ABhaluumi 2

ɄNgʉlʉbhɨ ahayihubhalonga abhantu bhonti sinta asalule

1Ɨshi, aawe wamwetu Nʼnyahuudi, aawe wʉ‑ʉlonga abhantu abhanjɨ, saga ʉbhajiiye ahwiyʉʉmɨle nka hashe pitagaalila lya Ngʉlʉbhɨ, hwope ʉbhe we naanu. Enya, hu habhaazyo lwʉ‑ʉhunʼnonga ʉwamwenyu, ɨshi ʉhwilonga weewe wʉmwene, pɨpo nawe ʉbhombile ʉbhiibhi wʉʉwo. 2Timanya huje ʉNgʉlʉbhɨ alonga hu lyoli abhantu ɨbho bhabhomba ɨmbombo ɨmbiibhi nanshi ɨzyo. 3Leelo aawe wamwetu, wʉ‑ʉhunʼnonga ʉwamwenyu hu habhaazyo ɨho nawe ʉbhomba ɨmbiibhi zyɨzyo, ʉgandi asɨɨbhe huje ʉNgʉlʉbhɨ ahayihuleha sinta hulonje. 4ɄNgʉlʉbhɨ ali nʉ mwoyo ʉmwinza, pɨpo ahulolela ɨnkʉmbʉ ɨngoosi, saga aʼpiiye ʉlufundo nka heeka, leelo ahujimbiilila huje ʉlaate ɨmbiibhi zyaho. Ɨshi yeenu ʉhunʼsyonshela? 5Ɨshi, ʉhwibhɨɨshɨla ʉlufundo ʉlugoosi tee hwi‑isiku ɨlyo ʉNgʉlʉbhɨ ahayibhomba ʉlongwe lwakwe ʉlwɨ golosu, pɨpo ʉli na mabaado nantele saga ʉhwanza alaate ɨmbiibhi zyaho.

6Isiku ɨlyo ʉNgʉlʉbhɨ ahayihunʼsomba shila muntu alɨngaane nɨ mbombo zyakwe.#Bhaazya ɨNsalifyo 62:12. 7Bhaala bha bhajimbiilila abhombe ɨnyinza, ʉmwene ahayihubhapeela ʉwʉʉmi ʉwa wiila, pɨpo bhahwanza ɨnshɨnshɨ, ʉmwamu nʉ wʉʉmi ʉwo saga wunanjiha. 8Leelo, bha bhali bhiimi ɨbho bhakhaana ɨlyoli na‑abhombe ʉbhiibhi, ʉNgʉlʉbhɨ ahayihubhaviitilwa na hubhapeele ʉlufundo. 9Abhantu bhonti ɨbho bhabhomba ɨmbiibhi bhahayambɨɨlɨla ʉlufundo na mayɨmba, ahwande hwa Bhayahuudi afishe hwa bhantu bha saga Bhayahuudi. 10Leelo bhonti ɨbho bhabhomba ɨnyinza, ʉNgʉlʉbhɨ ahayihubhapeela ɨnshɨnshɨ, ʉmwamu nʉ tengaanu, nasʉʉti hwa Bhayahuudi afishe hwa bhantu bha saga Bhayahuudi. 11Enya, ʉNgʉlʉbhɨ saga abaagula ʉmuntu wowonti.

12Abhantu ɨbho saga Bhayahuudi ɨbho bhabhomba ɨmbiibhi bhahayiyaziwa, hwope ɨsho abheene bhahayilongwa sinta ndajizyo zya Moose.#2:12 ndajizyo zya Moose Ɨzi ndajizyo ɨzyo ʉNgʉlʉbhɨ ahabhapiiye aBhaizilaeeli hu lʉʉgwa hwi‑idala ɨlya Moose. Bhope aBhayahuudi ɨbho bhazimɨɨnye ɨndajizyo ɨzyo, nkashele bhabhomba ɨmbiibhi, bhahayilongwa alɨngaane nɨ ndajizyo ɨzyo. 13Bhahayilongwa, pɨpo ʉNgʉlʉbhɨ saga ahumʼmaazizya abhe nʼgolosu ʉmuntu afumilane na hwʉmvwe ɨndajizyo zya Moose#2:13 Moose Bhaazya izwi Moose hu Ngalulanyo ɨyɨ Mazwi aMajenu hu malishilo wɨ shitaabu ɨshi. lwene, leelo ahumʼmaazizya abhe nʼgolosu ʉmuntu, pɨpo abhomba gaala ɨgo ɨndajizyo ziyanga. 14Abhantu ɨbho saga Bhayahuudi nkashele bhabhomba ɨgo bhagamɨɨnye, ɨgo gali nanshi ɨndajizyo zya Moose ɨzyo ziyanga, hwope nkashele ɨndajizyo ɨzyo ʉMoose ahapewiilwe saga bhahazimɨɨnye, ɨlolesya huje mu mooyo gaabho bhamɨɨnye abhombe ɨgo gakhondɨɨye. 15Abhantu ɨbho ɨnjendo zyabho zilolesya huje ɨgo gayangwa mu ndajizyo gasimbwilwe mu mooyo gaabho. Hwa huje ɨnsɨɨbho zyabho, hu habhaazyo hamo zihubhalonga, nantele hu habhaazyo hamo zihubhalolesya huje bhabhomba ga gakhondɨɨye. 16Ɨzi zyɨ Nongwa Nyinza ɨzyo ɨlʉmbɨɨlɨla huje isiku liila ɨlyɨ longwe, ʉNgʉlʉbhɨ ahayihubhalonga abhantu ashilile hwi‑idala ɨlya Yeesu ʉKilisiti. Ahayilonga hwope ɨnsɨɨbho zyabho ɨzya hu mfiso.

