Ngalate Ebaanihi
Ebaanihi
Osaangumu ki Pole atuma co mpili ekuha ma akritye ma ali o nca ampasi. Bo amacalaha nca ngaala e Ngalasi (macwoloho mo Tirki lobi).
Jaa e simi simi
Pole ato Ngalasi mo osibi o kuumi na ona ngula leku le Jesu. Asi Ngalate ayambi nde, bo asalihi nde nca ove (4. 13-14), Nde otoosi bo ncya e mve e Jesu Krisi. Esibi eke eyira, nde oyuhi ndi Ajife ake atoosi maami, maamo makemene maami a nde aduuhi. Bo maduha ndi oyalihi o ma Njyami a Jesu oje bɨla adiimi mamono a me ekele e Moyise, mva sasi bɨla ekele e mo oka ce ce. Pole obye nkala oduhi ndi: leku le Krisi le ma lembanji i buuna osa ndi baari ma amayalaha aki tele o miisi a Njyami ni? Baari ma amayalaha Jesu ali tele o miisi a Njyami, ŋa ka mo sasi ni o ngula oyalihi.
Nca ewoosihi e ncomi na enaanihi mo osaangumu, Pole alahi ndi nde bɨla Ncya e mve jaa mo ( 1.1-12 ). Amampa jaa e simi simi: «Ncya e mve e me etooso ka maami a baari mo omwo ni...». Nca mbari eya nde awobo lo me ebiri jyele, nde se atooso.
Jaa e ncomi nde abaana owobo o nde anku lemihi na janja e Njyami acwoli nde oyo mpili e baari ma akini osa sasi ni. Pole aka vʉlaa owoobo o nde anku ni. Nde oli bɨla Krisi obila ma leku le nde lema lembanji; Pole aya lebihi kali, lebihi le nde leya o Krisi. Lebihi le Pole lema akabi leya le mo oyalihi ( 1. 13-2 . 21 ) . Pole aduha ndi evunuhi e nde bɨla Jesu Krisi na janja e nde me egwaha na e Njyami. Antuma ayalihi esiihi e nde, Jake bɨla Piere na Jan. Ŋa bɨla onkʉmu vwa, nde aduha ndi «Mvuuru omwo oka tele obila eso ni mo oyalihi o Jesu Krisi ŋa ka mo obila o nde anyiima ekele e Moyise eso ni» (2.16).
Lo ojwele nde aselehe ojisiha bɨla ampura a mbari (3-4). Oduduma a Njyami ajanja bɨla asi Ngalate, mo oyalihi ŋa ka me ekele e Moyise ni. Aduhi ndi Abraame mvuuru a tele obila mo oyalihi. Ndiimi e baana ma Abraame Oduduma otu, se nde aka Ojife si kali mvuuru ali ka Ojife ni, mvuuru anyengele si kali oyiha, abalaha si kali akaasi (3.28). Pole amono ongwo ma asi Ngalate masaha oyalaha maami me ekele e Moyise, me evuura bo nca oyiha mva baana ma Agare. Baari ma amayalaha Jesu omakaaha mva baana a Sara baana mo okaasi a nyengele, bo se baana a ndayi ( 4.1-31 ). Ŋa mo osuumbu a saabe leli baana a ndayi, ove saabe lenyili maami a ma akabi majwaniha bɨla o Oduduma Santi. Ove saabe leyalihi lebihi le Oduduma ( 5.1-26 ). Ove saabe se lebiri elemi ma abuha. Mvuuru na mvuuru okeesi lebihi le nde. Obila mvuuru na mvuuru aje oyalaha maami a nde anku. ( 6.1-10 ).
Asi Ngalate amayaha ateeme, bo amakiriha baana a Njyami amayaha, bo i buuna oka nca ekele e Moyise ni. Oyalihi o ma Jesu Krisi otusuha bo o nca ongwo, na vwoho oso mo olehe bo o ncina Oduduma bɨla onkʉmu o dya.
Me emanihi mo osaangumu o nde, Pole alehe ndayi andosoho a Njyami, mo baari ma aje oya na avuruha nca asisyele a Ncya e mve ( 6.11-18 ).
Osaangumu o Ngalate ocwomo ŋa asi Rome levusu, co ewobo ma levusuha le mo oyalihi: lenyiima le ekele e Moyise i vʉla oyalihi o ma Jesu mabumi ma lembanji ni. Osaangumu ki olaha saabe etohi ma akritye ancomi, na osuumbu okɨma ma asi ocimihi ekele e Moyise. Osaangumu ki se lobi owobo mo osuumbu oyamba baari ma ali juuyi bɨla ampuhu ka a mo nca Okuha ni.
Mo oselehe oje na vusu
Pole ateendi osaangumu ki o jini ntini? Leke mpili 56 si kali 57 (ake ndi 48). Nde omabele akritye matoosoho mbari, bo se akini oyuha ekiihi e nyengele me enyarihi e bɨla Krisi. Bo maselehe ojisiha me ekele e Moyise: Pole acwolo ndayi e Njyami ŋa Abraame, levusu le Moyise. Mva o nca jaa e Sara bɨla Agare, akari ma Abraame a vwele ( 4.21-31 ). Nde alaha ndi baana a ndayi a jaa jaa magwaha o Isake, a mwana Sara ŋa maamo ali o nca ekele e Moyise e bo ma ali ayiha. Bo magwaha o Ismayele a mwana Agare. Obila oma, Krisi otu mvuuru ali na wanda e ndayi. Pole aduha na asi Ngalate ma ali ka Ajife ni ndi bo baana ma Abraame, bo se baana a Njyami.
Currently Selected:
Ngalate Ebaanihi: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES