ABhaluumi 3

Ʉgolosu ʉwa Ngʉlʉbhɨ

1Ɨshi alɨngaane nɨ‑ɨgo, huli nɨ zya pa mwanya wɨlɨ abhe Nʼnyahuudi? Wɨlɨ, atende ɨngoola ɨya hwitagaalila ɨyɨ lume huli nɨ zya pa mwanya wɨlɨ? 2Lyoli abhe Nʼnyahuudi huli nɨ zya pa mwanya ɨnyinji. Ahantu aha hwande mwɨ‑ɨgo, ʉNgʉlʉbhɨ ahabhapiiye aBhayahuudi ɨndajizyo ni‑ilagano#3:2 ni‑ilagano Bhaazya izwi Ilagano hu Ngalulanyo ɨyɨ Mazwi aMajenu hu malishilo wɨ shitaabu ɨshi. huje bhabhute na‑alondolezye mu lemvu waabho. 3Leelo, lyoli aBhayahuudi bhamo saga bhahali nʉ lwɨtɨho. Wɨlɨ, tije abhantu ɨbho saga bhamʼmwɨtɨɨshe ʉNgʉlʉbhɨ bhabhajiiye humʼmombe ʉNgʉlʉbhɨ, wope aleshe abhe nʼgolosu abhombe ɨnongwa ɨzyo ahabhalapiiye? 4Ndaali, lyonti! ɄNgʉlʉbhɨ ahubhalolesya abhantu huje ʉmwene ayanga ɨnongwa ɨzyɨ lyoli na huzibhombe, hwope nkashele abhantu bhonti bhayanga ilenga. Enya, ɨNsimbo ɨMfinjile ziyiga,

“Nkashele ʉbhabhʉʉzye abhantu bhaaho ɨmbiibhi zyabho,

amazwi gaaho gɨ lyoli.

Nantele nkashele ʉbhalonje,

aawe ʉbhala‑amene.”#Bhaazya ɨNsalifyo 51:4.

5Leelo ɨnjanje ɨga shimʼbɨlɨ. Nkashele ɨmbiibhi zyetu zilolesya huje ʉNgʉlʉbhɨ abhomba hu lyoli, tiyanje yeenu? Wɨlɨ, tije ʉNgʉlʉbhɨ saga abhomba ɨlyoli nkashele ahutilonga? 6Ndaali, lyonti! Enya, nkashele yabhanga ɨsho, ʉNgʉlʉbhɨ wɨnzaga wɨlɨ alonje abhantu abha mu nsi hwi‑idala ɨlyɨ lyoli? 7Nantele ʉwɨnjɨ abhajiiye ayanje huje, “Nkashele ilenga lyanɨ libhajiiye alolesye ɨlyoli ya Ngʉlʉbhɨ na hwonjele ʉmwamu waakwe, yeenu anɨ ɨlongwa huje ɨndi wɨ mbiibhi?” 8Ʉhwo hulɨngaana na huje, “Tijendelelaje abhombe ɨmbiibhi huje zyɨnze ɨnyinza.” Abhantu abhanjɨ bhahutiyanga shibhiibhi huje hwope atɨ timanyizya ɨsho. Enya, ɨbho bhonti bhahayilongwa alɨngaane nɨ mbiibhi zyabho.

Nʉʉmo ʉmuntu ʉnʼgolosu

9Ɨshi, tiyanje yeenu? Wɨlɨ, tije atɨ tiBhayahuudi tikhondɨɨye tee ashile abhantu abhanjɨ bha saga Bhayahuudi? Ndaali! Enya, nanshi ɨsho ɨmbalanjile ɨmbiibhi zyabho, aBhayahuudi na bha saga Bhayahuudi, bhonti ɨmbiibhi zihubhalongozya. 10Ɨgo gakholɨɨne nɨ Nsimbo ɨMfinjile ɨzyo ziyiga,

“Nʉʉmo ʉmuntu ʉyo nʼgolosu, nka weeka.

11Nʉʉmo ʉmuntu wowonti wa‑amʼmɨɨnye ʉNgʉlʉbhɨ,

nantele nʉʉmo ʉyo ahumʼmwanza.

12Abhantu bhonti bhaleshile humʼmwɨtɨshe ʉNgʉlʉbhɨ,

bhonti saga bhakhondɨɨye pitagaalila lyakwe nantele.

Nʉʉmo ʉmuntu wa‑abhomba aminza, nʉʉmo nka weeka.”#Bhaazya ɨNsalifyo 14:1-3; 53:1-3.

13“Amalomu gaabho gali nanshi ɨnkʉngwa ɨnyaazi,

ɨmɨlɨ zyabho ziyanga ilenga.”#Bhaazya ɨNsalifyo 5:9.

“Mu malomu gaabho gafuma amazwi

ga gali nanshi ʉkʉʉla ʉwɨ nzoha.”#Bhaazya ɨNsalifyo 140:3.

14“Ayanje hwabho humemile amazwi aga hubhagune abhantu abhanjɨ

na ga hubhavwalazye amooyo.”#Bhaazya ɨNsalifyo 10:7.

15“Amanama gaabho makhalaganu abhale abude.

16Poponti ɨpo bhabhala, bhahubhavwalazya abhanjɨ na hubhayɨmvye.

17Abheene saga bhalimɨɨnye idala ɨlya‑akhale peeka na bhanjɨ hu tengaanu.”#Bhaazya Yesaaya 59:7-8.

18“Saga bhahunʼtiniha ʉNgʉlʉbhɨ nka hashe.”#Bhaazya ɨNsalifyo 36:1.

