Janja 27
27
Matuma Pole Rome
1Ntini makuri ndi bisi leje Itali, ampi Pole bɨla engeneŋe eke na nkʉmu aworo a Rome a nkʉmu onkama 100 aworo ma cwolihi o Jilise. Nde oli ma oju aworo ma «janjiha mo Sesare». 2Bisi lekumi o nca mbuungu mo onguundu ŋa Adramite, mo oje sabi e ngaala Asi. Emana bisi leyeni. Aristake aki bɨla bisi, nde aki osi Masedwane a Tesalonike. 3Eto na encyere, bisi leto Sido. Jilise akyelihi Pole mo osuumbu ove. Nde onyili Pole oyeni ŋa amono andihi a nde, mo bu ndi bo ayamaŋa nde. 4Emana levirihi, leyiri ma le andubu a Sipre, obila pyebi eki ema vʉla kuna. 5Levuuli okeri onini osyese a Silisi bɨla Pamfili, leto Mira o Lisi. 6O ŋa oworo osi Rome obasihi mbuungu Aleksandri, eyeniŋi ŋa Itali. Nde olehi bisi o nca mbuungu jya. 7Ecughu kuna eyiri, mbuungu enini ojyehe ŋa ni oke oke. Eki na mpasi yo mini ma oto onguundu o Kinide. Pyebi eki eliha bisi mo oje ma ocwi kya. Ŋa bisi leyiri mo obari andubu a Kɨrete, mo okya ma le Salemone. 8Bisi lelwoniŋi sabi ŋa na syami eso, leto biri macwoloho mo Bopore o paani onguundu o Lase. 9Ŋa bisi lebuhi o njila, leka mabuuna owunuŋa na opiinga ni. Obila cuhu Ongerehe eki emiyira. Ŋa Pole aki asaha owobo na bo ndi: 10«Adihi a me, me emono mbɨri saabe opiinga yu ove kali. Mbuungu bɨla biibi me ebiiya. Na saabe se lebuuna okwa.» 11Ŋa nkʉmu aworo a Rome olehi lila mo oduhi mbuungu bɨla onga mbuungu, nde obengili mbari e Pole. Nde olehi tari o nkʉmu aworo bɨla onga mbuungu. 12O ngula ŋa, jya eki ntini e mpebe e nkala#27.12 Ntini e mpebe e nkala jya ma lefaala ocwolo mo iveere. , baari kuna aki njala oka o sabi jya kali. Baari a nca mbuungu kuna ayalihi ocyehe ŋa. Bo aki na njala oto Fenikse sabi e Kɨrete. Sabi jya emasunaha na mbere mpili e kwoho o mboho, bɨla ntaana mpili e kwoho o mboho. Bo masaha oka kwa o ntini e mpebe e nkala.
Okʉru o mwa okeri onini
13Opipyebi oki ewa na mbere. Baari a nca mbuungu acimiŋi ndi bo ma buuna osa maami a bo ma kuri. Bo ayeni, aya ma saha oporo osyese a Kɨrete. 14Antini ayira nceeri, okʉru ma cwoloho ma erakilon oyi o yula bo. 15Okʉru obiri mbuungu, mbuungu eki eya i ma buuna oje ni, mo mpari okʉru. Bisi lenyili pyebi eyeni na bisi, ŋa bisi lesahi obunuŋa. 16Bisi leyiri osyese a ndubu enkyehe, ma cwolihi o Koda. O ŋa, bisi lebuuni oduha mbuungu e nkyehe na syami eso. 17Bisi lekuusi mbuungu enkyehe o nca mbuungu enini. Emana ajanji a nca mbuungu akuri endi me ekwara mbuungu enini. Bo amoni vwoho mo oje na ava ma onjeyi a sabi e Sirte#27.17 Sirte omakaaha osi o Libi lobi.. Bo apiisi nkoso ekuriha mbuungu, aya maselehe obunuŋa. 18Eto na encyere okʉru oselehe onyisiha bisi na mpari eso. Kya obila o bo matuniŋi biibi nca okeri onini. 19Cuhu o tari, ajanji a nca mbuungu apiisi biibi e mbuungu mo jyala e bo anku. 20Ecuhu kuna eyiri, aka mono mwi bɨla anyari ni. Okʉru okini na mpari. Bisi leka mayaa mbɨri levuuha ni.
