Janja 25
25
Pole o mwa Festise atuma ocwolo Sesare
1Ecuhu etari ma eyi Festise o nca ngaala jya, nde owi Sesare okumi Jerusaleme. 2O ŋa ankʉmu ma asi ma avwoŋi bɨla akuuru ma Ajife ayi o mwa nde, bo asi nkomoŋo ma ososo Pole ŋa e nde. 3Bo apɨsi Festise kolo kolo ma otuma Pole oya na avuriha Jerusaleme. Ŋa jwa aki oyere a bo ma kuri ndi bo abuma Pole o njila. 4Ŋa Festise okaali bo ndi: «Pole oli ongeneŋe o Sesare, na me anku eya tuha na ovuriha. 5Ŋa baari ake o mpaniŋi e be ma ali na onkʉmu aya bɨla me. Yuhu balaha jya emasa jaa e mbi ma abanaŋa nde o yo.» 6Festise asi ecuhu mfwomo si kali kuumi etu bɨla bo. Emana nde ovurihi Sesare. Eto na encyere, nde oya o nci o njo mapamaŋa maami. Emana nde otumi Pole oya. 7Pole na oya, ankʉmu ma Ajife ma awi Jerusaleme ajeniŋi nde. Bo aya ma banaŋa nde o maami ma abi kuna, okoroho bo i buuna oduha jaa e ciici e nde ama asa ni. 8Pole ma lengulu le nde oduhi ndi: «Me eka sa jaa e mbi me ekele ma Ajife si kali o njo e Njyami, na o Sesare ni.» 9Ŋa Festise aki asaha osa Ajife ove, nde okaali Pole ndi: «We asaha oje Jerusaleme, o kwa ma aje opama we o jaa ji, o miisi a me?» 10Ŋa Pole okaali ndi: «Me eli ŋa o njo e Sesare ma pamaŋa maami. Jya biri mapama me. Me eka asa Ajife obi ni, we anku we oyaa yemiŋi. 11Yuhu me emasa obi, me se emasa jaa ma abuuna obuma me o yo, me eka bɨsa leku ni. Ŋa yuhu jaa e sisyele e bo ma buuna obanaŋa me o yo kali, o ŋa mvuuru se omo i ma buuna ompa me na bo ni. Me ecwolo nkani Sesare!» 12Festise omana owobo na ankʉmu a nde, oduhi na Pole ndi: «We acwolo nkani Sesare ŋa, we aje okiriha o miisi a nde.»
Abiri Pole o mwa Agripa bɨla Berenise
13Ecuhu eke eyira, nkani ma acwoloho ma Agripa bɨla nkeri a nde Berenise, ayi o Sesare mo owooso Festise. 14Bo aci ecuhu kuna o ŋa. Ŋa Festise oduhi nkani enwa e ma jaa e Pole. Na nde ndi: «Felikse amanyila balaha mo, mo ongeneŋe kuuni. 15Ntini e me eyeni Jerusaleme, ankʉmu ma asi ma avwoŋi bɨla akuuru ma Ajife, ayi na soso nde. Bo atumi me ndi me lehe nde ongeneŋe. 16Me ekaali na bo mbɨri: “Asi Rome ma aka nyiliha mvuuru vwa ni. Ove nde osa vuniŋa bɨla baari mabanaŋa nde. Ove nde se oduhi e nde enwa.” 17O ŋa bo amaya bɨla me kuuni asisari. Na encyere, me eya o nci o njo ma pamaŋa maami, me etumi balaha ji oyaha. 18Baari mabaniŋi nde ayi, me ecimiŋi mbɨri nde omasa maami ma abi a nkala, njaa bu kali. 19Bo otohi aki eso ni mo Njyami a bo anku, ŋa na mvuuru a nkuumi Jesu. Mvuuru jwa omakwa, ŋa Pole ndi nde okini mwo. 20Me eki i yaa jaa oduha o jaa lya ni. Ŋa me epɨsi Pole yuhu nde aki na njala oje Jerusaleme, amapama nde o jaa jya o kwa. 21Ŋa Pole obisi. Mo oma, nde asahi ndi nkani Sesare mvuuru apama nde. Me duhi mbɨri asa kyele nde nca ongeneŋe. Omana me etuma nde mpili e nkani Sesare.» 22Agripa na Festise ndi: «Me se na njala oyuha maami abalaha jya.» Festise okaali nde ndi: «Osuuha we ayuha mo.»
23Eto na encyere, Agripa bɨla Berenise awasihi bɨla baari o ngula bo. Bo anyuniŋi nca njo ma apamaŋa maami bɨla ankʉmu ma aworo, na ankʉmu mo onguundu. Festise otumi oyaha Pole, ayi na nde se. 24Ŋa Festise ndi: «We nkani Agripa, na be leli ŋa aso bɨla bisi, lekeese balaha ji. Ajife aso amaya na abasaha me o Jerusaleme kuuni mo balaha ji. Mawʉla ankɨma ndi i buuna onyila nde oki mwo ni. 25Ŋa me emono mbɨri nde aka asa jaa mabuma nde o yo ni. Ŋa nde acwolo nkani Sesare, kya obila o me etumi nde na e Sesare. 26Me eki jaa esisyele e me ebuuna oteende nkani Sesare o nde kali. Kya obila o me eyi na nde o mwa be, kʉru kʉru o mwa we nkani Agripa. Lehe nde eduhu, ŋa omana me ebaha jaa e me eteende. 27Mo oma, i buuna otuma mvuuru ongeneŋe Rome ni, yuhu akini oyaa jaa e ciici e nde ama sa ni.»
Currently Selected:
Janja 25: MDT
Highlight
Copy
Compare
Share
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
