Janja 26
26
Pole awobo ma lengulu le nde anku o mwa Agripa
1Agripa na Pole ndi: «We abuuna owobo ma lengulu le we anku.» Ŋa Pole se osaari kwoho oya awobo. Oduhi ndi: 2«Me emimono ove lobi nkani Agripa, o me ewobo o mwa we mo maami a baana ma anguhu a me ma Ajife mabaniŋi me. 3Obila we ojyabi maami ma lewaanga le Ajife bɨla ewobihi e bo. Mo vwa, me epɨsa we kolo kolo mo oyuha me yemiŋi.
4Ajife aso ajyabi lebihi le me, esi wa me obusi. Bo ayaa osuumbu a me ekuli bɨla baari a me o Jerusaleme. 5Me eki nca okuha Afarisi avʉli maami a Njyami onono. Bo adya bo mabuuna osiisa enwa. Mo oma, bo amabiha na oyaa me nca okuha. 6Ŋa bo mapama me lobi ŋa, obila me ŋa lila o ndayi e Njyami alehi a taara a bisi. 7Ankaka a kuumi na mwele a baari a bisi se, na lila o ndayi jya, bo ma janja ŋa mwi ŋa mpiibi o Njyami. Nkani Agripa, kya obila Ajife mabanaŋa me. 8Be ma Ajife, be njala oyalaha mbɨri Njyami anyuusaha akwi kali mo oma? 9Me anku ecimiŋi mbɨri me ebuuna osa ombangu ma angulu aso, o nkuumi e Jesu a Najarete. 10Maa a me esi o Jerusaleme. Me elehi baari ma ali epeende kuna ongeneŋe. Ankʉmu ma asi ma avwoŋi, baari matumi me osa vwa. Ntini maduuhi ndi abuma bo me yalihi. 11Me eyirihi nca anjo mavwonoŋo aso. Me eswesihi bo. Me empi bo okʉra mo otuha Jesu a Nkʉmu. Me eki emabye nkala yo mini na bo. Me ecuuri bo tii nca enguundu ma anjya.»
Pole aduha osuumbu a nde ayalihi Jesu
12«Kya obila o me eyeni Damase cuhu mo. Ankʉmu ma asi ma avwoŋi atumi me kwa bɨla ŋa onkʉmu oso. 13Nkani Agripa me eki o njila, tari eki eya o mwa njanga, me emoni oyalala owa ŋa yulu. Ekyemiŋi e co evʉli ekyemiŋi mo oyalala o tari. Oyalala kya ekyeme ojeniŋi saa na abuha a me mo opiinga. 14Bisi aso levi o ncye, me eyuhi juuyi lewobo na me o juuyi la Ajife ndi: “E Sole, Sole, we aswesehe me bu mo oma? We i buuna ojya empara o yula ancyene#26.14 Lejya le empara o yula ancyene omakaaha mva nyama ali i buuna obɨsa jwe ni o ntini e nkʉmu a nde atuba nde oti ancyene ma otuma nde oje. ni!” 15Me pɨsi mbɨri: “E Nkʉmu we na?” Nkʉmu okaali me ndi: “Me, Jesu a we ŋa swesehe. 16Ŋa temeŋe! Mono obila o me elahi nyuru na we. Me emaswolo we mo bu mbɨri we oka ojanji a me. We mvuuru aje osiisa enwa, mo otooso osuumbu a we amoni me lobi. We se aje otooso a me eje ovuriha olaha we. 17Me eje ovusiha we, me se ekyele we o mwa Ajife na baari ma ali ka Ajife ni. 18Ŋa we onaana bo miisi, bo acuuha nca lempiibi bo aya na avuriha mo oyalala. Bo ma aka maka o ncina onkʉmu o Sata ni. Ŋa bo ma aya na vuriha na e Njyami mo bu ndi aboloho ambiini a bo. Bo se abaha o bo obari o wanda bɨla baari ma ali epeende o bila ma oyalihi o bo o ma me.”»
Pole awobo mo janja le nde
19«O ŋa nkani Agripa, me eka bɨsa maami a me emoni ma awi yulu ni. 20Ŋa me ebaani otooso na asi Damase, bɨla Jerusaleme na asi Jude bɨla baari ma ali ka Ajife ni mbɨri: “Lekaala eku e be, be leyalaha Njyami. Lesa maami ma ave mo olaha mbɨri be lemikaala eku.” 21Kya obila Ajife ma akwari me o nca njo e Njyami, bo asahi omana na me. 22Ŋa tii o lobi, Njyami ama yamaŋa me. Me eselehe osiisa enwa o maami a nde o mwa baari aso, na enkere na akuuru. Awobi a mbari e Njyami bɨla Moyise aki amawobo o maami ma aje oya. Ŋa me eka maduha jaa nkɨma ni. 23Me eduha eso ni mbɨri: Krisi omoni ambaba, nde mvuuru anyusihi ncomi nca leku. Ove nde otoosi oyalala na Ajife bɨla ŋa baari ma ali ka Ajife ni.»
Pole atuma Agripa oyalaha Jesu
24Pole aki okini awobo vwa, Festise owʉli nkɨma ndi: «Pole we na lari! We oma sa lekoole kuna, lo lemimpa we lari!» 25Pole okaali nde ndi: «Me ka lari ni nkani Festise. Me eduha ŋa mbari e ncimi bɨla asisyele. 26Nkani Agripa oyaa maami ma aso, kya obila o me ewobo bɨla lila o mwa nde. Me ecimiŋa mbɨri nde i buuna olimaŋa jaa se mo ni. Obila mo aka yira ma ajisihi ni. 27E nkani Agripa, we ayalaha mbari awobi a mbari e Njyami? Ee me eyaa mbɨri we ayalaha.» 28Agripa okaali Pole ndi: «We acimiŋa mbɨri we abuuna osa me okiriha okritye paraabu ŋa!» 29Pole okaali nde ndi: «Yuhu Njyami ayamaŋa, se lobi se osuuha, me esaha ŋa vwa. Na we, na be aso leyuha me lobi. Me esaha mbɨri be leka mva me, ŋa ka bɨla ankoso ma ni!»
30Na nkani, na lepatima, na Berenise, bɨla baari ma aki bɨla bo atemiŋi. 31Bo acuuhi o nji, aya mawobo o mpaniŋi e bo ndi: «Balaha ji eka sa jaa mabuuna obuma nde oyo si kali ma lehe nde ongeneŋe ni.» 32Agripa na Festise ndi: «Leki lebuuna otusuha nde, ŋa nde ama cwolo Sesare.»
Currently Selected:
Janja 26: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
