeni na owobo na mpari eso o mpaniŋi e bo.]
30Pole oki esibi jyele ma eciina, o njo e nde awurihi. Nde se ayamba baari aso ma aya na amono nde. 31Nde atooso Onkani o Njyami, nde se ayisiha maami a mo Jesu Krisi a Nkʉmu nyengele bɨla lila le eso.
Currently Selected:
Janja 28: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