19Ɨshi timɨɨnye huje, gonti ɨgo gasimbwilwe mu ndajizyo, gahubhayanga abhantu ɨbho bhahapewiilwe ɨndajizyo ɨzyo. Ɨndajizyo zyahabhɨhwɨlwe huje, abhantu bhasahabhe bhahwiyʉʉmɨla hwa hohonti hu habhaazyo ɨho ʉNgʉlʉbhɨ ahayihubhalonga abhantu. Ɨloleshe pa pazelu huje bhonti bhahwanziwa alongwe nʉ Ngʉlʉbhɨ. 20Enya, nʉʉmo ʉmuntu wowonti ʉyo abhaaziwa abhe nʼgolosu pitagaalila lya Ngʉlʉbhɨ hwi‑idala ɨlya‑alondolezye ɨndajizyo nanshi ɨsho ziyanga. Ɨmbombo yɨ ndajizyo hulolesye bhonti huje bhali bhabhomba mbiibhi.#3:20 bhabhomba mbiibhi Bhaazya izwi Bhabhomba mbiibhi hu Ngalulanyo ɨyɨ Mazwi aMajenu hu malishilo wɨ shitaabu ɨshi.

Ʉmuntu abhaaziwa ʉgolosu hwi‑idala ɨlya humʼmwɨtɨshe ʉYeesu

21Hwope ɨsho, ʉNgʉlʉbhɨ atilolesiizye idala lyakwe ɨlya hutibhaazizye ʉgolosu, sinta ndajizyo. Zyope ɨndajizyo zya Moose nɨ nsimbo zya bhakuwi zisimishizya pa pazelu ɨnongwa ɨzi‑idala ɨlyo. 22Idala ɨlyo hwa huje humʼmwɨtɨshe ʉYeesu ʉKilisiti. Hwi‑idala ɨlyo, ʉNgʉlʉbhɨ ahubhapeela ʉgolosu abhantu bhonti ɨbho bhahumʼmwɨtɨha ʉYeesu ʉKilisiti. Nawumo ʉlegano hwa muntu wowonti hwa Ngʉlʉbhɨ. 23Enya, abhantu bhonti bhabhombile ɨmbiibhi, ɨnjendo zyabho saga zilolesya ʉmwamu wa Ngʉlʉbhɨ. 24Leelo ʉNgʉlʉbhɨ hu mpyana yaakwe, ahubhabhaazizya abhe bhagolosu pitagaalila lyakwe sinta asombwe hohonti. Ahabhombile ɨsho hwi‑idala ɨlya hunʼsonteelezye ʉYeesu ʉKilisiti ʉyo ahatigombʉʉye afume mu mbiibhi zyetu. 25ɄNgʉlʉbhɨ ahamʼfumiizye ʉYeesu abhe nsangu#3:25 ɄNgʉlʉbhɨ ahamʼfumiizye ʉYeesu abhe nsangu hwa huje ʉNgʉlʉbhɨ ahamʼpiiye ʉYeesu amayɨmba ɨgo gahali ga hubhafunde abhantu. ɨya hubhakʉndanye abhantu nʉ mwene, hwi‑idala ɨlya hwite idanda lyakwe, abhantu ɨbho bhahwɨtɨha huje ahafwiye hu mbiibhi zyabho bhakhobhoshelwe. ɄNgʉlʉbhɨ ahabhombile ɨsho alolesye huje ʉmwene ali nʼgolosu. Enya, ʉhwo hwisinda ʉNgʉlʉbhɨ ahali nʼjimbiilizu sinta hubhabhaazizye ɨmbiibhi zyabho. 26Nantele, ahabhombile ɨsho alolesye hu habhaazyo ɨha huje ʉmwene ali nʼgolosu, hwa hubhabhaazizye abhe bhagolosu abhantu bha bhahumʼmwɨtɨha ʉYeesu.

27Ɨshi, ɨnongwa ɨzi zihutizijila lwonti ahwibaade, pɨpo saga tibhaaziwa huje bhagolosu hwi‑idala ɨlya‑abhombe ɨnyinza, lyoli hwi‑idala ɨlya humʼmwɨtɨshe ʉYeesu lwene. 28Ɨshi, tilola huje ʉNgʉlʉbhɨ ahumʼmaazizya ʉmuntu abhe nʼgolosu hwi‑idala ɨlya humʼmwɨtɨshe ʉYeesu, saga hwi‑idala ɨlya‑alondolezye nanshi ɨsho ɨndajizyo zya Moose ziyanga. 29Wɨlɨ, ʉNgʉlʉbhɨ abha Ngʉlʉbhɨ wa Bhayahuudi bheene? Saga abha Ngʉlʉbhɨ na hwɨ‑ɨbho saga Bhayahuudi? Lyoli, ʉmwene Ngʉlʉbhɨ wa bhantu bhonti! 30Huli nʉ Ngʉlʉbhɨ weeka lwene, nantele huli ni‑idala lyeka lwene ɨlya hubhabhaazizye abhantu huje bhagolosu pitagaalila lyakwe. ABhayahuudi na bhantu ɨbho saga Bhayahuudi, bhonti bhahwɨtɨshɨlwa nʉ Ngʉlʉbhɨ huje bhagolosu hwa humʼmwɨtɨshe ʉYeesu lwene. 31Ɨshi, lwa tikhajiilizya ahwɨtɨshe, wɨlɨ hwa huje ɨndajizyo ɨzi saga zili nɨ zya pa mwanya? Ndaali! Lyoli nkashele tili nʉ lwɨtɨho, ɨpo tibha tisimishizya ɨgo ɨndajizyo zitilajiziizye.

Currently Selected:

ABhaluumi 3: SBK

Highlight

Copy