ABhaluumi 4

ɄAbulahaamu abhaaziwa ʉgolosu hwi‑idala ɨlyɨ lwɨtɨho

1Ɨshi, alɨngaane nɨ nongwa ɨzi ɨzya‑abhaaziwe ʉgolosu, atɨ tiBhayahuudi tiyanje yeenu hu nongwa ya Abulahaamu,#4:1 Abulahaamu Bhaazya izwi Abulahaamu hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉmaama weetu? 2Nkashele ʉAbulahaamu ahabhaziiwe abhe nʼgolosu pitagaalila lya Ngʉlʉbhɨ alɨngaane nɨ mbombo zyakwe ɨnyinza, handɨ ali nɨ lya hwibaade. Leelo saga ali na hantu hohonti aha hwibaade pitagaalila lya Ngʉlʉbhɨ. 3Enya, ɨNsimbo ɨMfinjile ziyiga, “ɄAbulahaamu ahamʼmwɨtɨɨshe ʉNgʉlʉbhɨ. Ɨshi, afumilane nɨ‑ɨsho, ʉNgʉlʉbhɨ ahamʼmaazizya abhe nʼgolosu pitagaalila lyakwe.”#Bhaazya ʉWandilo 15:6.

4Lyoli, ʉmuntu nkashele abhomba ɨmbombo, ʉmʼposheelo gwakwe saga gubha mpeesya, lyoli habha hantu haakwe ɨho akhondɨɨye asombwe. 5Leelo ʉmuntu ʉyo saga asʉʉbhɨla ɨnjendo zyakwe, lyoli ahumʼmwɨtɨha ʉNgʉlʉbhɨ ʉyo ahumʼmaazizya ʉmuntu ʉmʼmiibhi abhe nʼgolosu, ʉNgʉlʉbhɨ ahumʼmaazizya ʉmuntu ʉyo abhe nʼgolosu alɨngaane nʉ lwɨtɨho lwakwe. 6Ʉmwɨnɨ ʉDaudi wope ahayanjile hu nongwa yɨ nsayo hwa muntu ʉyo ʉNgʉlʉbhɨ ahumʼmaazizya ʉgolosu sinta hwenye ɨnjendo zyakwe, huje,

7“Bhasayiiwe bhaala ɨbho ʉNgʉlʉbhɨ abhakhobhoshɨɨye ɨmbiibhi zyabho,

na huzyefwe lwonti.

8Asayiiwe ʉmuntu ʉyo ʉMwɨnɨ ʉNgʉlʉbhɨ saga ahumʼmaazizya nantele huje,

ali nɨ mbiibhi.”#Bhaazya ɨNsalifyo 32:1-2.

9Wɨlɨ, ɨnsayo ɨzyo ziyangwa nʉ Daudi, zya Bhayahuudi bheene, pɨpo bhatendiilwe ɨngoola ɨzya hwitagaalila ɨzyɨ lume, awe peeka na bhantu bha saga Bhayahuudi? Mwizuhaje huje ɨNsimbo ɨMfinjile ziyiga, “Ɨshi, afumilane nʉ lwɨtɨho lwakwe hwa Ngʉlʉbhɨ, ʉNgʉlʉbhɨ ahamʼmaazizya abhe nʼgolosu pitagaalila lyakwe.”#Bhaazya ʉWandilo 15:6. 10Habhaazyo wɨlɨ ʉNgʉlʉbhɨ ahamʼmaziziizye ʉAbulahaamu abhe nʼgolosu? Wɨlɨ, ahamʼmaziziizye abhe nʼgolosu sha‑asɨɨle atendwe awe lwa watendwa ɨngoola ɨyo? Lyoli ʉNgʉlʉbhɨ ahamʼmaziziizye ʉAbulahaamu abhe nʼgolosu pitagaalila lyakwe lwa‑asɨɨle atendwe. 11Atendwe hwakwe ɨngoola hwahali shimanyishizyo hwa mwene ɨsha‑alolesye huje, ʉNgʉlʉbhɨ ahamʼmaziziizye huje nʼgolosu afumilane nʉ lwɨtɨho lwene ʉlwo ahali nalwo sha‑asɨɨle atendwe. Hwi‑idala ɨlyo ʉAbulahaamu ahabhombɨɨshe huje yʉ yise wa bhooziwa bhonti, hwope ɨbho saga bhatendiilwe, huje bhope bhabhaaziwe abhe bhagolosu pitagaalila lya Ngʉlʉbhɨ. 12Abhantu ɨbho bhatendiilwe bhope ʉAbulahaamu yʉ yise waabho mu lwɨtɨho, nkashele bhahumʼmwɨtɨha ʉNgʉlʉbhɨ. Enya, saga abha yise waabho pɨpo bhatendiilwe ɨngoola ɨzya hwitagaalila ɨzyɨ lume, lyoli yʉ yise waabho pɨpo bhahumʼmwɨtɨha ʉNgʉlʉbhɨ nanshi sha‑ahamʼmwɨtɨɨshe ʉmwene, lwa‑ali asɨɨle atendwe ɨngoola.