21Bo aki amibiha na njala, kiila mo oja kali. Ŋa Pole otemiŋi mo otele o mwa baari aso, na bo ndi: «Adihi a me, be kaa leyuhi a me, be se kaa leka cyehe o Kɨrete ni. Kaa biibi eka biiya ni, kaa jo se eka nywoŋo ni. 22O ŋa, me eduha be ma oyaasa anyuru a be. Obila saabe mvuuru se omo aka aje okwa ni, o ngula mbuungu eje obiiya. 23Me mvuuru a Njyami, me se ojanji a nde. Lempiibi le lobi li, obaanji a nde oma aya na e me. 24Obaanji na me ndi: “Pole we oka monoŋo vwoho ni! Ma aje opama we o mwa Sesare. Obila o we, Njyami omanyila baari ma ali bɨla we mo opiinga mwo.” 25Andihi a me, leyaasa anyuru! Me ŋa tari o Njyami. Maami mayira mo osuumbu a Njyami aduhi me. 26Saabe le eje na va o sabi e ndubu mo.»
27Eki ma lempiibi le okuumi na ona 14, le okʉru ebirihi bisi mo okeri onini macwoloho ma Adryatike#27.27 Adryatike omakaaha okeri onini ma cwoloho ma lefaala o mere mediterane. Ŋa otima lempiibi, ajanji a nca mbuungu acimiŋi ndi saabo leya leciina tuha na ncye. 28Bo akuri nkoso mo ondi, atʉni ma anja. Bo amoni ndi ametre akini ola ekuumi etari na ametre#27.28 Nca esaangumu ma emo otusolo metre mo braase.Ametre 37 eli ŋa abraase 20. Ametre 28 eli ŋa abraase 15. ncaami 37 e jina. Bo aciina na vusu bo avirihi atʉni nkoso jya ma anja, bo amoni ndi ametre ami kubuha, aya ekuumi jyele na ametre mfwomo 28. 29Bo aki na vwoho ndi mbuungu ema tiila ma akele. Kya obila o bo ma tuni ankoso ana na lembɨsa, bo aya ma dɨla ecihi e cuhu asisari. 30Ajanji a nca mbuungu ayahi mbuungu e nkyehe alehi mo okeri onini mo osaha odʉma. Bo aya maduha ndi: «Bisi leje na atuna ankoso na levusu le mbuungu.» 31Pole oduhi na nkʉmu aworo bɨla aworo ndi: «Baari ba obɨsa oka nca mbuungu, be leka vuuha ni.» 32O ŋa aworo acebi endi e mbuungu enkyehe, anyili yo eyeni mwa okeri onini.
33Cuhu eki kini oca ni, Pole ocwoli baari aso na aja. Nde oduhi bo ndi: «Lobi ecuhu eya kuumi na ena 14 e be lediliha. Be se lema aka kiila ma oja kali. 34Me ecwolo be mo oyaha biila, be na kaama o jo ma ovuuha. Mo oma, mvuuru se omo o mpaniŋi e be aka yele si lemfu le mo le mo ocwi a nde ni.» 35Pole omana owobo vwa, oyahi lepeembe, ompi Njyami leve o miisi a baari aso. Emana okabihi nde se oya aja. 36Bo aso ayaasi anyuru, aya ma aja se. 37Bisi leki enkama e baari jyele na ekuumi baari ncaami na baari asyami (276), o nca mbuungu. 38Bo amana oja, ajurihi, bo atʉni ble mo okeri onini, mo bu ndi mbuungu eyebehe.
Mbuungu ebuniŋa
39Cuhu eca, ajanji a nca mbuungu aka yiimba ncye ni. Bo ataali sabi mo eki na onjeyi. Bo ayeesi ma obira mbuungu kwa yuhu bo aki ma buuna. 40Kya obila o bo ma naani ankoso, anyili nca okeri onini. Bo se acebi endi ma oti aciisi mbuungu. Bo alehi mfa levusu le mbuungu. Pyebi se eciisi bo tii sabi. 41Ŋa bo atiili na onjeyi, mbuungu eyarihi, lemvusu le mbuungu lenyuniŋi nca onjeyi. Mbuungu eki eya i buuna ofuba ni. Epuhi e nkala ecali lembɨsa le mbuungu. 42Aworo asahi obuma engeneŋe, mo odʉma bo amaduma mo oyoho. 43Ŋa nkʉmu aworo a Rome, aki na njala ovusiha Pole. Nde olihi aworo mo osa jaa e bo ma ayeesi jya. Nde otumi baari ma ajyabi oyoho ova ma anja levusu, mo oje tii ncye. 44Abuha maamo alwono bo o yula epaanja bɨla ebari e mbuungu. Mo bu ndi baari aso avuuha, bo se ato ncye yemiŋi.
Currently Selected:
Janja 27: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