ABhayahuudi nɨ ndajizyo zya Moose

17Ɨshi aawe, wʉ‑ʉhwikwizya Nʼnyahuudi wɨ lyoli, ʉsʉʉbhɨla ahwambɨɨlɨle ʉgolosu hwa‑alondolezye ɨndajizyo, nantele ʉhwibaada aawe huje ʉli muntu wa Ngʉlʉbhɨ. 18Ʉhwilola huje ʉgamɨɨnye gaala ɨgo asʉngwa ʉNgʉlʉbhɨ na‑asalule gaala ga gakhondɨɨye, pɨpo ʉmanyiiye ɨndajizyo zyakwe. 19Alɨngaane nɨ‑ɨgo, aawe ʉhwilola huje ʉli nʼnongozi wa bhantu bha saga Bhayahuudi, nanshi ʉmuntu wa‑ahubhalongozya abhantonko, awe nanshi ʉlukhozyo ʉlwo luhubhalawushila abhantu mu hiisi. 20Nantele, ʉhwilola huje ʉli mʼmanyizyi wa bhaana na bhantu ɨbho saga bhamɨɨnye ɨlyoli ya Ngʉlʉbhɨ, pɨpo ɨndajizyo zyaho zihubhʉʉzya ɨnongwa ɨzyɨ tengulizu wonti nʉ manyiihanyi ʉwɨ lyoli. 21Ɨshi aawe wʉ‑ʉhubhamanyizya abhanjɨ, leelo saga ʉbhomba gaala ɨgo ʉyanga! Aawe ʉlʉmbɨɨlɨla abhanjɨ, ʉyanga huje, “Ʉgandi ahwibhe,” leelo yeenu aawe ʉhwibha? 22Aawe ʉhubhabhʉʉzya abhantu huje, “Mugandi abhembushe,” leelo yeenu aawe ʉbhembuha? Nantele, ʉhubhaviitilwa bha bhapuuta abhangʉlʉbhɨ, yeenu aawe weewe ʉhwibha ɨvintu afume mu nyumba ɨzya‑apuutile ɨvifwani ɨvyo? 23Aawe wʉ‑ʉhwibaada huje ʉzimɨɨnye ɨndajizyo zya Ngʉlʉbhɨ, ʉhunʼsʉʉsya ʉNgʉlʉbhɨ lwʉ‑ʉnangaanya ɨndajizyo zyakwe. 24Ɨshi, ɨga gali nanshi ɨsho ɨNsimbo ɨMfinjile ɨzyo ziyiga, “Hu mbiibhi zyenyu ɨzyo mubhomba, ʉNgʉlʉbhɨ aligwa na bhantu ɨbho saga Bhaizilaeeli.”#Bhaazya Yesaaya 52:5; Ezekiyeeli 36:20-22.

25Hu mbali ɨya‑atende ɨngoola ɨya hwitagaalila ɨyɨ lume,#2:25 ɨya‑atende ɨngoola ɨya hwitagaalila ɨyɨ lume Hwa Bhayahuudi nkashele ʉmwana ʉwɨ shilume wapaapwa, isiku ɨlya naana afume lwa wapaapwa, bhahanʼtendaga ɨngoola ɨya hwitagaalila ɨyɨ lume. Bhaazya izwi Atende ɨngoola ɨya hwitagaalila ɨyɨ lume hu Ngalulanyo ɨyɨ Mazwi aMajenu hu malishilo wɨ shitaabu ɨshi. Nantele, bhaazya ʉWandilo 17:9-14. ʉhwo huli nɨ zya pa mwanya huliiwe, paala lwene ɨpo ʉlondolezya ɨndajizyo. Leelo nkashele ʉsyonshele ɨndajizyo, atende ɨngoola ɨyo huliiwe saga hubha nɨ zya pa mwanya zyozyonti, nantele aawe ʉbha nanshi ʉmuntu ʉyo saga atendiilwe ɨngoola ɨyo. 26Ɨshi, ʉmuntu ʉyo saga atendiilwe ɨngoola ɨyo nkashele alondolezye ɨsho ziyanga ɨndajizyo, ʉNgʉlʉbhɨ ahumʼmwɨtɨha nanshi ʉmuntu ʉyo atendiilwe ɨngoola. 27Nantele ʉmuntu ʉyo saga atendiilwe ɨngoola ɨyo, leelo alondolezya ɨndajizyo ɨzya Ngʉlʉbhɨ, wɨlɨ saga ahayihubhalonga amwɨ mwa muli Bhayahuudi ɨbho mutendiilwe na huzimanye ɨnsimbo zyɨ ndajizyo, leelo saga muhuzilondolezya? 28Enya, saga huje ʉmuntu wowonti ʉyo apapwilwe Nʼnyahuudi anza‑abhe muntu wa Ngʉlʉbhɨ, nantele ʉmuntu saga abha muntu wa Ngʉlʉbhɨ afumilane na‑atendwe ɨngoola ɨyo mu mʼbɨlɨ lwene. 29Ndaali! Ʉmuntu wa Ngʉlʉbhɨ ya yʉʉla ʉyo ʉmwoyo gwakwe tinisu hwa Ngʉlʉbhɨ. Atendwe ɨngoola ɨyo lyoli hubhombeha hwi‑idala ɨlya Mʼpepo ʉMʼfinjile hu mwoyo, saga hwi‑idala ɨlya‑alondolezye ɨndajizyo zya Moose. Ʉmuntu nanshi ʉyo, saga abaadwa na bhantu, lyoli abaadwa nʉ Ngʉlʉbhɨ yʉʉyo.#Bhaazya ɨNyiizuho 30:6.

Currently Selected:

ABhaluumi 2: SBK

Highlight

Copy