13ɄNgʉlʉbhɨ ahanʼnapiiye ʉAbulahaamu na bhantu abhɨ shikholo shaakwe huje, ahayihubhapeela ɨnsi zyonti, zibhe zyɨ gaali waabho. ɄNgʉlʉbhɨ saga ahanʼnapiiye ɨsho ʉAbulahaamu pɨpo ahali atiniha ɨndajizyo, lyoli pɨpo ahali ahumʼmwɨtɨha ʉNgʉlʉbhɨ. Ɨpo ʉNgʉlʉbhɨ ahamʼmaazizya ʉAbulahaamu huje nʼgolosu. 14Enya, nkashele yahabhanga huje aBhayahuudi ɨbho bhasimishizya ɨndajizyo bha bhɨɨbho bhapeewa ɨzyo ahabhalapiiye ʉNgʉlʉbhɨ, ɨpo humʼmwɨtɨshe ʉNgʉlʉbhɨ saga hwɨnzaga‑abhe nɨ zya pa mwanya. Ɨpo ɨndapo ɨya Ngʉlʉbhɨ yope yɨnzaga‑abhe yi‑ilenga, 15pɨpo ʉmuntu lwa‑anangaanya ɨndajizyo afundwa. Leelo nkashele nazimo ɨndajizyo, ɨpo nʉʉmo ʉmuntu ʉwa‑afundwe hu nongwa ya‑anangaanye ɨndajizyo.

16Ɨshi, ɨgo alapile ʉNgʉlʉbhɨ gahwambɨɨlɨlwa hwi‑idala ɨlya humʼmwɨtɨshe ʉmwene na‑abhombeshe huje ɨbhe mpyana lwene. Ɨlyo saga libhombeha hwɨ‑ɨbho bheene bha bhalondolezya ɨndajizyo, lyoli hwa bhonti ɨbho bhahumʼmwɨtɨha ʉNgʉlʉbhɨ nanshi ʉAbulahaamu. ɄAbulahaamu yʉ daada weetu tenti hwi‑idala ɨlyɨ lwɨtɨho. 17Ɨnongwa ɨzi ʉNgʉlʉbhɨ ahayanjile mu Nsimbo ɨMfinjile huje, “Ɨʼbhɨɨshɨle abhe yise wa bhantu abhɨ nsi ɨnyinji.”#Bhaazya ʉWandilo 17:5. ɄAbulahaamu ahʉmvwɨzye ɨga lwa‑ali pitagaalila lya Ngʉlʉbhɨ ʉyo ahamʼmwɨtɨɨshe, ʉNgʉlʉbhɨ ʉyo azyʉsya nʉ‑ʉyo ahuviyanga ɨvintu ɨvyo saga vilɨɨho abhe nkati vilɨɨho.

18ɄAbulahaamu paala ɨpo ahabhʉzɨɨwe amazwi ɨgo, gahali makhome hugɨɨtɨshe. Hwope ɨsho, ahajendeelela humʼmwɨtɨshe na hunʼsʉʉbhɨle huje ʉNgʉlʉbhɨ ahayibhomba nanshi ɨsho ahayanjile. Ɨpo ahabha yise wa bhantu abhɨ nsi ɨnyinji, nanshi ɨsho ʉNgʉlʉbhɨ ahamʼmʉzɨɨzye huje, “Abhantu abhɨ shikholo shaaho bhahayibha bhinji nanshi ɨnzota.”#Bhaazya ʉWandilo 15:5. 19Hu habhaazyo ɨho, ʉAbulahaamu ahali na maaha ɨmya yeeka ɨshi. Ʉmwene ahamɨɨnye huje, ʉmʼbɨlɨ gwakwe gwahali nanshi huje gufwiye hu nongwa yɨ gogolo waakwe, nantele wope ʉnʼshɨ waakwe ʉSaala ahali nʼgʉmba. Leelo, hwope ɨsho ʉlwɨtɨho lwakwe saga lwahʉndɨle. 20Nantele, saga ahali nʉ mwoyo ʉgwɨ nsyoho hu nongwa yɨ ndapo ɨyo ahapewiilwe nʉ Ngʉlʉbhɨ. Lyoli ahajendeelela humʼmwɨtɨshe na humʼmwamishe, 21pɨpo ahamɨɨnye lyoli huje ʉNgʉlʉbhɨ anza‑abhombe gaala ɨgo ahanʼnapiiye huje ahayihumʼmombela. 22Sha shɨɨsho ɨNsimbo ɨMfinjile ziyanga huje, ʉNgʉlʉbhɨ ahamʼmaazizya abhe nʼgolosu pitagaalila lyakwe.#Bhaazya ʉWandilo 15:6.

23Leelo amazwi ɨga gayanga huje, “ɄNgʉlʉbhɨ ahamʼmaziziizye abhe nʼgolosu,” saga gasimbwilwe hu nongwa ya Abulahaamu mwene, 24lyoli gahasimbwilwe hu nongwa yeetu tenti. Gahutibhʉʉzya lyoli huje nkashele timʼmwɨtɨɨshe ʉNgʉlʉbhɨ ʉyo ahanʼzyʉsyɨzye ʉMwɨnɨ weetu ʉYeesu, ɨpo natɨ tibhaaziwa ʉgolosu. 25ɄNgʉlʉbhɨ ahamʼfumiizye ʉYeesu abudwe hu nongwa yɨ mbiibhi zyetu, nantele ahanʼzyʉsya huje atɨ tibhaaziwe ʉgolosu.

Currently Selected:

ABhaluumi 4: SBK

Highlight

Copy